Kuajli tikmatstokej ika, aman ika yotimomachti yejuin libro, más yopeuj tiktlasojtla Jehová pampa melak miyek itech yotiuel. Niman kanaj hasta yotimosentemakak itech toTajtsin niman yotimoapolakti. Tla hasta aman xtikchiua yejuin, kanaj yopeuj tiknemilia tikchiuas tlen noneki niman ijkon uelis timosentemakas itech Jehová niman timoapolaktis. San ika, maski tla tejua yotimoapolakti, noneki nochipa timokojtilis tikchikauas motlaneltokil. Matikitakan tlenon uelis tikchiuas niman ijkon mojmostla más kuajli timouikas iuan Jehová.

1. ¿Tleka noneki timokojtilijtos niman ijkon mojmostla más kuajli timouikas iuan Jehová?

Noneki tikchiuaskej nochi tlen noneki niman ijkon mojmostla más kuajli touikaskej iuan Jehová. ¿Tleka? Para maka keman tiktlalkauiskej (Hebreos 2:1). ¿Tlenon techpaleuis nochipa matiktekichiuilikan Jehová? Tla tokojtiliaj chikauak titenojnotsaskej niman tla tikitaj kenijki más uelis titlapaleuiskej ipan ikalpan toTajtsin (xkita Filipenses 3:16). Xkilnamiki: ¡tiktekichiuilis Jehová yejon tlen más kualtsin! (Salmo 84:10).

2. ¿Tlenon noneki nochipa tikchiuas?

Maski xok ueyi poliui niman ijkon titlamis timomachtis yejuin libro, uelis tikijtoskej ika tejua kemach tipeujtiuj tiktekichiuilia Jehová. Biblia kijtoua ika tinochimej akin tiktekichiuiliaj toTajtsin noneki totlakentiskej “ika on yenkuik nemilistli” (Efesios 4:23, 24). Tla tejua xkeman tijkajkaua ika timomachtia iTlajtol toTajtsin niman nochipa tiauj tlanechikoltin, más kuajli tikixmatis Jehová. Nochipa xmokojtili niman ijkon tikchiuas ken Jehová. Niman nochipa xkita tlenon nonekis tikpatlas niman ijkon tikyolpaktis.

3. ¿Kenijki mitspaleuis Jehová más xchikaua motlaneltokil?

Biblia kijtoua: “Dios mechkueltlalis, mechmelajkapiyas, mechkojtilis, niman mechyektlalis ipan nemotlaneltok” (1 Pedro 5:10). Tinochimej tikimixnamikij tetlatlatalistin, san ika, Jehová techpaleuiya matikinxikokan (Salmo 139:23, 24). Yejua kuajli techijlia ika techpaleuis nochipa matiknekikan tiktekichiuiliskej niman ika techkojtilis para ijkon uelis nochipa tiktlakamatiskej (xkita Filipenses 2:13).

 OKSEKI XKASIKAMATI

4. Nochipa xnotsa niman xkaki Jehová

Tejua kuajli timouika iuan Jehová pampa nochipa tiknotsa niman timomachtia Biblia. ¿Kenijki uelis mitspaleuis más kuajli xmouika iuan Jehová tla nochipa tikchiua yejuin?

Xkitakan Salmo 62:8 niman xtlajtokan itech yejuin:

• Tla timokojtilia más kuajli tikchiuas teoyotl, mitspaleuis más kuajli xmouika iuan Jehová. ¿Tlenon uelis mitspaleuis más kuajli xchiua teoyotl?

Xkitakan Salmo 1:2 niman xtlajtokan itech yejuin:

• Tla más kuajli timomachtia Biblia, mitspaleuis más kuajli xmouika iuan Jehová. ¿Tlenon uelis mitspaleuis más kuajli xmomachti Biblia?

Xkitakan VIDEO niman ijkon nenkitaskej tlenon uelis mitspaleuis kuajli xkasikamati tlen timomachtia. Tla yonenkitakej video, aman xtlajtokan itech yejuin:

• Itech nochi tlen otikitakej ipan video, ¿tlenon ueliskia tikchiuas niman ijkon más kuajli timomachtis?

• ¿Itech tlenon tikuelitaskia timomachtis?

 TLEN OTIUEL

Nochipa xmokojtili más kuajli timouikas iuan Jehová niman xkita kenijki uelis más tiktekichiuilis. Tla ijkon tikchiua, ¡nochipa uelis tiyolpakis!

¿Kenon titlanankiliskia?

• ¿Tleka uelis kuajli tikmatstos ika Jehová mitspaleuis nochipa xtekichiuili?

• ¿Tlenon uelis tikchiuas niman ijkon más kuajli timouikas iuan Jehová?

• ¿Tleka melak kuajli tla tikitaj kenijki uelis más tiktekichiuiliskej Jehová?