KĨTHOOMO KĨA 60
Ĩta na Mbere Gũkũria Ũcoore Bwaku Amwe na Jehova
Kĩrĩ iuku rĩrĩ, nwiritanĩte mantũ jamaingĩ jegie Jehova. Mantũ jarĩa wiritanĩte nĩjatũmĩte wamwenda mono, na kinya wairita kĩrĩwe na wabatithua. Na kinya kethĩra ũtĩrathithia ũu, mbuga nũkũthũgaania kũjũkia ĩtagaaria rĩu ĩgiita rĩtĩ kũraaja. Ĩndĩ wĩti na mbere bwaku bũtĩkinyaga mũthia rĩrĩa wabatithua. Womba gwĩta na mbere kũthengeera Jehova kenya na kenya. Nĩatĩa ũũmba kũthithia ũu?
1. Nĩkĩ ũbuĩrĩte gwĩta na mbere gwĩkĩra inya ũcoore bwaku amwe na Jehova?
No mwanka tũciũmie mono nĩkenda twĩta na mbere gwĩkĩra ũcoore bwetũ inya amwe na Jehova. Nĩkĩ? Nĩkenda ‘tutikeje gwatia’ na tuuma kĩrĩwe kaora kaora. (Ahibirania 2:1) Nĩmbi biũmba gũtũthethia gwĩta na mbere gũtumĩkĩra Jehova na njĩra ya wĩtĩkĩkua? Nĩkwĩthĩrwa na jamaingĩ jakũthithia kĩrĩ ngũgĩ ya gũtũmĩĩria, na gũcwaa njĩra ingĩ cia gũtumĩkĩra Jehova bwega nkũrũki. (Thooma Afilipi 3:16.) Gũtumĩkĩra Jehova nĩyo njĩra ĩrĩa njega nkũrũki ya mũtũũrĩre!—Zaburi 84:10.
2. Nĩ ũntũ bũngĩ bũrĩkũ ũbuĩrĩte gwĩta na mbere kũthithia?
Kinya kethĩra ũgũkinya mũthia jwa kwiritana ithoomo bibi bia Bibiria, ũtũũro bwaku ũrĩ Mũkristũ bũgeeta na mbere. Bibiria yugaga nĩtũkũbatara ‘gwikundika mwiri jumweru.’ (Aefeso 4:23, 24) O ũrĩa ũgeta na mbere kwiritana Rũteto rwa Mũrungu na gwĩta mĩcemanione ya kĩũthũrano, ũkairitana mantũ jamaingĩ jamerũ jegie Jehova na nkuma ciawe. Cwaa njĩra irĩa ũũmba kwigerekania na nkuma iu ciawe bwega nkũrũki ũtũũrone bwaku. Ĩta na mbere kũthithia mogarũrũku jarĩa ũkũbatara nĩkenda ũgwĩria Jehova.
3. Nĩatĩa Jehova agagũtethia kũthithia wĩti na mbere?
Bibiria yugaga: “Murungu . . . akabwethia baboojuru, na abuumiirithie, ningi akabwongeera inya bwathiria kugerua kagiita gagakai.” (1 Petero 5:10) Twinthe nĩtũgwatagwa nĩ magerio. Ĩndĩ Jehova natwejaga birĩa tũkũbatara nĩkenda tũũmba kũrwa najo. (Zaburi 139:23, 24) Natwete wĩrane atĩ agatwaa wendi na ũũmbi bwa gwĩta na mbere kũmũtumĩkĩra na njĩra ya wĩtĩkĩkua.—Thooma Afilipi 2:13.
ĨNJA NKŨRŨKI
Iritane ũrĩa ũũmba gwĩta na mbere kũthengeera Jehova na wone ũrĩa agakũtharima.
4. Kara ũkĩaranagĩria na Mũcoore waaku ũrĩa mũnene
Kũromba na kwiritana Bibiria nĩbigũtetheetie kwaa mũcoore wa Jehova. Nĩatĩa mantũ jau joomba gũgũtetheeria ũmũkuĩĩria kinya nkũrũki?
Thooma Zaburi 62:8, rĩu bwarĩĩrie kĩũria gĩkĩ:
-
Nĩkenda ũũmba gwĩkĩra ũcoore bwaku na Jehova inya, nĩatĩa ũũmba kwagĩrithia nkũrũki maromba jaaku?
Thooma Zaburi 1:2, rĩu bwarĩĩrie kĩũria gĩkĩ:
-
Nĩkenda wĩkĩra inya ũcoore bwaku amwe na Jehova, nĩatĩa ũũmba kwagĩrithia ũthoomi bwaku bwa Bibiria?
