LECCIÓN 60
Kuaʼnuka xíʼin tu̱ʼun Ndióxi̱
Ndiʼi tiempo ña̱ sa̱kuaʼún xa̱ʼa̱ Biblia xíʼin libro yóʼo ku̱a̱ʼání ña̱ʼa sa̱kuaʼún xa̱ʼa̱ Jehová. Xa̱ʼa̱ ña̱kán kúʼvi̱ní-iniún xíniún Ndióxi̱ ta sana xa̱a̱ nda̱taxiún miíún ndaʼa̱ra ta xa̱a̱ nda̱kuchiún. Soo tá ta̱ʼán keʼún ña̱yóʼo sana ndákanixi̱níún ña̱ xa̱a̱ ku̱nu̱mí keʼúnña. Soo tá xa̱a̱ nda̱kuchiún xíniñúʼu chika̱a̱kaún ndee̱ ña̱ kutáʼankaún xíʼin Jehová. Ta kivika chika̱ún ndee̱ ña̱ kutáʼún xíʼinra ndiʼi tiempo. Ná kotoyó ndáa ki̱ʼva keʼúnña.
1. ¿Nda̱chun xíniñúʼu chika̱a̱kaún ndee̱ ña̱ kutáʼankaún xíʼin Jehová?
Ndiʼiyó xíniñúʼu chika̱a̱ ndee̱ ña̱ vií kutáʼanyó xíʼin Jehová. ¿Nda̱chun? “Ña̱ va̱ʼa ná kǒo sandákooyó ña̱ kándíxayó Ndióxi̱” ta kǒo kuxíkáyó nu̱úra (Hebreos 2:1). ¿Ndáaña chindeétáʼan xíʼinyó ña̱ nda̱kú koo iniyó ña̱ ndasakáʼnuyó Jehová? Ná chika̱a̱yó ndee̱ ña̱ natúʼunyó xíʼin na̱ yiví ta saátu ndukúyó inka ki̱ʼva ña̱ kachíñuyó nu̱ú Ndióxi̱yó (kaʼvi Filipenses 3:16). Iinlá ña̱ kachíñuyó nu̱ú Jehová kúú ña̱ va̱ʼaníka (Salmo 84:10).
2. ¿Ndáaña xíniñúʼu keʼún?
Ni xa̱a̱ ku̱a̱ʼa̱n sándiʼún kaʼviún libro yóʼo, soo ña̱ ndásakáʼnún Ndióxi̱ ña̱ sa̱kán ki̱xáʼava kúúña. Biblia káchiña, iin tá iin na̱ ndásakáʼnu Ndióxi̱ xíniñúʼu kixáʼana ndasaxa̱ána ña̱ ndákanixi̱nína (Efesios 4:23, 24). Tá ná ndakundeún sakúaʼún xa̱ʼa̱ Ndióxi̱ ta saátu ña̱ ku̱ʼún reunión ku̱a̱ʼáka ña̱ʼa sakúaʼún xa̱ʼa̱ Jehová ta saátu ki̱ʼva ña̱ íyora. Chika̱a̱ ndee̱ ña̱ keʼún nda̱a̱ táki̱ʼva kéʼéra. Ta kǒo sandákoún ña̱ nasamaún ña̱ kéʼún ña̱ va̱ʼa sakúsi̱íún-ini Jehová.
3. ¿Ndáa ki̱ʼva chindeétáʼan Jehová xíʼún ña̱ kuaʼnukaún xíʼin tu̱ʼunra?
Biblia káchiña: “Ndióxi̱ [...] sanáʼa̱ ndóʼó nda̱a̱ ná xa̱a̱ndó koo tu̱ʼvandó, miíra taxi ndee̱ ndaʼa̱ndó, miíra chindeétáʼan xíʼinndó ña̱ nda̱kú koo inindó ta chindeétáʼanra xíʼinndó ña̱ kútu̱ní kunditandó” (1 Pedro 5:10). Ndiʼivayó yáʼa nu̱ú ña̱ va̱ása va̱ʼa, soo Jehová táxira ña̱ xíniñúʼuyó ña̱ va̱ʼa kundeé-iniyó (Salmo 139:23, 24). Soo káʼa̱nra ña̱ taxira ndee̱ ndaʼún ña̱ va̱ʼa nda̱kú koo iniún kachíñún nu̱úra (kaʼvi Filipenses 2:13).
