Na lége ti mandangɔ Ngbangɔ tɛ mɔ, mɔ manda alo ngba mɛ ba Yehova. Ni li ya songo tɛ mɔ ka mbage tɛ Yehova a mai wa ngoi mɛndɛ̃ mɔ ka mɔ hɛ̃ tɛrɛ mɔ hɛ̃ lo wa mɔ mu nga batisimɔ wɛ. Se ta du ngaso ma ko, ngoi mɛndɛ̃ mɔ ndo da bɛ mɔ na lingɔ ni na bi mɛ na gangɔ. Kanda ta maingɔ na ya nyingɔ a dɔ bo lo na ndo mungɔ batisimɔ ma. Mɔ lengbi ti lingɔ ya mɔ ti na mangbi ti kpengbani na Yehova na ya dungɔ lɛ ngɛ̃́ tɛ mɔ ti ngoi zu. Mɔ li ni ngasia?

1. Nda mɛ ayɔ ya e ti na mangbi ti kpengbani na Yehova nɛ?

Ayɔ ya e ngbã lá kwɛ lingɔ ge ge ge ti nɛngɔ ya e du na mangbi ti kpengbani na Yehova. Na lo nɛ? “So e yu lege” tɛ Yehova. (Aebreo 2:1) Ye mɛ na zangɔ e ya e ngbã mbilimbili ka mbage tɛ Yehova nɛ? Elengbi ti hɛ̃ngɔ tɛrɛ e gba na ya kwa ti fangɔ tɛnɛ nga na gingɔ lége ti lingɔ akwa gba na ya kwa tɛ Yehova. (Di Filipɛ 3:16.) Lingɔ kwa hɛ̃ Yehova la du ye ti ngbondoni na ya dungɔ lɛ ngɛ̃́ tɛ e!​—Nzembo 84:10.

2. Aye mɛndɛ̃ mɛ ayɔ ya mɔ ngbã lá kwɛ lingɔ ni nɛ?

Mandangɔ Ngbangɔ tɛ mɔ alengbi ti wɛngɔ, kanda dungɔ lɛ ngɛ̃́ tɛ mɔ ti wakristo na ngbãngɔ bwai. Ngbangɔ pa hɛ̃ e ya “ale ĩ mu fana du.” (Efɛzɛ 4:23, 24) Mandangɔ Ngbangɔ ngoi zu nga na gwengɔ bombi alengbi ti lingɔ ya mɔ hĩnga alo mɛ ba Yehova nga na aseliye tɛ lo. Gi hĩngangɔ se mɛ mɔ lengbi ti landangɔ seliye tɛ Yehova na seni na ya dungɔ lɛ ngɛ̃́ tɛ mɔ, wa ngbã lá kwɛ gbinyangbingɔ seliye tɛ mɔ mɛ ndo yɔ ya mɔ gbinyangbi ni ti nɛngɔ ya mɔ hɛ̃ Yehova dengɔ bɛ.

3. Ngasia la Yehova lengbi ti zangɔ mɔ ya mɔ ngbã lá kwɛ maingɔ na ya nyingɔ nɛ?

Ngbangɔ pa ya: “Nzapa . . . na lɛkɛngɔ ĩ, kpengbangɔ na bɛ ĩ, hɛ̃ngɔ ĩ nguru. Lo la ili ĩ ya ĩ lua ndima ti kaka tɛ ni.” (1 Petro 5:10) E zu e ndo tengbi tara. Yehova ndo hɛ̃ e ngunu mɛ alengbi ti nɛngɔ ya e nwɔ̃ na tara ni. (Nzembo 139:23, 24) Lo ko kapa ya ni na hɛ̃ngɔ e gwɛ̃ nga na ngunu ti nɛngɔ ya e li kwa hɛ̃ lo na mbilimbili.​—Di Filipɛ 2:13.

 GI HĨNGANGƆ LO MƐNDƐ̃

4. Ngbã lá kwɛ tɛnɛngɔ tɛnɛ na kwa mɔ ti kpɔ̃ bɛ mɔ

Lingɔ sambela nga na mandangɔ Ngbangɔ tɛ mɔ aza mɔ ya mɔ ti kwa Yehova. Ye mɛ mɔ li ti nɛngɔ ya lingɔ sambela na mandangɔ Ngbangɔ za mɔ ya mɔ dɔ dã na Yehova nɛ?

Di Nzembo 62:8, wa na pɛni hɛ̃ gbinya ti hũnda olo mɛ:

• Ngasia la mɔ lengbi ti lɛkɛngɔ sambela tɛ mɔ nzɔ̃ni ti nɛngɔ ya mɔ ti na mangbi ti kpengbani na Yehova nɛ?

Di Nzembo 1:2, wa na pɛni hɛ̃ gbinya ti hũnda olo mɛ:

• Ye mɛ ayɔ ya mɔ di lɛkɛ ni na ya dingɔ Ngbangɔ tɛ mɔ ti nɛngɔ ya mɔ ti na mangbi ti kpengbani na Yehova nɛ?

Ye mɛ mɔ li ti nɛngɔ ya mandangɔ Ngbangɔ tɛ mɔ nvɛ̃ni aza mɔ nɛ? Ti nɛngɔ ya mɔ hĩnga ambanga akɔdɛ mɛndɛ̃ ko, ba VIDEO, wa na pɛni hɛ̃ gbinya ti ahũnda olo mɛ.

• Na ya video mɛ, akɔdɛ mɛ mɔ lengbi ti salelangɔ nɛ?

• Atɛnɛ mɛ mɔ sepala mandangɔ ni nɛ?

 NA NDUNU NI

Ngba lá kwɛ lingɔ ya mangbi tɛ mɔ na Yehova ati kpengbani, wa kpã nga amikanɔ ti nyingɔ. Ni na lingɔ ya mɔ sepala na dungɔ lɛ ngɛ̃́ bwai na bwai!

Bozongeli

• Nda mɛ mɔ lengbi ti yengɔ na bɛ mɔ kɔi ya Yehova na zangɔ mɔ ya mɔ li kwa hɛ̃ lo na mbilimbili nɛ?

• Ngasia la mɔ lengbi ti lingɔ ya mangbi tɛ mɔ na Yehova ati kpengbani nɛ?

• Nda mɛ kpãngɔ amikanɔ lengbi ti zangɔ mɔ ya mɔ mai na ya nyingɔ nɛ?