MUTU 60
Pitilijani kutang’isha ushamwali wanu na Yehova
Pa nthawe yonse yamwankhala muphunzila Baibolo, mwaziŵa vinthu vinyinji vokhuza Yehova. Vamwaphunzila vakuyavyani kuti mukomukonda ngako mpaka mwesankha kulipeleka kuli yove no batiziŵa. Koma keno mukaliye batizika, payakine muganiza zakuti mubatiziwe lombapano. Koma olo kuti mubatiziwe, muzafunikile kupitilija kutang’isha ushamwali wanu na Yehova. Mungakwanishe kunkhala pa ushamwali na Yehova mpaka kale-kale. Kansi mungachite tyani vamene ivi?
1. Ndaŵa yanji mufunika kupitilija kutang’isha ushamwali wanu na Yehova?
Tonse tufunikila kuchita khama kuti titang’ishe ushamwali wasu na Yehova. Tufunikila kuchita vamene ivi “kuti osati tikopeke patontho-patontho” noleka kumukhulupilila. (Aheberi 2:1) Lomba kansi ni chinji chingatiyavye kuti tipitilije kutumikila Yehova mokhulupilika? Tingachite vamene ivi poyeja-yeja kukata ntchito yolalikila mwa khama nofwana njila ziyakine zoyangijilila utumiki wasu. (Ŵelengani Afilipi 3:16.) Paliye chinthu chiweme ngako kupambana kutumikila Yehova!—Salimo 84:10.
2. Kansi mufunika kupitilija kuchitasoti chinji?
Olo kuti mwasilija kuphunzila buku ino, ziŵani kuti palisoti vinthu viyinji vamufunikila kuchita monga Nkhilisitu. Baibolo yunena kuti tufunikila “kuvwala umunthu unyowani.” (Aefeso 4:23, 24) Muziŵe vinthu vinyinji vokhuza Yehova na minkhalidwe yake mukapitilija kuphunzila Mawu a Mulungu komasoti kupezeka pa misonkhano ya mpingo. Mukoyeja-yeja kukonkheja minkhalidwe ya Yehova komasoti kuchinja moyo wanu na cholinga chakuti mukondweleshe Yehova.
3. Kansi Yehova angakuyavyeni tyani kuti mupitilije kunkhala naye pa ushamwali wotang’a?
Baibolo yunena kuti: “Mulungu . . . azasilijishe kukuphunzisani. Azakutang’isheni nokupasani mphamvu.” (1 Petulo 5:10) Tonse tuyesewa kuti tichite vinthu viipa. Koma Yehova otipasa vinthu vonse vatufunikila kuti osati tigonje pa mayeselo. (Salimo 139:23, 24) Yove olonjeza kuti azakupaseni mphamvu komasoti ntima wofunishisha kuti mupitilije kumutumikila mokhulupilika.—Ŵelengani Afilipi 2:13.
VATI TIPHUNZILE
Tiphunzile vamungachite kuti mupitilije kutang’isha ushamwali wanu na Yehova komasoti mwangakudalisileni yove.
4. Osaleka kulaŵijana na Yehova
Pofwika pano, Yehova wankhala muyanu wapa ntima chifukwa mwankhala mupemphela komasoti kuphunzila Baibolo. Kansi kupitilija kuchita vamene ivi kungakuyavyeni tyani kuti mutang’ishe ushamwali wanu na Yehova?
Ŵelengani Salimo 62:8, ndipo pavuli pake mukambilane konsho iyi:
-
Kuti mutang’ishe ushamwali wanu na Yehova, kansi pali vinthu vamuwona kuti mungafunikile kuchinja mukaganizila vinthu vamumuuja m’pemphelo?
Ŵelengani Salimo 1:2, ndipo pavuli pake mukambilane konsho iyi:
-
Kuti mutang’ishe ushamwali wanu na Yehova, kansi mungachite tyani kuti kuŵelenga Baibolo kukokuyavyani ngako?
Kansi mungachite tyani kuti mukopindula ngako mukayamba kuŵelenga Baibolo? Kuti muwone vingakuyavyeni, lolelani VIDIYO, ndipo pavuli pake mukambilane makonsho aŵa.
-
Pa mfundo zatomolewa mu vidiyo yamene iyi, kansi ni mfundo zotyani zamungakonde kuzikatishila ntchito?
-
Kansi ni nkhani zotyani zamungakonde kuphunzila?
5. Nkhalani na volinga vauzimu
Kunkhala na volinga vauzimu pamutumikila Yehova kungakuyavyeni kuti mupite pasogolo. Lolelani VIDIYO, ndipo pavuli pake mukambilane konsho iyi.
-
Mu vidiyo yamene iyi, kansi kunkhala na volinga vauzimu potumikila Yehova kwemuyavya tyani Cameron?
Ni atumiki a Yehova onselini amene angakwanishe kuluta ku chalo chiyakine kuyalalikila. Komalomba, tonse tingakwaninshe kunkhala na volinga vochita vinyinji mu utumiki. Ŵelengani Miyambo 21:5, ndipo pavuli pake muganizile volinga vamungakonde kuvikwanilisha . . .
-
mumpingo.
-
pa ntchito yolalikila.
Kansi mfundo ya mulemba yamene iyi ingakuyavyeni tyani kuti mukwanilishe volinga vanu?
Volinga vamungankhale navo
-
Kuchita mapemphelo aweme ngako.
-
Kuŵelenga Baibolo yonse.
-
Kuziŵana na abale na alongo onse mu mpingo wanu.
-
Kuyambisha komasoti kuchitisha maphunzilo a Baibolo.
-
Kuchita upainiya wothandiza olo wonkhazikika.
-
Keno nimwe m’bale yeja-yejani kuti munkhale ntumiki wothandiza.
6. Sangalalani na moyo kosasila!
Ŵelengani Salimo 22:26, ndipo pavuli pake mukambilane konsho iyi:
-
Kansi mungachite tyani kuti muzasangalale na moyo kosasila?
MFUNDO ZACHIDULE
Pitilijani kutang’isha ushamwali wanu na Yehova komasoti kunkhala na volinga vakuti muchite vinyinji potumikila Yehova. Mukachita tetyo mungakwanishe kuzasangalala na moyo kosasila.
Makonsho oweleja
-
Ndaŵa yanji mufunikilalini kukaikila kuti Yehova akuyavyeni kupitilija kumutumikila mokhulupilika?
-
Kansi mungatang’ishe tyani ushamwali wanu na Yehova?
-
Kansi kunkhala na volinga vakuti muchite vinyinji potumikila Yehova kungakuyavyeni tyani kuti mupitilije kunkhala naye pa ushamwali wotang’a?
PHUNZILANI VINYINJI
Kansi Yehova owona kuti chofunika ngako ni chini pakati pa kuchita vinthu mokhulupilika kamozi na kunkhala wokhulupilika kwa moyo wonse?
Olo ntumiki wokhulupilika wa Yehova angaleke kunkhala wosangalala potumikila Yehova. Onani vamungachite kuti muyambesoti kusangalala.
Kansi mungachite tyani kuti munkhale na volinga vauzimu novikwanilisha?
“Nkhalani na volinga vauzimu kuti mulemekeze navo Nyamalenga wanu” (Nsanja ya Olonda, 15 July, 2004)
Ndaŵa yanji Nkhilisitu ofunika kupitilija kutang’isha ushamwali wake na Yehova, ndipo angachite tyani vamene ivi?
