CHILONGESA 60
Twalaho Lika Kuzovoloka
Unalinangula vyavivulu hali Yehova mumukanda uno. Vyuma unalinangula vinakulingisa uzange Yehova nakukukafwa pamo ulihane kuli ikiye nakukumbapachisa. Nge kanda ulinge ngocho kaha pamo uli nakushinganyeka kulinga ngocho mukalinwomu. Oloze kuzovoloka chove kachatela kukumina kaha hakukumbapachisako. Unahase kutwalaho lika kupandama kuli Yehova haya myaka. Mujila muka?
1. Mwomwo ika watela kutwalaho kuzamisa usepa wove naYehova?
Twatela kuzata nangolo mangana tutwaleho kuzamisa usepa wetu naYehova. Mwomwo ika? Mbimbiliya ngwayo “kuchina natuhungumuka” nakusosoloka kuli ikiye. (WavaHepeleu 2:1) Vyuma muka navitukafwa tutwaleho kuzachila Yehova nakashishi? Twatela kuzata chikuma mulimo wakwambulula nakuwana jijila jeka najitukafwa tuzachile chikuma Kalunga ketu. (Tanga Wavaka-Fwilipi 3:16.) Kuzachila Yehova hichuma chamwaza chikuma mukuyoya chamutu.—Samu 84:10.
2. Vyuma muka vyeka watela kutwalaho kulinga?
Numba tuhu unakumisa kulinangula Mbimbiliya kuzachisa uno mukanda, oloze mukuyoya chove nautwalaho lika kusolola ngwove umuka-Kulishitu. Mbimbiliya ngwayo, twatela “[kuvwala] mutu wamuhya.” (Wavaka-Efwesu 4:23, 24) Omu nautwalaho kulinangula Mazu aKalunga nakupwanga kukukunguluka chachikungulwilo, naulinangula vyuma vikwavo hali Yehova navilinga vyenyi. Tondatonda jijila jakumulondezezelamo kanawa hakusolola vilinga vyenyi. Twalaho kwalumunako vyuma vimwe mukuyoya chove mangana wivwisenga Yehova kuwaha.
3. Uno Yehova mwakukafwa ngachilihi uzovoloke?
Mbimbiliya ngwayo: “Kalunga . . . mwakamanyisa kumilongesa. Mwakamizamisa mbe, mwakamijikijisa, mwakamilingisa mukemane nangolo.” (WaPetulu 1, 5:10) Tuvosena tweji kumonanga vyeseko. Oloze Yehova eji kutuhananga ngolo jakuvifungulula. (Samu 139:23, 24) Ashika ngwenyi mwakuhana muchima wakufwila kumuzachila nakashishi nangolo jakulingamo nawa.—Tanga Wavaka-Fwilipi 2:13.
LINANGULE VYAKUJIMINYINA
Wana vyuma navikukafwa utwaleho kuzovoloka nakumona omwo mwakukisula Yehova.
4. Twalaho kushimutwilanga naSepa lyove wamwenemwene
Kulomba nakulinangula Mbimbiliya vinakukafwe upwenga usepa lyaYehova. Uno vyuma kana navikukafwa ngachilihi upandame chikuma kuli ikiye?
Tangenu Samu 62:8, nakushimutwila hachihula chino:
-
Uno unahase kwalumuna ngachilihi jila weji kulombelangamo mangana uzamise usepa wove naYehova?
Tangenu Samu 1:2, nakushimutwila hachihula chino:
-
Uno unahase kwalumuna ngachilihi jila weji kutangilangamo Mbimbiliya mangana uzamise usepa wove naYehova?
Vyuma muka watela kulinga mangana chilongesa chauka chikukafwe mukuyoya nakulivwisacho kuwaha? Hakusaka kumona vyuma vimwe, talenu VINDIYO, nakushimutwila havihula vinakavangizaho.
-
Vyuma muka vanavuluka omu muvindiyo vize unahase kuzachisa?
-
Vihande muka uli nakusaka kulinangula?
5. Litomene kulinga vyuma vyakushipilitu
Kulitomena vyakulinga mumulimo waYehova nachikukafwa utwaleho kuzovoloka. Talenu VINDIYO, nakushimutwila hachihula chinakavangizaho.
-
Kweseka navindiyo, uno kulitomena kulinga vyuma vyakushipilitu chakafwile ngachilihi Cameron?
Vatu vamwe kaveshi kuhasa kuya nakwambulwila kulifuchi lyekako. Chipwe ngocho, tuvosena tunahase kulitomena kulinga vyuma vize natuhasa kutesamo. Tangenu Vishimo 21:5, nakushinganyeka havyuma vize unahase kulitomena . . .
-
muchikungulwilo.
-
hakuzata mulimo wakwambulula.
Uno lundongi luli muvesi kana nalukukafwa ngachilihi utesemo vyuma unalitomena?
Vyuma unahase kulitomena
-
Kuwahisako jila weji kulombelangamo.
-
Kutanga Mbimbiliya nakuyikumisa.
-
Kutachikiza vatu vosena muchikungulwilo watwama.
-
Kuputuka chilongesa chaMbimbiliya namutu.
-
Kuzata upayiniya wakukafwa chipwe washimbu yosena.
-
Kuzata nangolo utengamo kupwa umuka-kuzachila, nge wapwa undumbwetu walunga.
6. Livwise kuwaha kuyoya haya myaka
Tangenu Samu 22:26, nakushimutwila hachihula chino:
-
Vyuma muka watela kulinga mangana ulivwise kuwaha kuyoya oholyapwa nahaya myaka?
CHISHINA UNALINANGULA
Twalaho kuzamisa usepa wove naYehova nakulitomena kulinga vyuma vyakushipilitu, mangana ulivwise kuwaha kuyoya haya myaka.
Kuhituluka
-
Mwomwo ika watela kufwelela ngwove Yehova mwakukafwanga umuzachile nakashishi?
-
Vyuma muka watela kulinga mangana uzamise usepa wove naYehova?
-
Uno kulitomena kulinga vyuma vyakushipilitu nachikukafwa ngachilihi uzovoloke?
WANA VYAVIVULU
Uno Yehova amona kulinga chuma chimwe chakulipwila chize chasolola nge twamwivwa woma kupwa chachilemu tahi, nyi kupwa vakushishika kuli ikiye mukuyoya chetu chosena?
Nangamba yaYehova wakushishika nahase kuhomba. Wana vyuma navimukafwa apwenga cheka wakuwahilila.
Kulinangula Mbimbiliya naKushinganyeka haVyuma Tunalinangula Cheji Kutukafwa Tuwahilile (5:25)
Vyuma muka navikukafwa ulitomene vyuma vyakushipilitu nakuvitesamo?
“Tesenungamo Vyuma vyaKushipilitu—Mutohwese Tengi Yenu” (Kaposhi Kakutalila, July 15, 2004)
Mwomwo ika chapwila chachilemu kuhya kushipilitu, kaha vyuma muka navikukafwa upwenga wakuhya?
“Pwenunga Vakuhya Kushipilitu Mwomwo ‘Likumbi lyaYehova Lyalinene Lili Hakamwihi’” (Kaposhi Kakutalila, May 15, 2009)
Pamo Nauzanga Nawa
VIHULA VEJI KWIHULANGA KUSWAKUMWE
Vinjiho jaYehova Vali Nakuzachisa Jila Muka haKunangula Vatu Mbimbiliya?
Omu mulinangula Mbimbiliya naVinjiho jaYehova, unahase kuzachisa kala Mbimbiliya unasake. Unahase kusanyikako tanga yove yosena chipwe masepa jove mangana vaminangwile hamwe.
