ບົດທີ 60
ສະໜິດກັບພະເຢໂຫວາໃຫ້ຫຼາຍຂຶ້ນຕໍ່ໆໄປ
ຈາກທີ່ເຈົ້າໄດ້ຮຽນຄຳພີໄບເບິນມາຈົນຮອດຕອນນີ້ ເຈົ້າຄືຊິໄດ້ຮຽນຫຼາຍຢ່າງກ່ຽວກັບພະເຢໂຫວາທີ່ເຮັດໃຫ້ເຈົ້າຮັກເພິ່ນຫຼາຍ ແລະອາດເຮັດໃຫ້ເຈົ້າອຸທິດຕົວໃຫ້ເພິ່ນແລະຮັບບັບເຕມາແລ້ວ. ແຕ່ຖ້າເຈົ້າຍັງບໍ່ໄດ້ເຮັດແບບນັ້ນ ເຈົ້າອາດກຳລັງຄິດວ່າຈະອຸທິດຕົວໃຫ້ພະເຢໂຫວາແລະຮັບບັບເຕມາໄວໆນີ້. ຫຼັງຈາກຮັບບັບເຕມາແລ້ວເຈົ້າກໍຍັງສະໜິດກັບເພິ່ນຫຼາຍຂຶ້ນໄດ້ອີກ. ແລະເຈົ້າຈະສາມາດສະໜິດກັບເພິ່ນໄດ້ຕະຫຼອດໄປ. ແຕ່ເຈົ້າຈະເຮັດແບບນັ້ນໄດ້ແນວໃດ?
1. ເປັນຫຍັງເຈົ້າຄວນສະໜິດກັບພະເຢໂຫວາຫຼາຍຂຶ້ນເລື້ອຍໆ?
ເຮົາຕ້ອງພະຍາຍາມສະໜິດກັບພະເຢໂຫວາຫຼາຍຂຶ້ນເລື້ອຍໆ. ເປັນຫຍັງ? “ເພື່ອພວກເຮົາຈະບໍ່ລອຍຫ່າງອອກໄປ” ຈາກເພິ່ນ. (ເຮັບເຣີ 2:1) ແລ້ວອັນໃດຈະຊ່ວຍເຮົາໃຫ້ຮັບໃຊ້ພະເຢໂຫວາຢ່າງສັດຊື່ຕໍ່ໄປໄດ້? ສິ່ງທີ່ຈະຊ່ວຍເຮົາໄດ້ກໍຄື ເຮົາຕ້ອງດຸໝັ່ນປະກາດແລະຄິດວ່າຈະເຮັດຫຍັງໄດ້ອີກເພື່ອຈະຮັບໃຊ້ພະເຈົ້າໄດ້ຫຼາຍຂຶ້ນ. (ອ່ານຟີລິບປອຍ 3:16) ເຮົາຈະມີຊີວິດທີ່ດີທີ່ສຸດຖ້າເຮົາຮັບໃຊ້ພະເຢໂຫວາ.—ຄຳເພງ 84:10
2. ເຈົ້າຈະເຮັດຫຍັງໄດ້ອີກເພື່ອຈະສະໜິດກັບພະເຢໂຫວາໃຫ້ຫຼາຍຂຶ້ນ?
ເຖິງວ່າເຈົ້າຈະຮຽນມາຮອດບົດສຸດທ້າຍຂອງປຶ້ມຫົວນີ້ແລ້ວ ແຕ່ເຈົ້າກໍຍັງຕ້ອງໃຊ້ຊີວິດໃຫ້ສົມກັບທີ່ເປັນຄລິດສະຕຽນຕໍ່ໄປເລື້ອຍໆ. ຄຳພີໄບເບິນບອກວ່າເຮົາຕ້ອງ “ປູກຝັງລັກສະນະນິດໄສໃໝ່.” (ເອເຟໂຊ 4:23, 24) ຖ້າເຈົ້າອ່ານແລະສຶກສາຄຳພີໄບເບິນຕໍ່ໄປແລະເຂົ້າຮ່ວມປະຊຸມເປັນປະຈຳ ເຈົ້າກໍຈະໄດ້ຮຽນຮູ້ແນວໃໝ່ໆກ່ຽວກັບພະເຢໂຫວາແລະໄດ້ຮູ້ຈັກຄຸນລັກສະນະຕ່າງໆຂອງເພິ່ນຫຼາຍຂຶ້ນ. ຂໍໃຫ້ເຈົ້າພະຍາຍາມຮຽນແບບຄຸນລັກສະນະຂອງພະເຢໂຫວາ. ຖ້າເຈົ້າເຫັນວ່າມີຫຍັງທີ່ເຈົ້າຕ້ອງປ່ຽນແປງເພື່ອເຮັດໃຫ້ພະເຢໂຫວາມີຄວາມສຸກກໍຂໍໃຫ້ເຈົ້າລົງມືເຮັດ.
