Mu ku lilongesa lino livulu liose, mu na tantekeya via vingi ku tuala hali Yehova. Kaha viuma vi mua lilongesa ku tuala hali ikeye, via mi lingisa ku mu lema mua kama, ngeci halumo mua lihana kuli ikeye na ku mi mbatiza. Kaha nga kanda mu lingemo, halumo muli na ku singanieka ku lingamo vuovuno. Vunoni ku kola mu lutsilielo ka ca lengelele ha mbatizimu. Citava mu tualeleleho ku suena kuli Yehova ku miaka yose ya ya-ye. Mu njila ika?

1. Omo lia vika mua pande ku tualelelaho ku kaniamesa vusamba vuenu na Yehova?

Tua pande ku lihakela kapandi ka ku tualelelaho ku kaniamesa vusamba vuetu na Yehova. Omo lia vika? “ku tina tu hungumuka” kuli ikeye. (VaHevelu 2:1) Vika vi hasa ku tu kuasa ku tualelelaho ku pangela Yehova na lukakatela? Ku panga na ndzili yose mu cipanga ca ku ambulula, kaha na ku tonda vinjila vieka via ku pangelamo Njambi mu vutuntu. (Tandenu Filipu 3:16.) Ka kuesi muono ueka ua cili, ua hiana ku pangela Yehova!—Visamo 84:10.

2. Vika naua mua pande ku tualelelaho ku linga?

Vutuhu cino cilongesa cenu ca Mbimbiliya ci li na ku hua, vunoni muono uenu mu ku pua Mukua Kilistu kasi u tualelelaho. Mbimbiliya ya muesa ngecize tua pande ku “Zala vuntu vua vuha.” (Efeso 4:23, 24) Omo mu tualelelaho ku lilongesa Lizi lia Njambi na ku kunguluka, mu ka lilongesa viuma via viha hali Yehova na vifua vieni. Tondenu vinjila vi mu hasa ku tambuluisilamo vuino vifua vieni. Kaha tualelenuho ku alulula viose vitondeka mu muono uenu, mu ku vuisa Yehova ndzolela.

3. Vati Yehova a ka mi kuasa ku kola mu lutsilielo?

Mbimbiliya nguayo: “Kaha Njambi . . . a ka mi tantuluisa, na ku mi tumbika, na ku mi kolesa.” (1 Petulu 5:10) Tu vose tue ku hita mu vieseko. Vunoni Yehova, ue ku tu hana viose vi tue ku tondeka linga tu hase ku vi vula. (Visamo 139:23, 24) Kaha ua kulahesa ku mi hana cizango, na ngolo linga mu hase ku mu pangela na lukakatela.—Tandenu Filipu 2:13.

 TANTEKEYENU VIKUAVO

4. Tualelenuho ku simutuila na Kavusamba kenu ua kama

Ku vundila na ku lilongesa Mbimbiliya, via mi kuasa ku pua kavusamba ka Yehova. Vunoni vati evi viuma viaco, vi hasa ku mi kuasa naua ku tualelelaho ku suena kuli ikeye?

Tandenu Visamo 62:8, kaha simutuilenu ha cihula eci:

• Linga mu kaniamese vusamba vuenu na Yehova, vika mu tonda ku alulula ku tuala ha cifua ca vivundilo vienu?

Tandenu Visamo 1:2, kaha simutuilenu ha cihula eci:

• Linga mu kaniamese vusamba vuenu na Yehova, vati mu hasa ku vueza ku cifua ci mue ku tandelamo Mbimbiliya?

Vati mu hasa ku linga mangana cilongesa cenu mu vulika ci mi kuase mua kama? Linga mu tantekeye vimo vinguli, talenu VIDEO, kaha simutuilenu ha cihula ci na hatako.

• Vinguli vika via mu video mu tonda ku kava?

• Vimpande vika mu tonda ku lilongesa?

 VI MU NA LILONGESA

Tualelenuho ku kaniamesa vusamba vuenu na Yehova, na ku lihakela vizango via mu lutsilielo. Nga mu lingamo kaha mu ka yoya mu ndzolela ku miaka yose!

Mpupulule

• Omo lia vika mu hasa ku kala na vusunga ngecize Yehova a ka mi kuasa ku mu pangela na lukakatela?

• Vati mu hasa ku kaniamesa vusamba vuenu na Yehova?

• Vati ku lihakela vizango via mu lutsilielo, ci hasa ku mi kuasa ku kola mu lutsilielo?