EISHOMO 60
Gumizamu Nootunguuka
Omu mushomo gw’okwega Baibuli ogu, oyegire bingi ebirikukwata ahari Yehova. Ebi oyegire bikureeteire kumukunda munonga obundi owaayehayo ahariwe, kandi waabatizibwa. Ku oraabe otakakikozire, shana obundi oriyo nooteekateeka kukikora juba. Kwonka okutunguuka kwawe tikurikuhendera waaheza kubatizibwa. Noobaasa kugumizamu noirira haihi Yehova ebiro byona. Ota shi?
1. Ahabw’enki oine kugumizamu noohamya omukago gwawe na Yehova?
Twine kukora n’amaani kubaasa kugumizamu nituhamya omukago gwaitu na Yehova. Ahabw’enki? Kugira ngu “tutahaba,” tukateishuka tukairira hare nawe. (Abaheburaayo 2:1) Niki ekirikubaasa kutuhwera kugumizamu nituheereza Yehova omu bwesigwa? N’okugumizamu turi abeeziriki omu kubuurira, kandi turikusherura n’emiringo endiijo ey’okuheereza Ruhanga waitu omu bwijwire. (Shoma Abafilipi 3:16.) Okuheereza Yehova nikyo kirikukirayo oburungi!—Zaaburi 84:10.
2. Niki ekindi eki oine kugumizamu nookora?
N’obu omushomo gw’okwega Baibuli ogu guraabe guriyo niguhendera, obuheereza bwawe bw’Ekikristaayo nibwija kugumizamu. Baibuli neegira ngu twine ‘kujwara omuntu omusya.’ (Abaefeso 4:23, 24) Waagumizamu nooyega Ekigambo kya Ruhanga, kandi orikuza n’omu nteerane z’ekibiina, noija kwega ebintu bisya ahari Yehova n’emitwarize ye. Sherura oburyo bw’okuteeraho kumutooreza nk’oku orikubaasa. Gumizamu nookora empinduka ezirikwetengyesa kubaasa kumushemeza.
3. Yehova naija kukuhwera ata kutunguuka?
Baibuli neegira eti: “Ruhanga [naija kuhendera okutendekwa kwanyu], abagumye, abahe amaani.” (1 Petero 5:10) Twena nitwohibwa. Kwonka Yehova naatuha byona ebirikwetengyesa kubaasa kwangira okwohibwa. (Zaaburi 139:23, 24) Naaraganisa kukuha ekyetengo n’amaani g’okumuheereza omu bwesigwa.—Shoma Abafilipi 2:13.
SHWIJUMA GYE
Yetegyereze oku orikubaasa kugumizamu nootunguuka, n’oku Yehova araakuhe emigisha.
4. Gumizamu noohurizana na munywani waawe orikukirayo
Okushaba n’okwega Baibuli bikuhweraire kuba munywani wa Yehova. Nibibaasa kukuhwera bita kugumizamu noomwirira haihi?
Shoma Zaaburi 62:8, kubaasa kugarukamu ekibuuzo eki:
-
Kubaasa kuhamya omukago gwawe na Yehova, oine kuboneza ota omuringo ogu orikushabamu?
Shoma Zaaburi 1:2, kubaasa kugarukamu ekibuuzo eki:
-
Kubaasa kuhamya omukago gwawe na Yehova, oine kuboneza ota omuringo ogu orikushomamu Baibuli?
Noobaasa kukora ki kwongyera kugasirwa omu kweyegyesa kwawe? Kubaasa kumanya obukoryo bw’okukikora, zaana VIDIYO, reero ogarukyemu ebibuuzo ebirikukurataho.
-
Ni bukoryo ki oburi omu vidiyo obu orikwenda kugyenderaho?
-
Ni nshonga ki ezi orikwenda kwegaho?
5. Taho ebigyendererwa by’omwoyo
Okugira ebigyendererwa omu buheereza bwa Yehova nikiija kukuhwera kugumizamu nootunguuka. Zaana VIDIYO, kubaasa kugarukamu ekibuuzo ekirikukurataho.
-
Omu vidiyo, Cameron akagasirwa ata ahabw’okutaho ebigyendererwa by’omwoyo?
Ti buri omwe ngu naabaasa kuza kubuurira omu ihanga erindi. Kwonka, nitubaasa kutaho ebigyendererwa biringaniire. Shoma Enfumu 21:5, reero oreebe ebigyendererwa ebi orikwenda kutaho . . .
-
omu kibiina.
-
omu buheereza.
Omusingye oguri omu kyahandiikirwe ekyo nigubaasa kukuhwera guta kuhikiiriza ebigyendererwa byawe?
Ebigyendererwa by’okuteekateekaho
-
Boneza omuringo ogu orikushabamu.
-
Shoma Baibuli yoona.
-
Teeraho kumanya buri omwe omu kibiina eki orimu.
-
Tandika kwegyesa omuntu Baibuli.
-
Ba payoniya omuhwezi nari ow’obutwire.
-
Ku oraabe ori ow’eishe-emwe, tunguuka obe omuheereza.
6. Yesiimire amagara ebiro byona!
Shoma Zaaburi 22:26, kubaasa kugarukamu ekibuuzo eki:
-
Noobaasa kukora ki kwesiimira amagara hati, n’okwija kumereera ebiro byona?
OMU BUGUFU
Gumizamu noohamya omukago gwawe na Yehova, kandi orikutaho ebigyendererwa by’omwoyo. Waakora otyo, noija kwesiimira amagara ebiro byona!
Okweijutsya
-
Ahabw’enki orikubaasa kuhamya ngu Yehova naija kukuhwera kumuheereza omu bwesigwa?
-
Noobaasa kuhamya ota omukago gwawe na Yehova?
-
Ebigyendererwa by’omwoyo nibibaasa kukuhwera bita kutunguuka?
JUMBURA EBINDI
Niki eki Yehova arikutwara nka kikuru munonga, n’ekikorwa kimwe ky’omutaano eky’okwikiriza nari n’okuba omwesigwa ahariwe ebiro byona eby’amagara gaawe?
Nangwa n’okushemererwa kw’abaheereza ba Yehova abeesigwa nikubaasa kuhwaho. Reeba oku orikubaasa kukugaruraho.
Okutunga Okushemererwa Kuruga omu Kwega n’Okuteekateeka (5:25)
Noobaasa kutaho bigyendererwa ki eby’omwoyo kandi okabihikiiriza?
“Taho Ebigyendererwa by’Omwoyo Kuhimbisisa Omuhangi Waawe” (Omunaara gw’Omurinzi, Gyuraayi 15, 2004)
Ahabw’enki ni kikuru kuba Omukristaayo okuzire omu by’omwoyo, kandi eki noobaasa kukikora ota?
“Gumizamu Nootunguuka, Ekiro kya Yehova Ekikuru Kiri Haihi” (Omunaara gw’Omurinzi, Mei 15, 2009)