Amîrî esenupaꞌpî mararî pra Jeová pî, seeni esenupantoꞌ Paapa Maimu yapai. Tamîꞌnawîrî îꞌ pî amîrî esenupaꞌpî manni, mîrîrîya aweꞌsaꞌnamatoꞌ kupîꞌpî kureꞌne Jeová pî. Amîrî enaꞌpî Jeová poitîrî pe moropai amîrî esenpatakonaꞌpî taise. Maasa mîrîrî konekasaꞌ pra wanî ya, amîrî esenumenka taise mîrîrî kuꞌtoꞌpe amenrî. Tîîse esenpatakona neken eꞌpai awanî? Kanne. Jeová yonpa pe koꞌmannî eꞌpai awanî meruntî ke inîꞌ panpîꞌ. Oꞌnon yeꞌka pe?

1. Îꞌ waniꞌ awanî yeꞌnen Jeová yonpa pe koꞌmannî eꞌpai awanî meruntî ke inîꞌ panpîꞌ?

Saꞌme wanî taise Jeová yonpa pe awanîpa inîꞌ panpîꞌ. Tîîse mîrîrî kupî eꞌpai uurînîkon wanî teeseꞌkanunkai. Îꞌ waniꞌ awanî yeꞌnen? Jeová piapai “atariman namai esenumenkanpaiꞌnîkon.” (Hebreus 2:1) Îꞌ ya uurînîkon pîikaꞌtî eꞌpainon Jeová maimu yawîrî koꞌmannîtoꞌpe? Paapa Maimu ekaremekî eꞌpai uurînîkon wanî tîkoꞌnarî moropai tiaron esenyakaꞌmantoꞌkon kupî inîꞌ panpîꞌ Jeová tonpe. (Eraꞌmakî Filipenses 3:16.) Jeová poitîrî pe eꞌnî, mîrîrî wanî morî pe puꞌkuru, îꞌ rî yentai! — Salmo 84:10.

2. Îꞌ koneka pî akoꞌmannî inîꞌ panpîꞌ?

Seeni esenupantoꞌ atareꞌtîka pî man, tîîse Jeová poitîrî pe aweꞌtoꞌ esippiaꞌtî mîrîrî. Paapa Maimuya taa pî man: “Amenan aponkon yekaꞌmayaꞌnîkon warantî amenan ayeserukon ton yekaꞌmatî ayewankon yaꞌ manniꞌ Paapa yeseru warantî.” (Efésios 4:23, 24) Mîrîrî kuꞌtoꞌpe, Paapa Maimu pî esenupa eꞌpai awanî moropai Emurukuntîntoꞌ Pataꞌseꞌ ya attî eꞌpai awanî. Amenankon pî uurînîkon esenupa koꞌmannîpî ya Jeová pî moropai iteseru pî, moropai uurînîkon yeseru moꞌtanîsaꞌ uurînîkonya ya, Jeová atausinpa mîrîrî pî.

3. Oꞌnon yeꞌka pe Jeováya amîrî pîikaꞌtî itonpa pe awanîpa meruntî ke?

Paapa Maimuya taa pî man Jeová pî: “Ameruntîrikon tîrîiya meruntî ke awanîkonpa, innape tîkupî pîꞌ aakoꞌmamîkonpa.” (1 Pedro 5:10) Tamîꞌnawîronkon esuwaꞌka saꞌmankon pî. Tîîse Jeováya pîikaꞌtîntoꞌ tîrî uurînîkon pia imaimu yawîrî uurînîkon koꞌmantoꞌpe. (Salmo 139:23, 24) Taꞌpîiya uurînîkon pîikaꞌtîiya ituꞌse tîweꞌtoꞌ ankuꞌpai eꞌnîtoꞌpe moropai kuꞌtoꞌpe. — Eramakî Filipenses 2:13.

 ESENUPAKÎ INÎꞌ PANPÎꞌ

4. Eseurîman pî akoꞌmankî awanîyakon pe puꞌkuru tîweꞌsen yarakkîrî

Esenupantoꞌ Paapa Maimu pî moropai epîremantoꞌya apîikaꞌtîꞌpî Jeová yonpa pe awanîpa. Tîîse oꞌnon yeꞌka pe mîrîrîkonya apîikaꞌtî eꞌpainon inîꞌ panpîꞌ erepantoꞌpe Paapa pia?

Eraꞌmatî Salmo 62:8. Tarîpai seeni itoꞌkoꞌ manni pî eseurîmatî:

• Aminke pra Paapa pia erepantoꞌpe, oꞌnon yeꞌka pe amîrî epîrema eꞌpainon morî pe panpîꞌ?

Eraꞌmatî Salmo 1:2. Tarîpai seeni itoꞌkoꞌ manni pî eseurîmatî:

• Aminke pra Paapa pia erepantoꞌpe, oꞌnon yeꞌka pe Paapa Maimu erenkaya eꞌpainon morî pe panpîꞌ?

Oꞌnon yeꞌka pe Paapa Maimu pî amîrî esenupa tiwinsarî siꞌma morî pe panpîꞌ? Epuꞌtoꞌpe inîꞌ panpîꞌ mîrîrî pîꞌ, PANTON eraꞌmatî. Mîrîrî tîpo seeni itoꞌkoꞌ manni pî eseurîmatî:

• Îꞌ eraꞌmasaꞌya manni panton ya, mîrîrî panpe ankonekapai awanî?

• Îꞌ pîꞌ esenupapai nan?

 Îꞌ PÎ ESENUPA PÎ NAN?

Jeová yonpa pe akoꞌmankî meruntî ke moropai esenumenkakî oꞌnon yeꞌka pe amîrî esenyakaꞌma eꞌpainon inîꞌ panpîꞌ Jeová tonpe. Mîrîrî kuꞌsaꞌya ya, taatausinpai aakoꞌmamî eꞌpainon ipatîkarî!

Enpanatapaiꞌnîkon

• Îꞌ waniꞌ awanî yeꞌnen inna taaya Jeováya apîikaꞌtî imaimu yawîrî awanîpa?

• Oꞌnon yeꞌka pe Jeová yonpa pe aakoꞌmamî eꞌpainon meruntî ke inîꞌ panpîꞌ?

• Esenumenkakî oꞌnon yeꞌka pe eesenyakaꞌma eꞌpainon Jeová tonpe inîꞌ panpîꞌ. Oꞌnon yeꞌka pe mîrîrîya apîikaꞌtî eꞌpainon aminke pra erepantoꞌpe Jeová pia?