PFUNZIRO 60
Pitirizani Kulimbisa Uxamwali Bwanu na Yahova
Kufika pa pfunziro lino, imwepo mwapfunza bzizinji pakulewa bza Yahova mwakuphatisa basa Bibliya. Bzinthu bzomwe mwapfunza bzakuthandizani kuti mumufune kwene-kwene ndipo pinango mwabzipereka kwa iye mucibatizidwa. Penu mukanati, pinango mukukumbuka kucita bzimwebzi tsapanopapa. Tsono mukabatizidwa mun’funika lini kusiya kupitiriza kukhala pa uxamwali bwakulimba na Yahova. Imwepo mun’funika kukhala pa uxamwali bwakulimba na Yahova mpaka kale-kale. Kodi mungacite tani bzimwebzi?
1. Thangwe ranyi mun’funika kupitiriza kulimbisa uxamwali bwanu na Yahova?
Tin’funika kucita nyongo kuti tipitirize kulimbisa uxamwali bwathu na Yahova. Thangwe ranyi? “Kuti tireke kupambuka pa cikhulupiro,” cathu kwa iye. (Ahebereu 2:1) Kodi n’ciyani comwe cingatithandize kupitiriza kutumikira Yahova mwakukhulupirika? Kucita basa lakupalizira na kuphata mabasa manango na nyongo pakutumikira Yahova. (Werengani Afilipi 3:16.) Kutumikira Yahova ni cinthu cakufunika kwene-kwene! — Salimo 84:10.
2. Kodi n’ciyani cinango comwe mun’funika kucita?
Napo pfunziroli ndakumalizira, pitirizani kumbacita bzinthu pa moyo wanu ninga Mkristau. Bibliya limbalewa kuti tin’funika “kubvala unthu bupsa.” (Aefezo 4:23, 24) Imwepo mukapitiriza kupfunza Fala la Mulungu na kumbagumanika pa mitsonkhano ya gwere, mun’dzapfunza bzinthu bzizinji bza Yahova na makhalidwe yace. Citani ciri-centse kuti mutewezerembo makhalidwe yaceyo. Ndipo pitirizani kucinja bzinthu bzinango pa moyo wanu kuti mukondwese Yahova.
3. Kodi Yahova angakuthandizeni tani kuti mupitirize kukhala pa uxamwali bwakulimba na iye?
Bibliya limbati: “Mulungu . . . an’dzamalizisa kukupfunzisani. Iye an’dzakulimbikisani, an’dzakupasani mphanvu na kukuthandizani.” (1 Pedru 5:10) Tentsenefe timbayezedwa kuti ticite bzinthu bzakuipa. Tsono Yahova ambatipasa bzomwe tikufunikira kuti tikhale wakukhulupirika. (Salimo 139:23, 24) Iye ambalewa kuti ankupasani cikhumbo na mphanvu kuti mumutumikire mwakukhupirika. — Werengani Afilipi 2:13.
FUFUDZANI BZINANGO
Onani bzomwe mungacite kuti mupitirize kukhala pa uxamwali bwakulimba na Yahova na momwe iye an’dzakusimbirani.
4. Pitirizani kumbalewalewa na xamwali wanu wa pa mtima
Mpembo na pfunziro la Bibliya bzingakuthandizeni kukhala pa uxamwali na Yahova. Kodi bzinthu bzimwebzi bzingakuthandizeni tani kukhala pa uxamwali bwakulimba na iye?
Werengani Salimo 62:8, ndipo mukamala cezeranani mbvunzo wakutewerayu:
-
Kuti mulimbise uxamwali bwanu na Yahova, kodi mungacite tani kuti mumbacite mipembo yabwino?
Werengani Salimo 1:2, ndipo mukamala cezeranani mbvunzo wakutewerayu:
-
Kuti mulimbise uxamwali bwanu na Yahova, kodi mungacite tani kuti mugumane phindu na kuwerenga kwanu Bibliya?
