Sagötö me no öfahaʼö ndraʼugö ba Zura Niʼamoniʼö, tatu manö no oya zi no öfahaʼö yaʼugö sanandrösa khö Yehowa. Daʼö fefu zamarou yaʼugö ba wangomasiʼö yaʼia. Tola manö göi daʼö mbörö wa ölulu waʼaurimö khönia ba tebayagö ndraʼugö idanö. Na lö nasa nihalömö angetula, te no öʼera-era daʼö ba waʼalio. Hizaʼi, na no aefa tebayagö ndraʼugö idanö, moguna nasa öʼaroʼö wahuwusamö khö Yehowa. Tola tobali si fahuwu khö Yehowa ndraʼugö sagötö faʼara. Hewisa lalania?

1. Hana wa lö öböhöli wangaʼaroʼö fahuwusamö khö Yehowa?

Moguna taforege ba wangaʼaroʼö fahuwusada khö Yehowa. Hadia mbörö? ”Faböi ahani ita ba wamati” ba lö fandröndröu ita khönia. (Heberaiʼo 2:1) Hadia zanolo yaʼita enaʼö lö faröi ita ba wamosumange Yehowa? Böi taböhöli wanuriaigö turia somuso dödö ba taʼalui lala enaʼö tola tadouʼö wamaluada halöwö khö Lowalangi. (Baso Wilifi 3:16.) Lala waʼauri fondrege zi sökhi na tafosumange Yehowa!—Sinunö 84:10.

2. Hadia nasa zinangea öfalua?

Hewaʼae arakhagö awai öfahaʼö ndraʼugö ba mbuku daʼa, hizaʼi faʼaurimö ba waʼaniha Keriso tenga ha ndrege daʼa. Ifatunö khöda Sura Niʼamoniʼö wa moguna ’tabohouni gamuatada’. (Efeso 4:23, 24) Na lö öböhöli wamahaʼö yaʼugö ba Daromali Lowalangi hegöi feʼamöi ba gangowuloa, oya nasa dania öfahaʼö ndraʼugö sanandrösa khö Yehowa hegöi amuatania. Forege wamalua amuatania andrö. Böi göi böhöli wombulöʼö faʼaurimö enaʼö omuso dödö Yehowa.

3. Hewisa Yehowa wanolonia yaʼugö?

Imane Sura Niʼamoniʼö, ’Lowalangi dania zangasiwai ba wamahaʼö yaʼami. Iʼabölöʼö, iʼabeʼeʼö, ba iʼaroʼö ami.’ (1 Fetero 5:10) Asese tedönisi dödöda ba wamalua si lö sökhi. Hizaʼi, itolo ndraʼugö Yehowa enaʼö tola ötimbagö gamuata daʼö. (Sinunö 139:23, 24) No ifabuʼu wa ibeʼe khöda waʼedöna ba faʼabölö enaʼö lö faröi ita ba wamosumange yaʼia.—Baso Wilifi 2:13.

 ODÖDÖGÖ NASA WANGALUI

4. Böi böhöli wahuhuosa khö zi Fahuwu khöu

Fangandrö hegöi famahaʼö ba Zura Niʼamoniʼö, daʼö zanolo yaʼugö irege tobali ndraʼugö si fahuwu khö Yehowa. Hewisa wa tola möi fanolomö daʼö enaʼö itugu tedou wahuwusamö khönia?

Baso Zinunö 62:8, ba beʼe wanema li ba wanofu daʼa:

• Enaʼö itugu aro wahuwusamö khö Yehowa, hadia zinangea öfalua enaʼö monönö waʼasökhi wangandröu soroi ba dödö?

Baso Zinunö 1:2 hegöi nisura ba gahe zura, ba beʼe wanema li ba wanofu daʼa:

• Enaʼö itugu aro wahuwusamö khö Yehowa, hewisa lala enaʼö oya ötema mbua moroi ba wombaso Sura Niʼamoniʼö?

Hewisa enaʼö oya mbua nitemamö na öfahaʼö samösa ndraʼugö ba Zura Niʼamoniʼö? Enaʼö öʼila hadia manö zinangea öfalua, futa VIDEO, ba beʼe wanema li ba wanofu-nofu daʼa:

• Moroi ba nidunö-dunö ndra talifusöda andrö ba video no mege, hezo zomasiʼö öfalua?

• Hadia manö duho somasiʼö öfahaʼö ndraʼugö nasa?

 RAHU-RAHU WAMAHAʼÖ

Moguna nasa öʼaroʼö wahuwusamö khö Yehowa ba böi böhöli wogamö ohitö dödöu ba wamati. Na öfalua daʼö, tola ösöndra waʼauri sohahau dödö sagötö faʼara!

Hadia Wamahaʼö si Tola Öhalö?

• Hana wa faduhu dödöu wa itolo ndraʼugö Yehowa enaʼö lö faröi ndraʼugö ba wamosumange yaʼia?

• Hewisa enaʼö itugu aro wahuwusamö khö Yehowa?

• Na no ötatugöi gohitö dödöu ba wamati, hadia mbörö wa möi fanolomö daʼö irege tedou wamatimö?