LUFUNJISHO 60
Twajijilai Kukosesha Bulunda Bwenu ne Yehoba
Mwafunda bintu byavula bingi pe Yehoba mu uno buku. Bintu byo mwafunda bimutundaike kumutemwa bingi Yehoba. Kabiji bimuzakule muchima kwipana kwi aye ne kubatizhiwa. Kampe mukilangulukapo kuba’mba kulutwe na lwendo mukepana kwi aye. Bino nangwatu mwabatizhiwa, kechi muleka kufwenya kwipi ne Yehoba ne. Mukatwajijila kufwenya kwipi ne Yehoba myaka ne myaka. Mwakonsha kuba byepi kino?
1. Mambo ka o mwafwainwa kutwajijila kukosesha bulunda bwenu ne Yehoba?
Twafwainwa kwibikako bingi kutwajijila kukosesha bulunda bwetu ne Yehoba. Mambo ka a kwibikilako? “Pa kuba’mba tubule kukumpulwa” kufuma kwi aye. (Bahebelu 2:1) Ñanyi kintu kyafwainwa kwitukwasha kutwajijila kwingijila Yehoba mu bukishinka? Twafwainwa kutwajijila kusapwilanga na mukoyo ne kumonapo mashinda akwabo a kwingijilamo Lesa wetu na muchima yense. (Tangai Filipai 3:16.) Kashika, kwingijila Yehoba ke kintu kyawama bingi!—Salamo 84:10.
2. Ñanyi bintu bikwabo byo mwafwainwa kutwajijila kubanga?
Nangwa kya kuba mwapwisha kufunda uno buku, bino musakutwajijila kwikala bwikalo bwafwainwa mwina Kilishitu. Baibolo witutundaika kuba’mba twafwainwa “kuvwala bumuntu bupya.” (Efisesa 4: 23, 24) Byo musakutwajijila kufunda Baibolo ne kutanwanga ku kupwila, mukafunjilapo bintu bikwabo pe Yehoba ne pa byubilo byanji. Monaipo mashinda afwainwa kwimukwasha mu bwikalo bwenu ne kwikala na byubilo bijipo ne Yehoba. Kabiji twajijilai kupimpulanga byubilo byenu pa kuba’mba mutokeshenga Yehoba ku muchima.
3. Yehoba wafwainwa kwimukwasha byepi kukosesha bulunda bwenu ne aye?
Baibolo waamba’mba: “Lesa . . . ukapwisha kwimufunjisha. Ukemulengela kushikimana, ukemukosesha ne kwimujimba.” (1 Petelo 5:10) Atweba bonse tukesekwa kuba bintu byatama. Pakuba Yehoba witupa bintu byafwainwa kwitukwasha kuleka kuba bintu byatama. (Salamo 139:23, 24) Yehoba witulaya kwitupa kizaku ne bulume pa kuba’mba tumwingijilenga mu bukishinka.—Tangai Filipai 2:13.
FUNJILAIPO BIKWABO
Yukai bintu byafwainwa kwimukwasha pa kuba’mba mutwajijile kukosesha bulunda bwenu ne Yehoba ne byo afwainwa kwimupesha.
4. Twajijilai kwisambanga ne kuteleka ku byamba Yehoba mulunda nenu
Kulomba ne kufunda Baibolo kukemukwasha bingi kwikala mulunda ne Yehoba. Pano kulomba ne kufunda Baibolo kukemukwasha byepi kutwajijila kufwenya kwipi ne Yehoba?
Tangai Salamo 62:8, ne kwisamba buno bwipuzho:
-
Kulomba kwi Yehoba kukakosesha byepi bulunda bwenu ne aye?
Tangai Salamo 1:2, ne kwisamba buno bwipuzho:
-
Kutanga Baibolo kukakosesha byepi bulunda bwenu ne Yehoba?
Mwafwainwa kuba byepi pa kuba’mba byo mutanga mu Baibolo pa bunke bwenu bimukwashenga? Pa kuba’mba muyuke mwa kubila, tambai VIDYO, ne kwisamba ano mepuzho.
