Omw’igha lyawu eryosi erye Biblia lino, wabirigha bingyi ebihambire oku Yehova. Ebya wabirigha byabirileka iwamwanza kutsibu indi obundi ky’ekyabirileka iwayihayo okw’iyo n’eribatizibwa. Wamabya isiwuli wakolha ekyo, obundi wunemulengekania okw’ikolhakyo obuthuku obukasa. Aliwe erikulha-kulhana siririsubulira okw’ibatizibwa. Wangana lholha embere eriyithunda hakuhi na Yehova kera na kera. Wuthi?

1. Busana naki wutholere iwalholha embere erighumya obunywani bwawu na Yehova?

Thutholere ithwahiraho akaghalha kanene erilholha embere erighumya obunywani bwethu na Yehova. Busana naki? Nuku ‘sithuyihengeke’ thukamulhuako. (Abaebrania 2:1) Ni kyahi ekyanga thuwathikya erilholha embere erikolera Yehova buthaleghulha? Thwangana yihwerya omwa mubiiri w’erithulira n’erisondya esindi nzira esya thwang’ongereramu erikolera Nyamuhanga wethu. (Soma Abanya Filipi 3:16.) Erikolera Yehova y’enzira eyuwene ey’erikoleseryamo engebe yawu!​—Esyonyimbo 84:10.

2. Ni kindi kyahi ekya wutholere iwalholha embere erikolha?

Nomwakine indi erigha eri lyamahwa, engebe yawu ng’Omukristayo yikendi lholha embere. E Biblia yikabugha yithi thutholere ‘ithwabya bandu bahya-bahya.’ (Abanya Efeso 4:23, 24) Wukendibya wunemulholha embere erigha Ekinywe kya Nyamuhanga n’erihindana okwa mihindano, wukend’igha bindu bihyaka oku Yehova n’emibere yiwe. Sondekanaya esyonzira esyo wang’ongereramu erigherererya emibere yiwe omwa ngebe yawu. Lholha embere erikolha esyombinduka esikayithaghisibawa erithoka eritsemesya Yehova.

3. Yehova akendi kuwathikya athi erikulha-kulhana?

E Biblia yikabugha yithi: ‘Nyamuhanga asyabahikania, n’eribasikya, n’eribaha amaaka, n’eribahangania ndeke.’ (1 Petero 5:10) Ithwe bosi thukalengawako. Aliwe Yehova akathuha ebya thukayithagha erithoka erighanalyo. (Esyonyimbo 139:23, 24) Akakulhaghanisaya erikuha “omuthima w’erianza n’amaaka” w’erimukolera buthaleghulha.​—Abanya Filipi 2:13, NWT.

 THASYIGHA BINGYI

4. Lholha embere erikanirania na Munywani wawu w’okwa ndungu

Erisaba n’erigha e Biblia byabirikuwathikya eribya munywani wa Yehova. Ebyo byanga kuwathikya bithi eryongera eriyithunda okw’iyo?

Soma Esyonyimbo 62:8, mwanakania okwa kibulyo kino:

• Erithoka erighumya obunywani bwawu na Yehova, wang’uwania wuthi emisabe yawu?

Soma Esyonyimbo 1:2, mwanakania okwa kibulyo kino:

• Erithoka erighumya obunywani bwawu na Yehova, wanguwania wuthi emibere yawu y’erisoma e Biblia?

Wanga kolhaki eryongera erighasirwa omw’iyeghesya lyawu? Eribana amenge malebe, mubughaye EVIDIYO, mwanakania okwa bibulyo ebikakwamako.

• Okwa menge awali omo vidiyo, ni wahi agho wanga kolesya?

• Ni myatsi yahi eya wanganza eriyeghesyako?

 OMWA BIKUHI

Lholha embere erighumya obunywani bwawu na Yehova n’eriyihiriraho ebilhubirirwa by’obunyakirimu. Neryo iwukendi syatsemera engebe kera na kera!

Eriyibukya

• Busana naki iwayikethera ngoku Yehova akendi kuwathikya erimukolera buthaleghulha?

• Wanga ghumya wuthi obunywani bwawu na Yehova?

• Ebilhubirirwa by’obunyakirimu byanga kuwathikya bithi erikulha-kulhana?