Variyari va yoohuserya yeela ya Piipiliya, nyuwaano moohuserya sincipale vooloca sa Yehova. Nave soothene muhusenryaanyu sohaaceererya osivela wanyu ntakhara yoowo. Akhweya mooveleela okumi anyu wa Yehova nave mpatisiwa. Wakhala wi nlelo hampatisiwe, akhweya nyuwaano munnapaka owetha wanyu wi nwerye weerano yeeyo moohilekela. Nyenya opatiso tahi makuchuwelo. Nyuwaano munaphwanela otitelela olipiha onthamwene anyu ni Yehova okhala wookhala. Mwawihai?

1. Ntakhara heeni nyuwaano munnaphwanela otitelela olipiha onthamwene anyu ni Yehova?

Nnaphwanela wiilipiserya wi ntitelele olipiha onthamwene ahu ni Yehova. Ntakhara heeni? “Wi nihihuwelihiwe,” naari wi, nihiivalaanye wa yoowo. (Ahebri 2:1) Tiheeni enahaala onikhaviherya otitelela omurumeela Yehova moororomeleya? Nnaphwanela okhala ooweiwa mmuteko woolaleerya ni waasya mikhalelo sa opaka sincipale mmuteko wa Muluku. (Mwaalakhanye Filipi 3:16.) Omurumeela Yehova echu yaphaama nnaphwanelaahu opaka mu okumi ahu!—Salumu 84:10.

2. Tiheeni munaphwanelaanyu otitelela opaka?

Naamwi yoohuserya anyu yeela ya Piipiliya eyaaka omakuchuwelo, okumi anyu ntoko mulapeli a Yehova onnatitelela. Piipiliya onnanleela wi nnaphwanela ‘onwara muchu ahiihaano,’ naari wi, nnaphwanela otakiherya omuchu wa Yehova ophiyerya vaavaa nnaweryelaahuvo. (Éfeso 4:23, 24) Mwa yeeyo, ti woochuneya otitelela omuhuserya Piipiliya ni ophwanyeya mmithukumano. Wakhala wi mootitelela ohuserya ichu ivyaani vooloca sa Yehova ni mikhalelo sawe, nave tho mpaka matorokelo oochuneya mookumini, munahaala ohakalaliha murima wa Tiithi ahu, Yehova.

3. Ti mwawiihai Yehova onahaaleiye wookhaviheryaani otitelela okhala nthamwene awe?

Piipiliya onii: “Muluku . . . onamoorehereryaani, oolipiheeni, oovaheeni ikuru ni wootikitheryaani.” (1 Pedro 5:10) Oothene ahu ninnahoolela saweeha, nyenya Yehova onnanivaha yeeyo eri yoochuneya wi ntitelele okhala oororomeleya. (Salumu 139:23, 24) Owo oororomeliha woovahaani nchuno ni ikuru wi mmurumeele owo moororomeleya.—Mwaalakhanye Filipi 2:13.

 OHUSERYA MWAWIISEELA

4. Muhihiye olocihana ni Nthamwene anyu a vanikuthani

Ovekela ni omuhuserya Piipiliya sohookhaviheryaani okhala nthamwene a Yehova. Vano ichu seiha sinii sookhaviheryeeni hai omwaacamela yoowo?

Mwaalakhanye Salumu 62:8, nave voocharela muthokororye nikoho nla:

• Wi mulipihe onthamwene anyu ni Yehova, ti mwawiihai muneeraanyu murehererye mavekelo anyu?

Mwaalakhanye Salumu 1:2, nave voocharela muthokororye nikoho nla:

• Wi mulipihe onthamwene anyu ni Yehova, munii murehererye hai omwaalakhanya wanyu Piipiliya?

Munii mweerihe hai yoohuserya anyu okhala yamphurelo? Wi mukhaleno miruku mikina, moone EXILEMA, nave voocharela muthokororye makoho anacharela.

• Sooleeliherya taani sa mu exilema nyuwaano mwaahaalaanyu osiveliwa opharihela muteko?

• Miyaha taani nyuwaano mwaahaalaanyu osiveliwa ohuserya?

 MUKWASU

Mutitelele olipiha onthamwene anyu ni Yehova ni okhalano soolakelela soomunepani. Mwawiihiiha, nyuwaano munarwa mpuha okumi okhala wookhala!

Makoho awuuluulela

• Ntakhara heeni munnaphwanela olekecheya wi Yehova onanwerya wookhaviheryaani omurumeela yoowo moororomeleya?

• Munii mulipihe hai onthamwene anyu ni Yehova?

• Ti mwawiihai okhalano soolakelela soomunepani oneeraaya wookhaviheryeeni olipiha onthamwene anyu ni Yehova?