-
Ñanyi mashinda amo aji mu vidyo o mwakonsha kwingijisha?
-
Ñanyi mitwe yo musakutemwa kutangapo?
5. Ibikilai bikonkwanyi bya kwingijila Yehoba pakatampe
Kufuukulapo byo mukeba kwingijila Yehoba kusakukemukwasha kuyilako palutwe. Tambai VIDYO, ne kwisamba buno bwipuzho.
-
Mu uno vidyo ye mwatamba, Cameron wamwenejilemo byepi byo atangizheko kwingijila Yehoba mu bwikalo bwanji?
Kechi muntu yense ye kyakonsha kupeelela kuya na kusapwila mu kyalo kingi ne. Nangwa byonkabyo, atweba bonse twafwainwa kwibikila byo tukeba kuba pa kwingijila Yehoba pakatampe. Tangai Byambo bya Maana 21:5, ne kwisamba pa bikonkwanyi byo mwafwainwa kwibikila . . .
-
mu kipwilo.
-
mu mwingilo wa kusapwila.
Nanchi jifunde jiji mu kino kyepelo, jafwainwa kwimukwasha byepi kufikizha byo mukeba kuba pa kwingijila Lesa?
Bintu bimo byo mwafwainwa kulangulukapo kuba
-
Kwingijilapo pa kulombanga milombelo yawama.
-
Kutanga Baibolo yense.
-
Yukai balongo ne banyenga bonse mu kipwilo.
-
Ikalaipo na muntu umo wa kufunjisha Baibolo.
-
Nembeshaiko bupainiya bwa kukwasha nangwa bupainiya bwa kimye kyonse.
-
Umvwe mwi mulongo, ingijilaipo pa kuba’mba mufikilemo kwikala nkwasho mu kipwilo.
6. Bwikalo bwenu bwa kulutwe bukawama bingi!
Tangai Salamo 22:26 ne Yelemiya 29:11, ne kwisamba buno bwipuzho:
-
Mwafwainwa kuba byepi pa kuba’mba mwikale bulongo luno ne kukekala bwikalo bwawama kulutwe?
ÑANYI BISHINKA BYO MWAFUNDA?
Twajijilai kukosesha bulunda bwenu ne Yehoba ne kwibikila bikonkwanyi bya kumwingijila. Inge mwauba bino, mukekala na bumi bwa myaka ne myaka!
Mepuzho a kupitulukamo
-
Mambo ka o mwashiinwa kuba’mba Yehoba usakwimukwasha kumwingijilanga mu bukishinka?
-
Mwafwainwa kukoseshe byepi bulunda bwenu ne Yehoba?
-
Kufwenya kwipi ne Yehoba kukemukwasha byepi kumwingijila bulongo?
KEBAI BISHINKA BIKWABO
Ñanyi kintu Yehoba kyo anemeka bingi? Nanchi kwibepekezha kumwingijila nyi, inyi kutwajijila kumwingijila moba onse mu bukishinka?
Nangwatu kalume wa Yehoba wakishinka lusekelo lwanji lwakonsha kupwa. Monai bya kwilubwezha.
Kutanga Mambo a Lesa ne Kulanguluka langulukapo Kukemulengela Kwingilanga na Lusekelo (5:25)
Mwakonsha kwibikila byepi bikonkwanyi bya kwingijila Yehoba ne kwibifikizha?
Mambo ka o kyawamina kwikala mwina Kilishitu wakosa mu lwitabilo? Kabiji mwakonsha kuba byepi?
“Tuyenga Kulutwe Tufike ne ku Bukulumpe ku Mupashi—‘Juba Jikatampe ja Yehoba Jijitu Pepi’” (Kyamba kya Usopa, May 15, 2009)
Mwakonsha Kutemwa
MEPUZHO O BEPUZHA JAVULA
Lufunjisho lwa Baibolo lo lu ka?
Tanai mikumbu ya mepuzho epuzha bantu javula pa mutanchi wetu wa kufunjisha Baibolo.
