KILESO 60

Kulisa ntangu nyonso kindiku ya nge na Yehova

KUWA NA

Kulongoka Biblia na buku yayi me sadisa nge na kuzaba mingi na yina me tadila Yehova. Bamambu yina nge me longoka me sala ti nge zola yandi ya kulutila mpe ni yina me nata nge na kupesa yandi luzingu ya nge mpe na kuzwa mbotokolo. Kana nabunu nge sala yawu, ya lenda vanda ti nge ke na kanisá kusala yawu na bilumbu yina ke kwiza. Kasi kuzwa mbotokolo zola zonza ve ti nge ke sala dyaka ve bangolo samu na kukula na kimpeve. Yinki lenda sadisa nge na kukulisa ntangu nyonso kindiku ya nge na Yehova?

1. Samu na yinki nge me fwana kukulisa ntangu nyonso kindiku ya nge na Yehova?

Beto me fwana kusala ntangu nyonso bangolo samu na kukulisa kindiku ya beto na Yehova. Samu na yinki? “Samu ti beto zimbana ve nzila” yina Yehova me lakisa beto. (Baebre 2:1) Yinki lenda sadisa beto na kuvanda ya kukangama na Yehova ntangu nyonso? Beto zolá sala kisalu ya kusamuna ntangu nyonso mpe kukanisa na mitindu ya nkaka ya kusadila mingi Nzambi. (Tanga Bafilipi 3:16.) Kusadila Yehova kele mambu ya kulutila mbote na luzingu!—Nkunga 84:10.

2. Yinki dyaka nge fwana kusala ntangu nyonso?

Ata ti kulongoka ya nge ya Biblia na buku yayi me kuma na nsuka, luzingu ya nge mutindu mukristo ke suka ve. Biblia ke zonzá ti “beto me fwana kulwata kimuntu ya malu-malu.” (Baefeze 4:23, 24, nwt) Kana nge bika ve kukwenda na balukutakanu mpe kulongoka Biblia ntangu nyonso, nge ke zaba dyaka mambu mingi na yina me tadila Yehova. Kanisa na yina nge lenda sala samu na kulanda kifwani ya Yehova na luzingu ya nge. Sala mpe bangolo samu na kusoba bamambu nyonso yina nge me fwana kusoba na luzingu ya nge samu na kupesa Yehova kilengi.

3. Wapi mutindu Yehova ke sadisa nge na kukulisa kindiku ya nge na yandi?

Biblia ke zonzá: “Nzambi . . . yandi mosi ke lungisa beno, ke kindisa beno, ke pesa beno ngolo, mpe ke sala ti beno vanda ya kusikama.” (1 Piere 5:10) Beto nyonso ke kutaná na bantontolo. Kasi Yehova ke pesá beto yina beto ke na yawu nsatu samu na kuvanda ya kukangama. (Nkunga 139:23, 24) Yandi me zonza ti yandi ke pesa nge ngolo ya kuzola mpe ya kusala mambu yina yandi ke zolaka.—Tanga Bafilipi 2:13.

SOSA KUZABA MBOTE-MBOTE

Longoka yinki nge lenda sala samu na kukulisa kindiku ya nge na Yehova mpe tala wapi mutindu Yehova ke sakumuna nge.

4. Solola ntangu nyonso na Yehova ndiku ya nge ya ntima

Kusambila mpe kulongoka Biblia sadisá nge na kukuma ndiku ya Yehova. Wapi mutindu bamambu yango lenda sadisa nge na kukuma dyaka pene-pene na Yehova?

Tanga Nkunga 62:8, mpe na manima beto zonzila kyuvu yayi:

Wapi mutindu nge lenda soba faso ya nge ya kusambila, samu kindiku ya nge na Yehova kuma ngolo?

Tanga Nkunga 1:2 mpe note ya yisi, mpe na manima beto zonzila kyuvu yayi:

Wapi mutindu nge lenda bongisa kutanga ya nge ya Biblia samu kindiku ya nge na Yehova kuma ngolo?

Yinki nge lenda sala samu kulongoka ya Biblia ya nge mosi natina nge bambote mingi? Samu na kutala yinki lenda sadisa nge, tala VIDEO, mpe na manima beto zonzila byuvu yina ke landa.

VIDEO: Bongisa mutindu ya nge ya kulongoka Biblia nge mosi (5:22)

Wapi bamambu na video yayi nge lenda sadila samu na kubongisa kulongoka ya nge ya Biblia?
Wapi bamambu nge me zola kulongoka ntangu nge ke longoka Biblia?

5. Sosa bafaso ya kusala mingi samu na Yehova

Kana nge sosa ntangu nyonso kusala mingi samu na Yehova, ya ke sadisa nge na kukulisa dyaka kindiku ya nge na yandi. Tala VIDEO, mpe na manima beto zonzila kyuvu yina ke landa.

VIDEO: Luzingu ya kulutila kitoko (3:31)

Wapi bambote Cameron kuzwá samu yandi sosá kusala mingi samu na Yehova?

Bantu nyonso ve lenda kwenda na babwala ya nkaka samu na kusamuna. Kasi beto nyonso lenda sosa bafaso ya kusala mingi samu na Yehova. Tanga Bingana 21:5, mpe na manima beto tala yinki nge lenda sala samu na Yehova . . .

na kati ya kimvuka.
na kisalu ya kusamuna.

Wapi mutindu malongi yina beto me tala na kati ya verse yayi, lenda sadisa nge na kulungisa mambu yina nge ke na nsatu ya kusala samu na Yehova?

Bifwani ya mambu yina nge lenda sala

Bongisa mutindu ya nge ya kusambila.
Tanga Biblia nyonso.
Sosa kuzaba bampangi nyonso ya kimvuka ya nge.
Banda kulongoka Biblia na muntu.
Kuma mupasuli nzila ya ntangu fioti to ya ntangu nyonso.
Kana nge ke mpangi ya bakala, sosa kulungisa bamambu yina Biblia ke lombá samu na kukuma kisadisi.

6. Sepela na luzingu ya ntangu nyonso!

Tanga Nkunga 22:26, mpe na manima beto zonzila kyuvu yayi:

Yinki nge lenda sala samu na kusepela na luzingu bubu yayi mpe ntangu nyonso?

NA BUNKUFI

Kubika ve na kukulisa kindiku ya nge na Yehova mpe sosa kusala mingi samu na yandi. Kana nge sala mutindu yayi, nge ke sepela na luzingu bubu yayi, mpe na bilumbu yina ke kwiza!

Mambu ya kusimba

Samu na yinki nge lenda vanda na kundima ti Yehova ke sadisa nge na kuvanda kaka ya kukangama na yandi?
Wapi mutindu nge lenda kumisa ngolo kindiku ya nge na Yehova?
Wapi mutindu kusosa bafaso ya kusala mingi samu na Yehova, ke sadisa nge na kukulisa kindiku ya nge na yandi?

Sonika kilumbu yina kulongoka ya Biblia na buku yayi me manisa:

Yina nge lenda sala na bilumbu yina ke kwiza

Tanga babuku Approchez-vous de Jéhovah mpe “ Viens, suis-moi. ” Babuku yayi ke sadisa nge na kukula dyaka na kimpeve mpe na kukuma dyaka pene-pene na Tata ya nge ya mazulu mpe na Mwana ya yandi.