ISAMBILILO 60

Mwatwalilila Ukukomya Ucuza Winu na Yeova

LIZYINI

Kufuma pano mwatandikiile ukusambilila Baibo, imusambilila ivingi sana pali Yeova. Vintu vino imusambilila vyativilenga mumutemwe sana icakuti mwaipeela kuli aliwe nu kubatiziwa. Ndi cakuti mutatala mwaipeela nu kubatiziwa, limwi mukwelenganya ukucita vivyo. Nomba ndi cakuti mwabatiziwa mutalinzile ukuleka ukukomya ucuza winu na Yeova. Mungatwalilila ukukomya ucuza winu na Yeova amanda pe. Mungacita uli vivyo?

1. U mulandu ci uno mulinzile ukutwalilila ukukomya ucuza winu na Yeova?

Tulinzile ukuombesya pakuti tutwalilile ukukomya ucuza witu na Yeova. U mulandu ci? Nga tukukomya ucuza witu na Yeova cilalenga “tutafuma umu utailo.” (Aebele 2:1) I cani icingatwazwa ukutwalilila ukuombela Yeova na ucisinka? Tungatwalilila ukuya acincile mu mulimo wa kusimikila nu kulola inzila zyuze zino tungaombelamo sana Leza. (Belengini Filipi 3:16.) Kuombela Yeova ali cintu cisuma sana cino tungacita umu umi!—Masamu 84:10.

2. I vyani vyuze vino mulinzile ukutwalilila ukucita?

Nanti cakuti imwamala ukusambilila, mumatwalilila ukuya aina Klistu. Baibo ikalanda ukuti tulinzile “ukuzwala untu upya.” (Efeso 4:23, 24) Lino mukutwalilila ukuisambilizya Izwi lyakwe Leza nu kuzanwa umu kulongana, mulasambilila ivintu ivipya pali Yeova na pa miyele yakwe. Mwalola inzila zimwi zino mungamukolanyizizyamo sana. Mwatwalilila ukusenuka pakuti mwazanzya Yeova.

3. Uzye Yeova alamwazwa uli ukulunduluka?

Baibo ikati: “Leza . . . alamalilila ukumusambilizya. Alakomya utailo winu, alamupeela maka, nupya alamutungilila.” (1 Petulo 5:10) Swensi kwene tukatunkwa. Nomba Yeova akatupeela vino tukalondekwa pakuti tucimvye matunko. (Masamu 139:23, 24) Watulaya ukuti alatupeela amaka nu mwenzo wa kulondesya ukumuombela na ucisinka.—Belengini Filipi 2:13.

LONDELEZYINI NA VYUZE

Sambililini vino mungacita pakuti mutwalilile ukulunduluka mulole na vino Yeova alamupaala.

4. Twalililini ukulanzyanya na cuza winu

Ipepo nu kusambilila Baibo iivimwazwa ukuya cuza wakwe Yeova. Uzye ukucita vii kungamwazwa uli ukupalama kuli Yeova?

Belengini Masamu 62:8, alino mulanzyanye iuzyo lii:

Mungacita uli pakuti muzifyeko mapepo yano mukapepa pakuti mukomye ucuza winu na Yeova?

Belengini Masamu 1:2, alino mulanzyanye iuzyo lii:

Mungacita uli pakuti muzifyeko vino mukabelenga Baibo pakuti mukomye ucuza winu na Yeova?

Mungacita uli pakuti mwaipakizya ukuisambilizya Baibo? Pakuti mumanye vimwi vino mungacita, tambini VIDYO, alino mulanzyanye mauzyo atiyalondelelapo.

VIDYO: Zifiniko Vino Mukaisambilizya Baibo (5:22)

I vyani vimwi vino imuvwa muli vidyo vino mungatemwa ukuomvya lino mukuisambilizya Baibo?
I lyasi ci lino mungatemwa ukusambililapo?

5. Mwaimika mauyo muli vyakwe Leza

Ukwimika mauyo lino mukuombela Yeova kulamwazwa kutwalilila ukulunduluka. Tambini VIDYO, alino mulanzyanye iuzyo ilyatililondelelapo.

VIDYO: Umi Usuma Cuze (3:31)

Muli vidyo, uzye ukwimika mauyo muli vyakwe Leza kwali kwazwa uli nkazi Cameron?

Asi yonsi aangaya umu kuomba umulimo wa kusimikila uku mpanga yuze. Nomba, swensi kwene tungimika mauyo yano tungakwanisya ukufikilizya. Belengini Mapinda 21:5, alino mulole mauyo yano mungatemwa ukwimika . . .

umu cilongano.
umu mulimo wa kusimikila.

Uzye icisinte icili mu cikomo cii cingamwazwa uli ukufikilizya mauyo yano mwimika?

Mauyo yano mungimika nu kwezyako ukufikilizya

Kuzifya mapepo inu.
Kubelenga Baibo wensi.
Kwezya ukumanya yonsi mu cilongano.
Kutandika isambililo ilya Baibo.
Kuombako upainiya uwa nsita inono nanti uwa nsita yonsi.
Ndi cakuti mwemwe ina, mungaombesya pakuti mufikepo ukuya aomvi aakatumikila.

6. Mungaya ni nsansa manda pe!

Belengini Masamu 22:26, alino mulanzyanye iuzyo lii:

Mungacita uli pakuti mwaipakizya umi ndakai alino nu ku nkoleelo?

VINO TWASAMBILILA

Twalililini ukukomya ucuza winu na Yeova nu kwimika mauyo muli vyakwe Leza. Nga mwacita vivyo, mulaipakizya umi amanda pe!

I vyani vino mwasambilila?

U mulandu ci uno mungasininkizizya ukuti Yeova alamwazwa ukumuombela na ucisinka?
Mungacita uli pakuti mukomye ucuza winu na Yeova?
Uzye ukwimika mauyo muli vyakwe Leza kungamwazwa uli ukulunduluka?

Wanda wa kumalila ukusambilila:

Mauyo Yano Mungimika nu Kufikilizya Umwaka Ukwiza

Belengini ibuku lyakuti Palamini Kuli Yeova ni lyakuti “Izini Muye Alondezi Yane.” Mabuku yaa yalamwazwa ukutwalilila ukulunduluka nu kupalama sana kuli Tata winu uwa kwi yulu alino nu Mwanakwe.

LONDELEZYINI

I cili kwi pali vii viili cino Yeova akatemwa: ukucita icintu cimwi cikulu icakulanga ukuti ali wino tukaombela sile nanti ukumuombela na ucisinka cila wanda umi witu onsi?

Mungaya Acisinka Wakwe Abulahamu (9:20)