NÁ SAKUAʼAKAYÓ XA̱ʼA̱ÑA
Ná kotoyó ndáaña kivi keʼún ña̱ va̱ʼa kuaʼnukaún xíʼin tu̱ʼun Ndióxi̱ ta ndáa bendición taxi Jehová ndaʼún xa̱ʼa̱ ña̱yóʼo.
4. Va̱ása sandákoún ña̱ kuniso̱ʼún ta ka̱ʼún xíʼin Jehová ta̱ kúú migoún
Ña̱ ka̱ʼún xíʼin Jehová ta saátu ña̱ káʼviún Biblia chíndeétáʼanña xíʼún ña̱ va̱ʼa koún migora. ¿Á kivi chindeétáʼan ña̱yóʼo xíʼún ña̱ yatinka koún xíʼinra? Ta, ¿ndáa ki̱ʼva keʼún ña̱yóʼo?
Kaʼvindó Salmo 62:8 ta ka̱ʼa̱nndó xa̱ʼa̱ ña̱yóʼo:
-
Tá viíka ná ka̱ʼún xíʼin Jehová chindeétáʼanña xíʼún ña̱ viíka kutáʼún xíʼinra. ¿Ndáa ki̱ʼva keʼún ña̱yóʼo?
Kaʼvindó Salmo 1:2 ta ka̱ʼa̱nndó xa̱ʼa̱ ña̱yóʼo:
-
Tá viíka ná ka̱ʼviún Biblia ña̱yóʼo chindeétáʼanña xíʼún ña̱ viíka kutáʼún xíʼinra. ¿Ndáa ki̱ʼva keʼún ña̱yóʼo?
¿Ndáa ki̱ʼva viíka kunda̱a̱-iniún xíʼin ña̱ káʼvi iinlá miíún nu̱ú Biblia? Ña̱ va̱ʼa kunda̱a̱-iniún ndáaña xíniñúʼu keʼún, kotondó VIDEO. Tándi̱ʼi ka̱ʼa̱nndó xa̱ʼa̱ ña̱yóʼo:
-
¿Ndáaña káʼa̱n video yóʼo xa̱ʼa̱ ña̱ kivi keʼún?
-
¿Ndáaña kúni̱ún nandukúkaún xa̱ʼa̱?
5. Koto ndáa ki̱ʼva keʼékaún chiñu nu̱ú Jehová
Tá ná kuni̱ún kachíñukaún nu̱ú Jehová kuaʼnukaún xíʼin tu̱ʼunra. Kotondó VIDEO ta ka̱ʼa̱nndó xa̱ʼa̱ ña̱yóʼo:
-
¿Ndáaña chi̱ndeétáʼan xíʼin ñá Cameron ña̱ ku̱a̱ʼáka chiñu keʼéñá nu̱ú Ndióxi̱?
Su̱ví ndiʼivíyó kivi ku̱ʼu̱n inka país ña̱ natúʼunyó xíʼin na̱ yiví xa̱ʼa̱ Ndióxi̱. Soo ndiʼivayó kivi chika̱a̱ ndee̱ ña̱ kachíñuyó nu̱ú Ndióxi̱. Kaʼvindó Proverbios 21:5 ta ka̱ʼa̱nndó xa̱ʼa̱ ndáaña kúni̱ún keʼún...
-
... ti̱xin congregación.
-
... tá nátúʼún xíʼin na̱ yiví xa̱ʼa̱ Ndióxi̱.
¿Ndáa ki̱ʼva chindeétáʼan texto yóʼo xíʼún ña̱ ku̱a̱ʼáka chiñu keʼún nu̱ú Ndióxi̱?
