Пу библейскай курс тузында Иеговадаңар кӧп ниме піліп алғазар. Ол пілістер ӱчӱн сірер ағаа уғаа хыныбысхазар, аннаңар чуртазыңарны ағаа пазырыста пиріп, кіреске тӱскен поларзар. Кіреске тӱспеен ползар, анзынаңар сағынча поларзар. Иеговаа чағын полғаны кіреске тӱскенінең тоозылбинча, че пасталча. Сірер Иеговаа мӧгі тус чағыннаң чағын полып одырарзар.

1. Ноға Иегованаң ынархасты аннаң андар тыыдарға кирек?

Саба чолға кірібіспес ӱчӱн, піске Иегованаң ынархазыбысты тыыдарға кирек (Еврейлерге 2:1). Иеговаа киртістіг нымысчыланарын тохтатпасха ниме полызар? Піске Худай сӧзін искірерінде ӧткін аралазарға паза пістің Худайыбысха нымысчыланарға аймах-пасха оңдайлар тілирге кирек. (Филипптегілерге 3:16 хығырыбызыңар.) Иеговаа нымысчыланғаны — чуртастың иң чахсы чолы! (Псалом 84:10).

2. Паза хайдағ кӧстеглер турғызарға?

Пу библейскай курс тоозыл парир, че анзынаң христианскай чол тоозылбинча. Библияда наа кізее айланарға кирек тіп чоохталча (Ефестегілерге 4:23, 24). Ӧме чыылығларына чӧріп паза Библияны пос алынҷа істезіп, сірер Иеговадаңар наа пілістер аларзар паза аның качестволарынаң танызарзар. Ағаа кӧӧгіңер паза ағаа тӧӧй поларға кӱстеніңер. Иегованы аннаң андар ӧріндірер ӱчӱн, алызарға тимде полыңар.

3. Хайди Иегова сірерге полызар?

Библияда чоохталча: «Худай... сірерні позы читіре ӱгрет салар. Ол сірерні пик ит салар, кӱстіг паза сыдамах ит салар» (1 Петрның 5:10, НТ). Пістің полғаныбыстың хыҷаланыстар полар, че оларны тобырарға Иегова прай нимелер пирче (Псалом 139:23, 24). Иегова ағаа киртістіг паза хыныснаң нымысчыланарға кӱс пирерге молҷапча. (Филипптегілерге 2:13 хығырыбызыңар.)

 ТИРЕҢ АРАХ ХАС КӦРІҢЕР

4. Иң чағын Нанҷынаң чоохтазарын тохтатпаңар!

Пазырыс паза Библия ӱгренгені сірерге Иегованың нанҷызы полып аларға полыс пиргеннер. Хайди пу киректер Иеговаа чағыннаң чағын полып одырарға полыс пирер?

Псалом 62:8 хығырып алып, ӱзӱрібізіңер:

• Тирең арах паза, прай чӱрек азып, пазырар ӱчӱн, ниме идерге?

Псалом 1:2 сносканаң хада хығырып алып, ӱзӱрібізіңер:

• Худайнаң ынархазыңарны тыыдар ӱчӱн, Библияны хайди хығырарға кирек?

Библияны пос алынҷа істескенін хайди тузалығ идерге? Мына нинҷе-де сағыс. ВИДЕО кӧріп алып, ӱзӱрібізіңер:

• Пу сағыстарның хайзынаң тузалан кӧрерге хынчазар?

• Хайдағ темаларны тирең арах істес кӧрерге хынчазар?

 ӦӦН САҒЫС

Иегованаң палғалызыңарны тыыдыңар паза духовнай кӧстеглер турғызыңар. Андада сірер чуртасха мӧгі тус ӧрінерзер!

Сағысха хатап кир кӧреелер

• Иегова сірерге ағаа киртістіг нымысчыланарға полыс пирерінде ноға ікінҷілебинчезер?

• Хайди сірерге Иегованаң ынархазыңарны тыыдарға?

• Хайди духовнай кӧстеглер Худайнаң ынархазыңарны тыыдар?