စးထီၣ်လၢနမၤလိလံာ်စီဆှံ တုၤလၢခဲအံၤန့ၣ် နမၤလိဘၣ် ယဟိဝၤယွၤ အဂ့ၢ်အါမးလံ. ခီဖျိလၢ နမၤလိဘၣ် တၢ်ဂ့ၢ်တဖၣ်အံၤအဃိ နအဲၣ်ယဟိဝၤယွၤဒိၣ်မး ဒီးဘၣ်သ့ၣ်သ့ၣ် နဟ့ၣ်လုၢ်ထီၣ်သးလၢအအိၣ် ဒီးဒိးဘျၢထံဝံၤလံ. ဒီးနမ့ၢ်တဒိးဘျၢဘၣ်ထံဒံးဘၣ် သနာ်က့ ဘၣ်သ့ၣ်သ့ၣ် တယံာ်လၢၤဘၣ်န့ၣ် နကဒိးဘျၢထံ. ဘၣ်ဆၣ် နဒိးဘျၢထံမ့ၢ်ဝံၤ သနာ်က့ နကဘၣ်ဆဲးမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤဒံး. အဃိ နဆဲးမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤ ထီဘိကသ့ဒ်လဲၣ်.

၁. ဘၣ်မနုၤအဃိ ပကဘၣ်ဆဲး မၤဂၢၢ်ကျၢၤထီၣ် ပတၢ်ရ့လိာ်သးဒီး ယဟိဝၤယွၤလဲၣ်.

ဒ်သိးပကဆဲးမၤဂၢၢ်ကျၢၤထီၣ် ပတၢ်ရ့လိာ်သးဒီး ယဟိဝၤယွၤအဂီၢ် ပကဘၣ် ဂုာ်ကျဲးစၢးဆူၣ်ဆူၣ်. ပကဘၣ်မၤဒ်န့ၣ် “ဒ်သိးပသုတလီၤထွံလီၤယွၤ” ယံၤထီၣ်ဒီးကစၢ်ယွၤ “နီတဘျီတဂ့ၤအဂီၢ်” လီၤ. (ဧ့ၤဘြံၤ ၂:၁) ဒီးဒ်သိး ပကဆဲးဘူၣ်ထီၣ်ဘါထီၣ် ယဟိဝၤယွၤလၢ တၢ်သးတီအပူၤန့ၣ် တၢ်မနုၤကမၤစၢၤပှၤလဲၣ်. ပကဘၣ်ဟးစံၣ်တဲၤတဲလီၤတၢ် ဆူၣ်ဆူၣ် ဒီးမၤအါထီၣ် ကစၢ်ယွၤ အတၢ်မၤလၢကျဲအဂၤ. (ဖး ဖံလံးပံၤ ၃:၁၆.) ပမ့ၢ်မၤယဟိဝၤယွၤ အတၢ်မၤန့ၣ် ပကအိၣ်ဒီး တၢ်အိၣ်မူလၢအဂ့ၤကတၢၢ်.​—စံးထီၣ်ပတြၢၤ ၈၄:၁၀.

၂. နကဘၣ်မၤဒံး မနုၤလဲၣ်.

နမၤလိ လံာ်တဘ့ၣ်အံၤ မ့ၢ်ဝံၤသနာ်က့ နကဘၣ်ဆဲးအိၣ်မူ ဒ်ခရံာ်ဖိအသိး ဒီးလံာ်စီဆှံ တဲဝဲလၢ ပကဘၣ် “ဒုးအိၣ်ထီၣ် လုၢ်လၢ်သကဲာ်ပဝးအသီ.” (အ့းဖ့းစူး ၄:​၂၃, ၂၄) နမ့ၢ်ဆဲးမၤလိ ယဟိဝၤယွၤ အကလုၢ်ကထါ ဒီးထီၣ်တၢ်အိၣ်ဖှိၣ်န့ၣ် နကသ့ၣ်ညါအါထီၣ် ဘၣ်ဃးဒီး ယဟိဝၤယွၤ ဒီးအတၢ်ဂ့ၤတၢ်ဝါတဖၣ်အဂ့ၢ်. အဃိ ဂုာ်ကျဲးစၢးကွၢ်လိ ယဟိဝၤယွၤ အတၢ်ဂ့ၤတၢ်ဝါ ဒီးပာ်ဖျါထီၣ်အီၤလၢ နတၢ်အိၣ်မူအပူၤ. ဒီးဒ်သိး နကမၤသးခု ယဟိဝၤယွၤအသးအဂီၢ် တၢ်လၢနဘၣ်ဆီတလဲ မ့ၢ်အိၣ်ဒံးန့ၣ် ဂုာ်ကျဲးစၢး ဆီတလဲ.

၃. ဒ်သိး နကဆဲးမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤအဂီၢ် ယဟိဝၤယွၤ ကမၤစၢၤနၤဒ်လဲၣ်.

