Naha Baibil stadika piua aiska ra, man Jehova dukiara diara ailal lan takram sa. Bara bahara tingki, Gâd ra lamtwanka lâka ba tara pâwan, baha mita ban kra pat rayakam yabram sa, bara tahbi sin mai daukan sa. Kuna kau daukras sma kaka, lukisma kaia sa, mahka baha mina lulkanka ba yabaia. Bamna tahbi mai daukan kabia ba ningkara, bîla kaikisa ban spirit lainka ra pâwi kama. Baku lika Jehova wal pâmnika lâka ba ban kaia ra ban karna dauki kama. Kaisa laki kaikaia baha ba nahki daukisa.

1. ¿Dîa muni Jehova wal pâmnika lâka brisma ba ban karna dauki kaia nit sa?

Jehova wal wan pânika lâka ba karna daukaia dukiara, yawan karna wark takaia sa. ¿Dîa muni? Baku tnatka ra “yawan yabal ba wina tnaya ra tawbia apia” bara Jehova wina laihura takbia apia (Hibru Nani 2:1). ¿Dîa hilp wan munbia, Jehova warkka ban dauki kaia? Piua bani smalki kaia, bara Gâd warkka kau daukaia dukiara tnatka nani pliki kaia (Pilipai 3:16 aisi kaikma). ¡Wan rayaka ra diara wala kau pain ba âpu sa, Jehova warkka daukaia ba wal! (Lawana Nani 84:10).

2. ¿Dîa ban dauki kaia sma?

Baibil stadikam ba tnata alkuya sa, kuna kristian ramyaka ba na minitka ra tâ krikisa. Baibil bila kristian bani nit sa “prâka [raya] ba ni dimi banhwaia” (Epesus 4:23, 24). Gâd bîla ban stadi taki, kangrigisan aidrubanka nani ra ban wisma kaka, Jehova bara ai daukanka painkira nani ba kau sitnika kat lan takma. Tnatka nani pliks, ai daukanka painkira nani tnata luki dauki kaia. Jehova kupia lilia daukaia dukiara ban trai kaiki bas, nit sa kaka chens taki kaia.

3. ¿Spirit lainka ra pâwi kaia Jehova nahki hilp mai munbia?

Baibil wisa: Gâd witin pali mita tnata kat mai smalkbia, bara “Gâd mita man nani ba aihwakira, dutki pali, karna kasak pali mai daukbia” (1 Pita 5:10). Yawan sut ra traika kaikanka nani balisa, kuna Jehova mita bapi buaia karnika wankisa (Lawana Nani 139:23, 24). Baku sin witin pramis munisa, ai warkka dauki kaia dukiara brinka bara karnika maikbia (Pilipai 2:13 aisi kaikma).

 KAU LAN TAKS

4. Pâmnika kau painkira Jehova wal ban aisi bas

Pura sunaia bara Baibil stadi takaia ba, hilp mai munan Jehova wal pânika takaia. ¿Naha dukia nani ba kau Jehova lamara kaia hilp mai munan ki? ¿Dîa tnatka ra?

Lawana Nani 62:8 aisi kaikma, bara naha dukiara aisi banhma:

• Jehova wal pâmnika lâka ba pakaia dukiara kau pain puram sunaia sma. ¿Nahki daukma ki?

Lawana Nani 1:2 aisi kaikma, bara naha dukiara aisi banhma:

• Jehova wal pâmnika lâka ba pakaia dukiara, kau Baibil stadi takaia sma, ¿Nahki daukma ki?

¿Yakan stadikam ba wina, nahki yamnika sâkma ki? Lukanka nani kum kum sakaia dukiara, LILKA ba kaikma, ningkara naha dukiara aisi banhma:

• ¿Lilkika ra lukanka nani ba nahki praptis munma?

• ¿Ani smalkanka nani dukiara stadi takaia want sma?

 DÎA LAN TAKRAM

Jehova wal pâmnika lâka ba ban karna dauki bas, bara spirit warkka nani alkaia trai muni bas. ¡Baku lika, raya kaia liliaka ba ban kaia ra brima!

Wan kupia krawaia

• ¿Dîa muni kasak lukaia sip sma, ai warkka dauki kaia Jehova hilp mai munbia?

• ¿Man dîa daukaia sma, Jehova wal pâmnika lâka ba kau karna daukaia dukiara?

• ¿Spirit lainka ra wark nani alkaia ba dîa muni nit pali sa kau pâwaia dukiara?