DILONGI 60
Tatamana kukuenda na ntuala na kimpeve
Na nzila ya ndongokolo ya Biblia na mukanda yayi, nge melonguka mambu mingi metadila Yehova. Mambu yina nge melonguka tindaka nge nge zola yandi mingi mpe yau salaka ti nge kukipesa na yandi mpe nge baka mbotama. Kana nge sala yau ntete ve, mbala yankaka nge kekana kusala yau na bilumbu kena kuiza. Kasi kukula na nge na kimpeve suka kaka ve na kubaka mbotama. Nge lenda tatamana kupusana penepene na Yehova mvimba mvimba. Na yinki mutindu?
1. Samu na yinki nge fueti tatamana kukumisa kinkundi na nge na Yehova ngolo?
Beto fueti sala ngolo samu na kutatamana kukumisa kinkundi na beto na Yehova ngolo. Samu na yinki? ‘Samu beto zimbakana ve nzila ata fioti.’ (Baebreo 2:1) Yinki lenda sadisa beto beto tatamana kusadila Yehova na kukuikama nionso? Beto fueti kukipesa na kisalu ya kusamuna mpe kusosa maluaku ya kusadila diaka Nzambi mingi. (Tanga Bafilipi 3:16.) Kusadila Yehova kele diambu ya mbote samu na luzingu na beto!—Nkunga 84:10.
2. Yinki diambu yankaka nge fueti tatamana kusala?
Atako ndongokolo yayi ya Biblia memanisa, luzingu na nge lokola Muklisto manisa ve. Biblia metuba ti ‘beno fueti vuata kimuntu ya yimpa.’ (Baefezo 4:23, 24) Ntangu nge kena kutatamana kulonguka Mpova ya Nzambi mpe kukuendaka na balukutakanu ya kimvuka, nge kelonguka mambu ya yimpa metadila Yehova mpe bikadulu na yandi. Sosa mitindu ya kulanda kifuani ya kimuntu na yandi na luzingu na nge. Tatamana kusala bansobolo yina kele mfunu samu na kusepedisa Yehova.
3. Yinki mutindu Yehova kesadisa nge samu nge kula na kimpeve?
Biblia metuba: ‘Nzambi . . . yandi mosi kemanisa kulonga beno. Yandi kekumisa beno ngui, yandi kekumisa beno ngolo, yandi ketula beno fondasion ya ngolo.’ (1 Piere 5:10) Beto nionso kekutanaka na kumekama. Kasi Yehova kepesaka beto yina mefuana samu na kununga yau. (Nkunga 139:23, 24) Yandi mepesa nge nsilulu ya kupesa nge nsatu mpe ngolo ya kusadila yandi na kukuikama nionso.—Tanga Bafilipi 2:13.
KOTA NA MPINDA
Tadila mutindu nge lenda tatamana kukula na kimpeve mpe mutindu Yehova kesakumuna nge.
4. Tatamana kusolola na nkundi na nge yina meluta mbote
Kisambu mpe ndongokolo ya Biblia mesadisa nge nge kuma nkundi ya Yehova. Yinki mutindu mambu yango kesadisa nge nge pusana penepene na yandi?
Tanga Nkunga 62:8, mpe na manima tadila kiuvu yayi:
-
Samu na kukumisa kinkundi na nge na Yehova ngolo, yinki mutindu nge lenda bongisa diaka bisambu na nge?
Tanga Nkunga 1:2 mpe noti na yinsi ya paje, mpe na manima tadila kiuvu yayi:
-
Samu na kukumisa kinkundi na nge na Yehova ngolo, yinki mutindu nge lenda bongisa diaka ntangulu na nge ya Biblia?
Yinki mutindu nge lenda baka mambote na ndongokolo na nge mosi ya Biblia? Samu na kubaka mua mabanza, tula VIDEO, mpe na manima tadila biuvu yayi melanda.
-
Yinki mabanza yina kele na video nge lenda sepela kusadila?
-
Yinki malongi nge kesepela kulonguka?
5. Kukitudila balukanu ya kimpeve
Kuvuanda na balukanu na kisalu ya Yehova kesadisa nge nge tatamana kukula na kimpeve. Tula VIDEO, mpe na manima tadila kiuvu yayi melanda.
-
Na video yayi, yinki mutindu Cameron bakaka mambote na kukitudilaka balukanu ya kimpeve?
Muntu nionso ve lenda kuenda samuna na buala yankaka. Kasi, beto lenda kukitudila balukanu yina beto lenda kokisa. Tanga Bingana 21:5, mpe na manima tadila balukanu yina nge kesepela kukitudila . . .
-
na kimvuka.
-
na kisalu ya kusamuna.
Yinki mutindu nsikudukusu ya verse yayi mesadisa nge nge kokisa balukanu na nge?
Balukanu yina beto lenda sosa kukokisa
-
Bongisa diaka bisambu na nge.
-
Tanga Biblia na mvimba na yau.
-
Sosa kuzaba muntu nionso ya kimvuka na nge.
-
Banda mpe tuadisa ndongokolo ya Biblia.
-
Sala lokola mpasudi nzila samu na ntangu ya fioti to mpasudi nzila ya ngonda na ngonda.
-
Kana nge kele mpangi ya bakala, sosa kukuma nsadisi na kisalu.
6. Zinga mvula na mvula na kiese!
Tanga Nkunga 22:26, mpe na manima tadila kiuvu yayi:
-
Yinki nge lenda sala samu nge zinga na kiese bubu yayi mpe mvula na mvula?
BUNKUFI
Tatamana kukumisa kinkundi na nge na Yehova ngolo mpe kukitudila balukanu ya kimpeve. Na manima nge lenda zinga mvula na mvula na kiese!
Mvutukulu
-
Samu na yinki nge fueti ndima ti Yehova kesadisa nge nge sadila yandi na kukuikama nionso?
-
Yinki mutindu nge lenda kumisa kinkundi na nge na Yehova ngolo?
-
Yinki mutindu balukanu ya kimpeve lenda sadisa nge nge kuenda na ntuala?
SOSA
Yinki Yehova kebakaka na valere mingi, kusala kaka mbala mosi diambu ya kuyitukua samu na kumonisa ti beto mekukipesa na yandi to kusadila yandi na kukuikama nionso na luzingu na beto ya konso kilumbu?
Ata kisadi ya kukuikama ya Yehova lenda zimbisa kiese na yandi. Tala mutindu ya kuvutukila yau diaka.
Kulonguka mpe kuyindula na mpinda sadisaka munu samu munu vutukila kiese na munu (5:25)
Yinki mutindu nge lenda kukitudila balukanu ya kimpeve mpe kukokisa yau?
“Zalá na mikano ya elimo mpo na kokumisa Mozalisi na yo” (Linɔ́ngi ya Mosɛnzɛli ya 15 Juillet 2004)
Samu na yinki kukuma Muklisto ya kuyela na kimpeve kele mfunu, mpe yinki mutindu nge lenda kuma Muklisto ya kuyela na kimpeve?