Sava ña̱ kivi keʼún
-
Viíka ka̱ʼún xíʼin Ndióxi̱.
-
Kaʼvi iníísaá Biblia.
-
Kuxini̱ ndiʼi na̱ hermano na̱ íyo ti̱xin congregación.
-
Kixáʼa sanáʼa̱ iin na̱ yiví xa̱ʼa̱ Biblia.
-
Koún precursor auxiliar á regular.
-
Na̱ ta̱a kivi chika̱a̱na ndee̱ ña̱ koona siervo ministerial.
6. Kivi koo si̱íún vitin ta saátu chí nu̱únínu
Kaʼvindó Salmo 22:26 ta ka̱ʼa̱nndó xa̱ʼa̱ ña̱yóʼo:
-
¿Ndáaña kivi keʼún ña̱ va̱ʼa si̱í koún vitin ta saátu chí nu̱únínu?
ÑA̱ XA̱A̱ SA̱KUAʼAYÓ
Chika̱a̱ka ndee̱ ña̱ vií kutáʼún xíʼin Jehová ta saátu ku̱a̱ʼáka chiñu keʼún nu̱úra. Ta saá kusi̱í-iniún koún ndiʼi tiempo.
Ná ndakaʼányó xa̱ʼa̱ ña̱yóʼo
-
¿Nda̱chun va̱ʼa kándíxaún ña̱ chindeétáʼan Jehová xíʼún ña̱ nda̱kú koo iniún kachíñu nu̱úra?
-
¿Ndáaña kivi keʼún ña̱ vií kutáʼún xíʼin Jehová?
-
¿Nda̱chun ndáyáʼviní kotoún ndáaka ña̱ kivi keʼún ña̱ va̱ʼa kachíñukaún nu̱ú Jehová?
NANDUKÚKA XA̱ʼA̱ÑA
¿Ndáaña ndáyáʼvika nu̱ú Jehová: ña̱ iinlá yichi̱ na̱ʼún ña̱ ndixaní ndásakáʼnúnra, á ña̱ ndiʼi yichi̱ na̱ʼún ña̱ nda̱kú íyo iniún xíʼinra?
Nda̱kú ná koo iniyó nda̱a̱ táki̱ʼva ke̱ʼé ta̱ Abrahán (9:20)
Nda̱a̱ na̱ nda̱kú íyo ini káchíñu nu̱ú Jehová kivi sandákoona ña̱ kusi̱í-inina. Koto ndáaña kivi keʼún tá ná ndoʼún ña̱yóʼo.
Ndáaña ke̱ʼíi̱ ña̱ tuku na̱kusi̱í-inii̱ ña̱ ndasakáʼnui̱ Jehová (5:25)
¿Ndáaña chindeétáʼan xíʼún ña̱ kuni̱kaún ku̱a̱ʼáka chiñu keʼún nu̱ú Ndióxi̱ ta saátu ña̱ saxínún ña̱yóʼo?
Koto nda̱chun ndáyáʼviní xu̱xa koo iniún xíʼin tu̱ʼun Ndióxi̱ ta ndáa ki̱ʼva xa̱ún keʼún ña̱yóʼo.
Sanatu kutóún ña̱yóʼo
ÑA̱ KÚNI̱ NA̱ YIVÍ KUNDA̱A̱-ININA XA̱ʼA̱ NA̱ TESTIGO JEHOVÁ
¿Ndáa ki̱ʼva sánáʼa̱ na̱ testigo Jehová na̱ yiví?
Xíʼin ki̱ʼva ña̱ káʼvi na̱ testigo Jehová xíʼin na̱ yiví kivi kuniñúʼún nda̱a̱ ndáaka Biblia kúni̱ miíún ta va̱ása kiʼinna xu̱ʼún ndaʼún ña̱ sanáʼa̱na yóʼó. Tá ná kaʼvi na̱ testigo Jehová xíʼún kivi koo na̱ veʼún á na̱ migoún á nda̱a̱ ndáaka na̱ kúni̱ miíún ña̱ kuniso̱ʼona ña̱ sakúaʼún.
