Omuhudheraga Bibliya ni livuru nna, ohuhudhera dhithu dhowinjhiva wodhela Yehova. Dhithu dhatedhene ohudheriwe dhihenjhedhedha odhivela wawo nuliye. Podi wera ohupeleka egumawo wa Yehova ni ohubaddiziwa. Mbwenye akala naari podi wihina onna wubuwela werana thalo ndho mohulegela. Mbwenye obaddiziwa kahi omakuthulo wa dhithu dhatedhene. Enohoweleya olibihagave wandana wawo ni Yehova malabo amatene. Ki nimakalelo baani?

1. Mwahaya bwaddi ekala yapama odidelave olibiha wandana wehu ni Yehova?

Nnohowela wilibihera wenjhedhedha wandana wehu ni Yehova. Mwahaya bwaddi? ‘Wihina nihipupuruwe,’ obe, wihina nihimulapele oliye. (Hebreus 2:1) Enaanikavihere ddi odhowave omulabela Yehova nuroromeleya? Enohoweleya wilibihera mmabasani oolaleya ni osayela makalelo owenjhedhedha mabasa ehu a Yehova. (Omwileri Filipenses 3:16.) Omulabela Yehova yothoma yapama yofwanelela mwigumini mwehu! — Salmo 84:10.

2. Ki dhithu dhimodha onahoweliwe werana ddiniya?

Naarive ogamarihe omuhudhera Bibliya ni livuru nna, onna obajhawene omulabela Yehova. Bibliya anihina nnohowela ‘owara emuthu exa,’ obe, nnohowela otajhiha dhikalelo dha Yehova ofiyedha vinandelihu. (Efésios 4:23, 24) Wihina nande, nnohowela omuhudhera Bibliya nudhowa omutugumanoni. Nadidela ohudhera dhithu dhixa wodhela Yehova vamodha ni dhikalelo dhaye, teto nasaddula egumi yehu, nnere ohagalasa murima wa Babihu, Yehova.

3. Yehova anukavihere aavi wihina wandana weenyu okaleve wooliba?

Bibliya anihina: ‘Mulugu . . . anere wakwanihedha oxagihiwa weenyu. Oliye anere wuvahani kopolo, oliba murima, ni anere wukaviherani wimela txithi.’ (1 Pedro 5:10) Atene iyo nnofwanyiwa dhoweha, mbwenye Yehova anere onivaha kopolo nnahowelihu wihina nikaleve oororomeleya woliye. (Salmos 139:23, 24) Oliye anopaganya wuvaha efunelo ni kopolo dhomulabela nuroromeleya. — Omwileri Filipenses 2:13.

 OHUDHERE DHITHU DHIMODHA

4. Kuhiye othapanya ni mukwawo avanikutani

Olobela ni omwileri Bibliya winere wukavihera wandana ni Yehova. Ki dhithu ndho dhinukavihere aavi onfiyedhagave oliye?

Mmwileri Salmos 62:8, mwamala muthapanyedhe nikoho nnaharela:

• Wihina olibiheve wandana wawo ni Yehova, onawomihedhe aavi malobelo awo?

Mmwileri Salmos 1:2 vamodha nnota, mwamala muthapanyedhe nikoho nnaharela:

• Wihina olibiheve wandana wawo ni Yehova, onawomihedhe aavi makalelo awo oomwileri Bibliya?

Onawomihedhe aavi makalelo awo a ohudhera wavayeka? Wegi onone dhithu dhimodha, musugwe VIDIYU, mwamala muthapanyedhe nikoho nnaharela.

• Dhithu baani dhiwogiwe nvidiyuni onafuniwe oparihedha mabasa?

• Muselu baani onafuniwe ohudhera?

 OVIRISEDHA

Odidele olibiha wandana wawo ni Yehova ni okanna dholuba dhomuzimuni. Werana ndo onere ohagalala malabo amatene!

Ogwaddela

• Enuvaha ebaribari wihina Yehova anere wukavihera omulabela nuroromeleya ddi?

• Onande aavi olibiha wandana wawo ni Yehova?

• Okanna dholuba dhomuzimuni winuukavihere aavi olibiha wandana wawo ni Yehova?