He Bible sawihona aṭang hian, Jehova chungchâng tam tak i zir tawh a. I thu zirte chuan amah hmangaihna nasa tak a neihtîr che avângin a hnênah inpumpêkin baptisma i chang tawh pawh a ni thei a. A nih loh leh, nakin lawkah chan i tum pawh a ni thei. Mahse, i hmasâwnna chu baptisma channaah a tâwp mai lo. Chatuanin Jehova i hnaih zêl thei a ni. Engtin nge?

1. Engvângin nge Jehova nêna in inṭhianna chu i tihngheh zêl ang?

Jehova nêna kan inṭhianna tinghet zêl tûrin kan thawkrim tûr a ni. Engvângin nge? A hnên aṭanga “kan tawlh bo” loh nân a ni. (Hebrai 2:1) Engin nge rinawm taka Jehova rawng bâwl zawm tûrin min ṭanpui thei? Thuhrilh rawngbâwlnaa buai rengna leh tam lehzuala Pathian rawng kan bâwl theih dân tûr kawng dangte zawnnain min ṭanpui thei a ni. (Philippi 3:16 chhiar rawh.) Jehova rawngbâwl hi nun kawng ṭha ber a ni si a!—Sâm 84:10.

2. Eng dangte nge i tih zawm zêl ngai?

He Bible sawihona hi a tâwp mai tawh dâwn a; mahse, Kristian i nih angin tih zawm zêl tûr i nei a ni. Bible chuan ‘mihring thara kan inthuam’ a ngaih thu a sawi a. (Ephesi 4:23, 24) Pathian Thu i zir a, kohhran inkhâwmtea i tel zawm zêl chuan, Jehova leh a miziate chungchânga thil tharte i hriat belh dâwn a ni. A miziate i nuna i entawn lehzual theih dân tûr kawngte zawng rawh. Jehova tilâwm tûrin a ṭûl ang apiangin inthlâk danglam zêl rawh.

3. Engtin nge Jehova’n hma sâwm tûrin a ṭanpui ang che?

Bible chuan: “Pathian [chuan] . . . a siam ṭha famkimin, a tinghetin, a tichak ang che u,” a ti a. (1 Petera 5:10) Kan za hian thlêmna kan tâwk a. Mahse, Jehova chuan chûngte kan do hnehna tûra kan mamawh chu min pe a ni. (Sâm 139:23, 24) Ani chuan rinawm taka a rawngbâwl duhna leh theihna pêk a tiam che a ni.—Philippi 2:13 chhiar rawh.

 ZIR BELHIN HMUH BELH RAWH

4. I Ṭhian ṭha ber chu be zêl rawh

Ṭawngṭaina leh Bible zirna hian Jehova ṭhian ni tûrin a ṭanpui che a. Engtin nge hêng thiltihte hian amah hnaih lehzual tûrin a ṭanpui theih che?

Sâm 62:8 chhiarin, he zawhna hi sawiho vang che u:

• Jehova nêna in inṭhianna tinghet tûrin engtin nge i ṭawngṭaina i tihhmasâwn theih?

Sâm 1:2 chhiarin, he zawhna hi sawiho vang che u:

• Jehova nêna in inṭhianna tinghet tûrin engtin nge i Bible chhiarna i tihhmasâwn theih?

Engtin nge mimala i inzirna chu awmze nei lehzual i nihtîr theih? A tih dân ṭhenkhat hriat nân, VIDEO chu chhuah la, a hnuaia zawhnate hi sawiho vang che u.

• Video-a eng rawtnate nge i nunpui theih?

• Eng thute nge zir chian i duh?

 KHAIKHAWMNA

Jehova nêna in inṭhianna tinghet zêlin thlarau lam thiltumte insiam rawh. Tichuan, chatuanin i hlim thei ang!

Ennawnna

• Engvângin nge Jehova’n rinawm taka a rawngbâwl tûrin a ṭanpui ang che tih i rin theih?

• Engtin nge Jehova nêna in inṭhianna i tihngheh theih?

• Engtin nge thlarau lam thiltumte chuan hma sâwn tûrin a ṭanpui theih che?