လံာ်စီဆှံ တဲဝဲလၢ “ကစၢ် . . . အနီၢ်ကစၢ်ဒၣ်ဝဲ ကဟ့ၣ်သုတၢ်သိၣ်လိ တုၤလၢအလၢအပှဲၤတစုလီၤ. အဝဲကမၤဂၢၢ်မၤကျၢၤသု, အဝဲကဒုးဆူၣ်ထီၣ်သု ဒီးအဝဲကဒုးဆၢထၢၣ်သု ဂၢၢ်ဂၢၢ်ကျၢၤကျၢၤလီၤ.” (၁ ပ့းတရူး ၅:၁၀) ပဝဲခဲလၢာ်န့ၣ် ပကထံၣ်ဘၣ်ဒီး တၢ်မၤကွၢ်တဖၣ်. ဘၣ်ဆၣ် ယဟိဝၤယွၤ ကမၤစၢၤပှၤ ဒ်သိးပလဲၤခီဖျိ တၢ်မၤကွၢ်တဖၣ်အံၤကန့ၢ်. (စံးထီၣ်ပတြၢၤ ၁၃၉:​၂၃, ၂၄) ဒီးဒ်သိး ပကမၤ ကစၢ်ယွၤအတၢ်မၤ လၢတၢ်သးတီအပူၤန့ၣ် ကစၢ်ယွၤအၢၣ်လီၤပှၤလၢ အကမၤစၢၤပှၤ ဒ်သိး ပကသးအိၣ်မၤ အတၢ်မၤ ဒီးအကဟ့ၣ်ပှၤ တၢ်ဂံၢ်တၢ်ဘါ လၢပလိၣ်ဘၣ်.​—ဖး ဖံလံးပံၤ ၂:၁၃.

 ဃုသ့ၣ်ညါအါထီၣ်

၄. ရ့လိာ်သးဒီး နသကိးလၢအဂ့ၤကတၢၢ် ထီဘိ

တၢ်ထုကဖၣ် ဒီးတၢ်မၤလိလံာ်စီဆှံန့ၣ် မၤစၢၤနၤလၢ နကဲထီၣ် ယဟိဝၤယွၤ အသကိးလံ. ဒ်သိး နကဆဲးမၤဂၢၢ်ကျၢၤထီၣ် နတၢ်ရ့လိာ်သးဒီးအီၤအဂီၢ် တၢ်ဃ့ထုကဖၣ် ဒီးတၢ်မၤလိလံာ်စီဆှံ ကမၤစၢၤနၤဒ်လဲၣ်.

ဖး စံးထီၣ်ပတြၢၤ ၆၂:၈ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဒ်သိး နကမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤအဂီၢ် နမၤဂ့ၤထီၣ် နတၢ်ဃ့ထုကဖၣ် ကသ့ဒ်လဲၣ်.

ဖး စံးထီၣ်ပတြၢၤ ၁:၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဒ်သိး နကမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤအဂီၢ် နမၤဂ့ၤထီၣ် နတၢ်ဖးလံာ်စီဆှံ ကသ့ဒ်လဲၣ်.

နနီၢ်ကစၢ် တၢ်မၤလိလံာ်စီဆှံ ကကဲဘျုးဒိၣ်ထီၣ်အဂီၢ် နကဘၣ်မၤဒ်လဲၣ်. ဒ်သိး နကထံၣ်ဘၣ် တၢ်ဟ့ၣ်ကူၣ်တနီၤအဂီၢ် ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.

• တၢ်ဟ့ၣ်ကူၣ်လၢ တၢ်ဂီၤမူအပူၤန့ၣ် နအဲၣ်ဒိးမၤထွဲ ဖဲလဲၣ်တခါလဲၣ်.

• နအဲၣ်ဒိး ဃုသ့ၣ်ညါ တၢ်ဂ့ၢ်ဖဲလဲၣ်တခါလဲၣ်.

 တၢ်ဂ့ၢ်လၢအရ့ဒိၣ်

ဆဲးမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤ ဒီးပာ်လီၤနီၢ်သးဖီတၢၣ်တဖၣ်. နမ့ၢ်မၤဒ်န့ၣ်န့ၣ် နအိၣ်မူဘၣ် မုာ်မုာ်ခုၣ်ခုၣ် လီၤထူလီၤယိာ်သ့ဝဲ.

တၢ်ကွၢ်ကဒါက့ၤ

• ဒ်သိး နကဆဲးမၤ ယဟိဝၤယွၤ အတၢ်မၤလၢ တၢ်သးတီအပူၤန့ၣ် ဘၣ်မနုၤအဃိ နနာ်လၢ ယဟိဝၤယွၤ မၤစၢၤနၤသ့လဲၣ်.

• နမၤဂၢၢ်ကျၢၤထီၣ် နတၢ်ရ့လိာ်သးဒီး ယဟိဝၤယွၤ ကသ့ဒ်လဲၣ်.

• ဒ်သိး နကဆဲးလဲၤထီၣ်လဲၤထီ လၢနီၢ်သးတခီအဂီၢ် နမ့ၢ်အိၣ်ဒီး နီၢ်သးဖီတၢၣ်န့ၣ် ကမၤစၢၤ နၤဒ်လဲၣ်.