Nĩatĩa ũũmba kũthithia nĩkenda ũgunĩka nkũrũki rĩrĩa ũkwiritana Bibiria gwe wengwa? Kenda wona mantũ jamwe jarĩa joomba gũgũtethia, tega VIDIO, rĩu bwarĩĩrie biũria bibi bithingatĩte.
-
Nĩ mendekithia jarĩkũ ũũmba gũtumĩra kĩrĩ jarĩa jaejani vidione?
-
Nĩ mantũ jarĩkũ ũrĩngĩenda kwiritana?
5. Ciĩkĩre mĩoroto ya gĩkĩrundu
Kwĩthĩrwa na mĩoroto kĩrĩ ũtungatĩri bwa Jehova kũgagũtethia kũthithia wĩti na mbere. Tega VIDIO, rĩu bwarĩĩrie kĩũria gĩkĩ kĩthingatĩte.
-
Kĩrĩ vidio, nĩatĩa Cameron aagunĩkĩre nĩ ũntũ bwa gũciĩkĩra mĩoroto ya gĩkĩrundu?
Tĩ antũ bonthe bomba kũthamĩra nthĩ ingĩ gũtũmĩĩria. Ĩndĩ, twinthe no tũciĩkĩre mĩoroto ĩrĩa tũũmba gũkinyĩra. Thooma Njuno 21:5, rĩu wone nĩ mĩoroto ĩrĩku ũũmba gũciĩkĩra . . .
-
kĩũthũranone.
-
ũtungatĩrine.
Nĩatĩa ũritani bũrĩa bũrĩ kĩrĩ mũstaarĩ jũu bũũmba gũgũtetheeria gũkinyĩra mĩoroto yaaku?
Mĩoroto ĩrĩa ũũmba gũciĩkĩra
-
Agĩrithia maromba jaaku.
-
Thooma Bibiria yonthe.
-
Geria kũmenya o muntũ kĩũthũrano kĩenu.
-
Ambĩrĩria kũritana muntũ Bibiria.
-
Tumĩkĩra ũrĩ painia mũtetheeria kana wa wĩthĩre.
-
Kethĩra ũrĩ mũtaana-wa-baaba, ciũmie gũkinyĩra kaanya ga kwaa nthũmba ya ũtungatĩri.
6. Gwĩrĩrua ũtũũro kenya na kenya!
Thooma Zaburi 22:26, rĩu bwarĩĩrie kĩũria gĩkĩ:
-
Nĩatĩa ũũmba kũthithia nĩkenda ũgwĩrĩrua ũtũũro nandĩ na kenya na kenya?
NA NJĨRA ĨNKUĨ
Ĩta na mbere gwĩkĩra inya ũcoore bwaku amwe na Jehova, na gũciĩkĩra mĩoroto ya gĩkĩrundu. Rĩu ũkagwĩrĩrua ũtũũro kenya na kenya!
Gũcookera
-
Nĩmbi biũmba gũtũma wĩthĩrwa na mma atĩ Jehova agagũtethia ũmũtumĩkĩra na njĩra ya wĩtĩkua?
-
Nĩatĩa ũũmba gwĩkĩra inya ũcoore bwaku amwe na Jehova?
-
Nĩatĩa mĩoroto ya gĩkĩrundu yũũmba gũgũtethia gwĩta na mbere kũthengeera Jehova?
CŨNKŨŨNA
Nĩmbi Jehova onaga birĩ bia gĩtũmi nkũrũki, nĩ ĩthithia rĩmwe rĩĩnene rĩa kwirita kĩrĩwe, kana nĩ kũmũtumĩkĩra ũrĩ mwĩtĩkĩkua ũtũũro bwaku bunthe?
Kinya mũtumĩkĩri wa Jehova ũrĩa mwĩtĩkua, magiita jamwe kũgwĩrua kwawe no kũũre. Ona ũrĩa ũũmba kwona kũgwĩrua kaĩrĩ.
Ona Kũgwĩrua Kaĩrĩ Gũkũrũkĩĩra Kwiritana na Kũthũgaanĩria Jarĩa Ũkwiritana (5:25)
Nĩatĩa ũũmba gũciĩkĩra mĩoroto ya gĩkĩrundu na ũkamĩkinyĩra?
“Tumĩra Mĩoroto ya Gĩkĩrundu Gũkumithia Mũũmbi Waaku” (Mnara wa Mlinzi, Julaĩ 15, 2004)
Nĩkĩ kũthithia wĩti na mbere gĩkĩrundu bũrĩ ũntũ bwa gĩtũmi, na nĩatĩa ũũmba kũthithia ũu?
“Ciũmie Gũkũra Gĩkĩrundu—Ntukũ Ĩrĩa Nene ya Jehova Nĩthengeerete” (Mnara wa Mlinzi, Mĩi 15, 2009)