Kodi mungacite tani kuti pfunziro lanu la pamwekha limbakudekereni? Kuti mudziwe bzinango, onani VIDIYO, ndipo mukamala cezeranani mibvunzo ikutewerayi.
-
Kodi ni bzinthu bziponi bzomwe mwawona m’vidiyoyi bzomwe mukufuna kubziphatisa basa?
-
Kodi mukufuna kupfunza bzinthu bziponi?
5. Nembani ndondomeko ya bzinthu bzomwe mukufunakucita pakutumikira Yahova
Kukhala na ndondomeko pakutumikira Yahova kun’dzakuthandizani kupitiriza kukhala pa uxamwali bwakulimba na iye. Onani VIDIYO, ndipo mukamala cezeranani mbvunzo wakutewerayu.
-
Mu vidiyoyi, kodi Cameron adagumana tani phindu thangwe ra kukhala na ndondomeko?
Ni wentse lini omwe angakwanise kuyenda kukapalizira komwe kukufunikira apalizi azinji. Tsono tentsenefe tingakhale na ndondomeko ya bzinthu bzomwe tingakwanise kucita. Werengani Salimo 21:5, ndipo mukamala onani ndondomeko ya bzinthu bzomwe mungafune kucita . . .
-
mu gwere.
-
mu utumiki bwakumunda.
Kodi mafala ya mu vesiri yangakuthandizeni tani kukwanirisa ndondomeko yanu?
Bzinthu bzinango bzomwe mungafune kucita
-
Kukulisa luso pakucita mpembo.
-
Kuwerenga Bibliya lentse.
-
Kudziwa abale wentse wa m’gwere.
-
Kuyambisa na kucitisa pfunziro la Bibliya.
-
Kucita upainiya bwakuthandiza ayai upainiya bwakukhazikika.
-
Penu ndimwe m’bale, citani nyongo kuti mukhale mtumiki wakuthandiza.
6. Khalani na moyo wakukondwa mpaka kale-kale!
Werengani Salimo 22:26, ndipo mukamala cezeranani mbvunzo wakutewerayu:
-
Kodi mungacite ciyani kuti mukhale na moyo wakukondwa ntsku zino na kutsogolo?
KODI MWAPFUNZA CIYANI?
Pitirizani kulimbisa uxamwali bwanu na Yahova ndipo khalani na ndondomeko ya bzinthu kuti mucite pakutumikira Yahova. Mukacita bzimwebzi mun’dzakhala na moyo wakukondwa mpaka kale-kale!
Mibvunzo yakubwerezera
-
Kodi n’ciyani cimbakutsimikizani kuti Yahova an’dzakuthandizani kuti mumutumikire mwakukhulupirika?
-
Kodi mungacite tani kuti mulimbise uxamwali bwanu na Yahova?
-
Kodi kukhala na ndondomeko ya bzinthu kuti mucite pakutumikira Yahova, kungakuthandizeni tani?
ONANI POMWE IBZI
Kodi n’ciyani comwe Yahova ambafuna, kundomunamata kabodzi basi, ayai kumunamata mwakukhulupirika moyo wanu wentse?
Napo mtumiki wakukhulupirika wa Yahova angaluze cikondweso. Onani bzomwe bzingamuthandize kukhala pomwe wakukondwa.
Gumanani Pomwe Cikondweso mwa Kumbapfunza na Kumbakumbukira (5:25)
Kodi mungacite tani kuti mukhale na ndondomeko ya bzinthu kuti mucite pakutumikira Yahova na kuikwanirisa?
Thangwe ranyi kukhala Mkristau wakukhwima mwauzimu n’kwakufunika ndipo imwepo mungacite tani kuti mukhale m’bodzi wa iwo?
Imwepo Mungakomedwembo na
MIBVUNZO YAKUBVUNZIDWA KAWIRI-KAWIRI
Kodi Pfunziro la Bibliya N’ciyani?
Onani mitawiro ya mibvunzo ya programa yathu ya pfunziro la Bibliya lafovolo.