3. ພະເຢໂຫວາຈະຊ່ວຍເຈົ້າແນວໃດແດ່?
ຄຳພີໄບເບິນບອກວ່າ: “ພະເຈົ້າ . . . ຈະຝຶກອົບຮົມພວກເຈົ້າຈົນສຳເລັດລຸລ່ວງ . . . ພະອົງຈະເຮັດໃຫ້ພວກເຈົ້າໝັ້ນຄົງ ພະອົງຈະເຮັດໃຫ້ພວກເຈົ້າເຂັ້ມແຂງແລະບໍ່ຫວັ່ນໄຫວ.” (1 ເປໂຕ 5:10) ເຮົາທຸກຄົນອາດເຈິການລໍ້ໃຈໃຫ້ເຮັດຜິດ. ແຕ່ພະເຢໂຫວາຈະຊ່ວຍໃຫ້ເຮົາເຂັ້ມແຂງແລະຮັບມືໄດ້. (ຄຳເພງ 139:23, 24) ພະເຢໂຫວາສັນຍາວ່າຈະຊ່ວຍໃຫ້ເຮົາມີຄວາມຕັ້ງໃຈແລະມີກຳລັງທີ່ຈະຮັບໃຊ້ເພິ່ນຢ່າງສັດຊື່.—ອ່ານຟີລິບປອຍ 2:13
ຮຽນຮູ້ຫຼາຍຂຶ້ນ
ເຈົ້າຈະສະໜິດກັບພະເຢໂຫວາຫຼາຍຂຶ້ນຕໍ່ໆໄປໄດ້ແນວໃດແລະເພິ່ນຈະອວຍພອນເຈົ້າແນວໃດ.
4. ລົມກັບພະເຢໂຫວາໝູ່ທີ່ດີທີ່ສຸດຂອງເຈົ້າແລະຟັງເພິ່ນສະເໝີ
ເຈົ້າໄດ້ມາເປັນໝູ່ກັບພະເຢໂຫວາຍ້ອນເຈົ້າສຶກສາຄຳພີໄບເບິນແລະອະທິດຖານເຖິງເພິ່ນເປັນປະຈຳ. ການເຮັດແບບນັ້ນຕໍ່ໄປຈະຊ່ວຍໃຫ້ເຈົ້າສະໜິດກັບເພິ່ນຫຼາຍຂຶ້ນໄດ້ແນວໃດ?
ອ່ານຄຳເພງ 62:8 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ຈາກຂໍ້ຄຳພີນີ້ ເຈົ້າຄິດວ່າເຈົ້າຄວນອະທິດຖານເຖິງພະເຢໂຫວາແບບໃດເພື່ອຈະສະໜິດກັບເພິ່ນໃຫ້ຫຼາຍຂຶ້ນ?
ອ່ານຄຳເພງ 1:2 ແລະໄຂເງື່ອນ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເຈົ້າຄວນອ່ານຄຳພີໄບເບິນແນວໃດເພື່ອຈະສະໜິດກັບພະເຢໂຫວາໃຫ້ຫຼາຍຂຶ້ນ?
ເຈົ້າຕ້ອງເຮັດຫຍັງເພື່ອຈະໄດ້ປະໂຫຍດຫຼາຍຂຶ້ນຈາກການສຶກສາສ່ວນໂຕ? ໃຫ້ເຮົາມາເບິ່ງບາງວິທີນຳກັນ ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ໃນວິດີໂອ ມີວິທີໃດແດ່ທີ່ເຈົ້າຢາກເອົາໄປໃຊ້?
-
ມີເລື່ອງຫຍັງແດ່ທີ່ເຈົ້າຢາກສຶກສາ?
5. ມີເປົ້າໝາຍໃນການຮັບໃຊ້ພະເຢໂຫວາ
ຖ້າເຮົາມີເປົ້າໝາຍໃນການຮັບໃຊ້ພະເຢໂຫວາ ເຮົາກໍແຮ່ງຈະສະໜິດກັບເພິ່ນຫຼາຍຂຶ້ນ. ເປີດວິດີໂອ ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ໃນວິດີໂອ ເມື່ອຄາເມຣອນເຮັດຕາມເປົ້າໝາຍທີ່ຈະຮັບໃຊ້ພະເຢໂຫວາຫຼາຍຂຶ້ນ ລາວໄດ້ຮັບປະໂຫຍດຫຍັງ?
ບໍ່ແມ່ນທຸກຄົນຈະຍ້າຍໄປປະກາດໃນຕ່າງປະເທດໄດ້. ແຕ່ເຮົາທຸກຄົນກໍອາດມີເປົ້າໝາຍທີ່ເຮົາສາມາດເຮັດໄດ້. ອ່ານສຸພາສິດ 21:5 ແລ້ວລົມກັນວ່າມີເປົ້າໝາຍຫຍັງແດ່ທີ່ເຈົ້າເຮັດໄດ້ . . .
