ĨSOMO YA 60
Endeea Kwĩka Maendeeo
Ĩvuku yĩĩ nĩyĩũtetheeisye weemanyĩsya maũndũ maingĩ ĩũlũ wa Yeova. Maũndũ ala ũmanyĩte nĩmatumĩte ũmwenda mũno, na nũndũ wa ũu, no kwĩthĩwa wĩyumĩtye kwake na ũkavatiswa. Na ethĩwa ndũnamba kwĩka ũu, nĩvatonyeka ũkethĩwa ũsũanĩĩte kwosa ĩtambya yĩu o mĩtũkĩ. Ĩndĩ manya kana kũvatiswa ti kwʼo mũthya wa kwĩka maendeeo. Nũtonya kũendeea kũmũthengeea Yeova tene na tene. Ata?
1. Nĩkĩ waĩle kũendeea kũlũlũmĩĩlya ngwatanĩo yaku vamwe na Yeova?
No nginya twĩkĩe kĩthito nĩ kana tũendeee kũlũlũmĩĩlya ũnyanya witũ na Yeova. Nĩkĩ? “Nĩ kana tũikese kwelelũka” tũmũtie. (Aevelania 2:1) Nĩ kyaũ kĩtonya kũtũtetheesya tũendeee kũmũthũkũma Yeova twĩ aĩkĩĩku? Nĩtwaĩle kwĩthĩwa na kĩthito wĩanĩ wa kũtavanyʼa na tũimantha nzĩa ingĩ sya kũmũthũkũma Ngai witũ mũnango. (Soma Avilivi 3:16.) Kũmũthũkũma Yeova nĩwʼo ũndũ ũla mũseo vyũ tũtonya kwĩka thayũnĩ witũ!—Savuli 84:10.
2. Nĩ ũndũ ũngĩ wĩva waĩle kũendeea kwĩka?
O na kau yu nũũmina kwĩmanyĩsya ĩvuku yĩĩ, ve maũndũ angĩ ũtaĩle kũeka kwĩka wĩ Mũklĩsto. Mbivilia yaĩtye kana nĩtwaĩle “kwĩvwʼĩka mwĩkalĩle mweũ.” (Aeveso 4:23, 24) Waendeea kwĩmanyĩsya Mbivilia na kũthi maũmbanonĩ ma kĩkundi, ũkeemanyĩsya maũndũ meũ ĩũlũ wa Yeova na nguma syake. Mantha nzĩa mbingangĩ sya kwonanyʼa nguma ta syake thayũnĩ waku. Na ũyĩendeea kwĩka moalyũku ala mekwendeka nĩ kana ũmũtanĩthye Yeova.
3. Yeova akaũtetheesya ata wĩke maendeeo?
Mbivilia yaĩtye atĩĩ: “Ngai . . . akamũmanyĩsya vyũ. Akatuma mwĩthĩwa alũmu, akatuma mwĩthĩwa na vinya, na akamũlũlũmĩlya vyũ.” (1 Vetelo 5:10) Ithyonthe nĩtũkwatawa nĩ matatwa. Ĩndĩ Yeova nũtũnengae kĩla tũkwenda nĩ kana tũmasinde. (Savuli 139:23, 24) Akwathĩte kana akaũnenga vinya na wendi wa kũmũthũkũma wĩ mũĩkĩĩku.—Soma Avilivi 2:13.
ĨMANYĨSYE MŨNANGO
Ĩmanyĩsye wone ũndũ ũtonya kũendeea kwĩka maendeeo na ũndũ Yeova ũkakũathima.
4. Ndũkaeke kũneena na Mũnyanyau ũla mũnene
Kũvoya na kwĩmanyĩsya Mbivilia nĩkũũtetheesye ũkatwʼĩka mũnyanya wa Yeova. Maũndũ asu matonya kũũtetheesya ata ũkamũthengeea mũnango?
Somai Savuli 62:8, na ĩndĩ mũineenea ĩkũlyo yĩĩ:
-
Nĩ kana ũlũlũmĩĩlye ũnyanya waku na Yeova, ũtonya kwĩka ata waĩlangye mboya syaku?
Somai Savuli 1:2, na ĩndĩ mũineenea ĩkũlyo yĩĩ:
-
Nĩ kana ũlũlũmĩĩlye ũnyanya waku na Yeova, ũtonya kwĩka ata nĩ kana waĩlangye ũndũ ũsomaa Mbivilia?
Ũtonya kwĩka ata nĩ kana ũtethekae mũnango yĩla ũkwĩmanyĩsya Mbivilia we mwene? Nĩ kana wone maũndũ amwe ũtonya kwĩka, ĩloelei VITIO, na ĩndĩ mũineenea makũlyo ala maatĩĩe.
-
Nĩ maũndũ meva woona vitionĩ ĩsu ũtonya kũtũmĩa?
