Ukati mwaasomihiyeenyu ila ilivurwiila, nyuuva nheetthuca myaha cinci ca Yehova. Ni citthu cotheene ciitthucileenyu cihoncerera unfenta winyu uyova. Atthunaka nyuuva nhonvaherera ukumiinyu Yehova ni nhopattisiya. Wakhala wiira khannaaya upanka iyo, pooti ukhalaka wiira nyuuva nneera moopuwelaka upanka iyo itthwiiyo mwamphiyaaruni. Masi upattisiya khuntosa. Nyuuva nhaana nhihiyereraka ulipihaca upatthani urineenyu ni Yehova. Masi manannani nnolamuliyeenyu upanka iyo itthwiiyo?

1. Kontha isiyani nyuuva nnolamuliyeenyu uhihiyerera ulipihaca upatthani urineenyu ni Yehova?

Nhaana mwiikurumicaka wiira nhihiyerere ulipihaca upatthani urineenyu ni Yehova. Kontha isiyani? “Wiira nhivirikanane iphiro,” awula wiira nhihiye unswalela Yehova. (Maberewu 2:1) Isiyani inhala wuukaviherani uhihiyerera uswalela Yehova? Nhaana mwiikurumicaka ulalyeera ni upanka citthu cikhwaawe wiira nkhitiri unvarela nteko cinene Yehova. (Nsome Afilipo 3:16.) Unvarela nteko Yehova phi itthu yofayita cinene ninlamuliyeehu upanka muukumini wihu!—Isaalimu 84:10.

2. Isiyani-tho inlamuliyeenyu uhihiyerera upanka?

Hataa ukhalaka wiira usomihiya winyu Ibiilblya uhophiya umwiisooni, unswalela winyu Yehova unawiira wancera. Ibiiblya ineera wiira hiivano nihaana ‘niwaraka meettelo ophiyaaru,’ awula nihaana niikurumicaka utakiha makhalelo arinaawe Yehova. (Efesu 4:23, 24) Wiira nkhitiri upanka iyo itthwiiyo, nyuuva nhaana nhihiyereraka usoma Ibiiblya ni urwaa umikutthaanoni. Naahihiyerereke wiitthuca citthu cikhwaawe ca Yehova ni makhalelwaawe, ciicammo napankaka marukunuso muukumini wihu, ninaahala waatteeliha nrima Apaapeehu, Yehova.

3. Manannani Yehova cinhalaawe wuukaviherani uhihiyerera ukhalana upatthani nuuyova?

Ibiiblya ineera: “Nluku naahala umalihera ufunttiya winyu. Uyo naahala wuulipihani, naahala wuuvahani ikuru, ni naahala uweesani wanipuroni woolipa.” (1 Peturu 5:10) Otheene cihu ninaattehiyaka, masi Yehova naanivaha citthu cimpheeleehu wiira nihihiyerere umwiiwelela. (Isaalimu 139:23, 24) Uyo naakhuluveliha uwiirihani nyuuva upheela unswalela ni ukhalana ikuru wiira nhihiyerere umwiiwelela.—Nsome Afilipo 2:13.

 MUNCERERE WIITTHUCA WINYU

4. Nhihiye umuulumana mpatthaniinyu muulupale

Ulompa ni usoma Ibiiblya uhookaviherani nyuuva ukhala mpatthani a Yehova. Masi manannani nnyo citthunnyo cinhalaaya wuukaviherani utepa umpatthanana uyova?

Nsome Isaalimu 62:8, ni mwamalihaka usoma, moopele mwaha nna nikohonna:

• Wiira nlipihace upatthani urineenyu ni Yehova, isiyani nnolamuliyeenyu urehererya nhina mananna nnolompeenyu?

Nsome Isaalimu 1:2 ni niwehero naya. Mwamalihaka usoma, moopele mwaha nna nikohonna:

• Wiira nlipihace upatthani urineenyu ni Yehova, manannani cinlamuliyeenyu urehererya inanna cinsomeenyu Ibiiblya?

Isiyani nnolamuliyeenyu upanka wiira mphwanyere ifayita usoma winyu Ibiiblya wo veekha? Wiira ncuwele citthu cooreera upanka, moone IVIDIYU, ni mwamalihaka woona, moopele mwaha ala makohwaala:

• Isiyani ihimiye nvidiyuni yuucivenleni upanka?

• Mwahani woocivenleni usoma?

 UTHIKILELA

Nhihiyerere wiikurumica ulipihaca upatthani urineenyu ni Yehova ni ukhalana coolakela co mminepani. Mwapankaka commo, nyuuva nnahala ukhala ootteeliya mpanka!

Wuupuwela

• Kontha isiyani nnolamuliyeenyu ukupaleela wiira, Yehova naahala wuukavihera ukhitiri uhihiyerera umwiiwelela?

• Manannani cinlamuliyeenyu ulipihaca upatthani urineenyu ni Yehova?

• Kontha isiyani wiihelela mipika co mminepani unaahala ulipihaca upatthaniinyu ni Yehova?