-
ໃນປະຊາຄົມ.
-
ໃນວຽກປະກາດ.
ຫຼັກການໃນຂໍ້ຄຳພີນີ້ຈະຊ່ວຍໃຫ້ເຈົ້າເຮັດຕາມເປົ້າໝາຍຂອງເຈົ້າໄດ້ແນວໃດ?
ເປົ້າໝາຍບາງຢ່າງທີ່ເຈົ້າສາມາດເຮັດໄດ້
-
ປັບປຸງຄຳອະທິດຖານຂອງເຈົ້າໃຫ້ດີຂຶ້ນ.
-
ອ່ານຄຳພີໄບເບິນໃຫ້ຈົບໝົດຫົວ.
-
ຮູ້ຈັກກັບພີ່ນ້ອງທຸກຄົນໃນປະຊາຄົມຂອງເຈົ້າ.
-
ຫາຄົນທີ່ຢາກຮຽນຄຳພີໄບເບິນແລະສອນຄຳພີໄບເບິນໃຫ້ລາວ.
-
ເປັນໄພໂອເນຍສົມທົບຫຼືໄພໂອເນຍປະຈຳ.
-
ຖ້າເຈົ້າເປັນພີ່ນ້ອງຊາຍ ໃຫ້ພະຍາຍາມຫຼາຍຂຶ້ນເພື່ອຈະໄດ້ເປັນຜູ້ຊ່ວຍວຽກຮັບໃຊ້.
6. ຊີວິດທີ່ມີຄວາມສຸກຕະຫຼອດໄປ!
ອ່ານຄຳເພງ 22:26 ແລ້ວລົມກັນກ່ຽວກັບຄຳຖາມຕໍ່ໄປນີ້:
-
ເຈົ້າຈະເຮັດຫຍັງໄດ້ແດ່ເພື່ອຈະມີຊີວິດທີ່ມີຄວາມສຸກໃນຕອນນີ້ແລະຕະຫຼອດໄປ?
ສະຫຼຸບ
ສະໜິດກັບພະເຢໂຫວາໃຫ້ຫຼາຍຂຶ້ນຕໍ່ໆໄປແລະມີເປົ້າໝາຍໃນການຮັບໃຊ້ເພິ່ນ. ແລ້ວເຈົ້າກໍຈະມີຊີວິດທີ່ມີຄວາມສຸກຕະຫຼອດໄປ!
ຄຳຖາມທົບທວນ
-
ເປັນຫຍັງເຈົ້າຈຶ່ງໝັ້ນໃຈວ່າພະເຢໂຫວາຈະຊ່ວຍເຈົ້າໃຫ້ຮັບໃຊ້ເພິ່ນຢ່າງສັດຊື່ໄດ້?
-
ເຈົ້າຈະສະໜິດກັບພະເຢໂຫວາຫຼາຍຂຶ້ນໄດ້ແນວໃດ?
-
ເປັນຫຍັງການເຮັດຕາມເປົ້າໝາຍໃນການຮັບໃຊ້ພະເຢໂຫວາຈະຊ່ວຍໃຫ້ເຈົ້າສະໜິດກັບເພິ່ນຫຼາຍຂຶ້ນ?
ເບິ່ງເພີ່ມເຕີມ
ພະເຢໂຫວາໃຫ້ຄວາມສຳຄັນກັບອັນໃດຫຼາຍກວ່າກັນ ລະຫວ່າງເຫດການສຳຄັນພຽງເທື່ອດຽວທີ່ເຮົາໄດ້ສະແດງຄວາມເຊື່ອຕໍ່ເພິ່ນຫຼືການຮັບໃຊ້ເພິ່ນຢ່າງສັດຊື່ທຸກໆມື້?
ບາງຄັ້ງ ແມ່ນແຕ່ຜູ້ຮັບໃຊ້ທີ່ສັດຊື່ຂອງພະເຢໂຫວາກໍອາດຮູ້ສຶກວ່າບໍ່ຄ່ອຍມີຄວາມສຸກ. ແຕ່ອັນໃດຊ່ວຍເຂົາເຈົ້າໃຫ້ກັບມາມີຄວາມສຸກໄດ້.
ກັບມາມີຄວາມສຸກກັບການສຶກສາແລະການຄິດຕຶກຕອງອີກຄັ້ງ (5:25)
ເຈົ້າຈະຕັ້ງເປົ້າໝາຍໃນການຮັບໃຊ້ພະເຢໂຫວາແລະເຮັດຕາມເປົ້າໝາຍນັ້ນໄດ້ແນວໃດ?
ເປັນຫຍັງຈຶ່ງສຳຄັນທີ່ເຈົ້າຈະເປັນຄລິດສະຕຽນທີ່ມີຄວາມເປັນຜູ້ໃຫຍ່ ແລະເຈົ້າຈະເປັນແບບນັ້ນໄດ້ແນວໃດ?