-
Nĩ maũndũ ta meva ũtonya kwenda kwĩmanyĩsya?
5. Ĩyĩkĩĩe mĩvango ya kĩ-veva
Kwĩyĩkĩĩa mĩvango ĩla ũkwenda kwĩanĩsya ũthũkũminĩ wa Yeova kũkaũtetheesya ũendeee kwĩka maendeeo. Ĩloelei VITIO, na ĩndĩ mũineenea ĩkũlyo yĩla yĩatĩĩe.
-
Kwosana na vitio ĩsu, Cameron atethekie ata nũndũ wa kwĩthĩwa na mĩvango ya kĩ-veva?
Ti kĩla mũndũ ũtonya kũthi kũtavanyʼa nthĩ ĩngĩ. Ĩndĩ o na ũu wĩ o vo, ithyonthe nĩtũtonya kwĩyĩkĩĩa mĩvango ĩla tũtonya kũvikĩa. Somai Nthimo 21:5, na ĩndĩ mũisũanĩa nĩ mĩvango yĩva ũtonya kwenda kwĩyĩkĩĩa . . .
-
kĩkundinĩ.
-
ũtavanyʼanĩ.
Mwolooto ũla wĩ ĩandĩkonĩ yĩu, ũtonya kũũtetheesya ata wĩanĩsye mĩvango yaku?
Mĩvango ĩmwe ũtonya kwĩyĩkĩĩa
-
Kwaĩlangya mboya syaku.
-
Kũsoma Mbivilia yonthe.
-
Kũtata ũmanye andũ onthe kĩkundinĩ.
-
Kũmantha mũmanyĩwʼa waku wa Mbivilia.
-
Kũtwʼĩka vainia mũtetheesya kana vainia wa kĩla ĩvinda.
-
Ethĩwa wĩ mwana-a-asa, kwĩkĩa kĩthito ũtwʼĩke mũtetheesya wa kĩkundi.
6. Tanĩa thayũ tene na tene!
Somai Savuli 22:26, na ĩndĩ mũineenea ĩkũlyo yĩĩ:
-
Ũtonya kwĩka ata nĩ kana ũtanĩe thayũ yu tũĩ, na tene na tene?
KĨLA TWEEMANYĨSYA
Endeea kũlũlũmĩĩlya ũnyanya waku na Yeova na ũyĩyĩkĩĩa mĩvango ya kĩ-veva. Na weeka ũu, ũkatanĩa thayũ tene na tene!
Makũlyo ma Kũsyokeleela
-
Nĩkĩ ũtonya kwĩthĩwa ũte na nzika kana Yeova akaũtetheeasya nĩ kana ũmũthũkũme wĩ mũĩkĩĩku?
-
Ũtonya kũlũlũmĩĩlya ũnyanya waku na Yeova ata?
-
Kwĩthĩwa na mĩvango ya kĩ-veva kũtonya kũũtetheesya ata wĩke maendeeo?
MAŨNDŨ ANGĨ MA KWĨMANYĨSYA
Nĩ kyaũ Yeova wonaa kĩ kya vata mũno, nĩ kwĩka ũndũ ũmwe mũnene ũkwonanyʼa kana nĩtwĩyumĩtye kwake-ĩ, kana nĩ kũmũthũkũma twĩ aĩkĩĩku thayũnĩ witũ wʼonthe?
O na mũthũkũmi mũĩkĩĩku wa Yeova nũtonya kwasya ũtanu wake. Ĩloele vitio wone ũndũ ũtonya kwĩthĩwa na ũtanu ĩngĩ.
Kũsoma na Kũvindĩĩsya Kĩla Wasoma no Kũtume Wĩthĩwa na Ũtanu Ĩngĩ (5:25)
Ũtonya kwĩyĩkĩĩa mĩvango ya kĩ-veva ata na ũitata ũmĩvikĩĩe?
“Ĩyĩkĩĩe Mĩvango ya Kĩ-veva Nĩ Kana Ũmũtaĩe Mũmbi Waku” (Mũsyaĩĩsya, Matukũ 15, Mwei wa 7, 2004)
Ũtonya kwĩka ata wĩthĩwe wĩ Mũklĩsto mũimu kĩ-veva, na nĩkĩ ũsu nĩ ũndũ wa vata?
No Wendeewʼe Nĩ Ii
MAKŨLYO MAKŨLAWʼA MAVINDA MAINGĨ
Mũvango wa Ngũsĩ sya Yeova wa Kũmanyĩsya Andũ Mbivilia Ũtwaĩĩawʼa Ata?
Mũvango ũũ wa masomo ma Mbivilia ũseũvĩtwʼe nĩ Ngũsĩ sya Yeova ndwĩ ndĩvi, na no ũtũmĩe Mbivilia ĩla ũkwenda. Ĩwʼa wĩ mũthasye kũthokya mũsyĩ waku wʼonthe kana mũnyanya ũla ũkwenda.
