BARUMSA 60
Guddina Gochuu Kee Itti Fufi
Qoʼannaa Kitaaba Qulqulluu kee irraa hanga ammaatti wantoota hedduu baratteetta. Wanti baratte Yihowaa akka jaallatuu fi tarii immoo isaaf of murteessitee akka cuuphamtu si kakaasee taʼuu dandaʼa. Yihowaadhaaf of murteessitee hin cuuphamne taanaan immoo dhiheenyatti kana gochuuf yaadaa jirta taʼa. Haa taʼu malee guddinni kee cuuphaa irratti hin dhaabbatu. Bara baraaf Yihowaatti dhihaachuu kee itti fufuu dandeessa. Akkamitti?
1. Michummaa Yihowaa wajjin qabdu cimsachuu kee itti fufuu kan qabdu maaliifi?
Michummaa Yihowaa wajjin qabnu cimsachuu keenya itti fufuuf jabaannee hojjechuu qabna. Maaliifi? ‘Suutuma suuta [Yihowaa] irraa akka hin fagaanneefi.’ (Ibroota 2:1) Amanamummaadhaan Yihowaa tajaajiluu keenya itti fufuuf maaltu nu gargaara? Hojii lallabaa irratti xiyyeeffachuu fi karaawwan Waaqa keenya caalaatti tajaajiluuf nu gargaaran kan biroo barbaaduu dandeenya. (Filiphisiyus 3:16 dubbisi.) Yihowaa tajaajiluun jireenya hunda irra caalu argamsiisa!—Faarfannaa 84:10.
2. Wanta kan biraa akkamii gochuu kee itti fufuu qabda?
Qoʼannaa Kitaaba Qulqulluu kee amma xumuraa kan jirtu taʼus, jireenyi Kiristiyaanummaa kee garuu itti fufa. Kitaabni Qulqulluun, ‘namummaa haaraa uffachuu’ akka qabnu dubbata. (Efesoon 4:23, 24) Dubbii Waaqayyoo qoʼachuu fi walgaʼii gumii irratti argamuu kee yoo itti fufte, waaʼee Yihowaa fi waaʼee amaloota isaa wanta haaraa baratta. Karaawwan itti jireenya kee keessatti amaloota Yihowaa caalaatti calaqqisiisuu itti dandeessu argachuuf yaali. Yihowaa gammachiisuuf jijjiirama barbaachisaa taʼe kam iyyuu gochuu kee itti fufi.
3. Yihowaan guddina akka gootu kan si gargaaru akkamitti?
Kitaabni Qulqulluun, “Waaqayyo . . . leenjii keessan ni xumura. Inni isin cimsa, isin jabeessa, akkasumas hundee jabaa irra isin dhaaba” jedha. (1 Pheexiros 5:10) Hundi keenya qorumsi nu mudata. Yihowaan garuu wanta qorumsa kana dandamachuuf nu barbaachisu nuuf kenna. (Faarfannaa 139:23, 24) Inni fedhii fi humna amanamummaadhaan isa tajaajiluuf si barbaachisu akka siif kennu waadaa galeera.—Filiphisiyus 2:13 dubbisi.
CAALAATTI BARADHU
Guddina gochuu kee itti fufuu kan dandeessu akkamitti akka taʼee fi Yihowaan kan si eebbisu akkamitti akka taʼe ilaali.
4. Michuu kee isa hunda irra caalu haasofsiisuu fi isa dhaggeeffachuu kee itti fufi
Kadhannaanii fi Kitaaba Qulqulluu qoʼachuun michuu Yihowaa akka taatu si gargaaraniiru. Maarree wantoonni kun caalaatti Yihowaatti dhihaachuuf kan si gargaaran akkamitti?
Faarfannaa 62:8 dubbisaa, achiis gaaffii kana irratti mariʼadhaa:
-
Michummaa Yihowaa wajjin qabdu cimsachuuf qabiyyee kadhannaa kee fooyyessuu kan dandeessu akkamitti?
Faarfannaa 1:2 fi miiljalee isaa dubbisaa, achiis gaaffii kana irratti mariʼadhaa:
-
Michummaa Yihowaa wajjin qabdu cimsachuuf dubbisa Kitaaba Qulqulluu kee fooyyessuu kan dandeessu akkamitti?
Qoʼannaa dhuunfaa kee irraa caalaatti fayyadamuu kan dandeessu akkamitti? Yaadawwan tokko tokko ilaaluuf, VIIDIYICHA taphachiisaa, achiis gaaffiiwwan armaan gadii irratti mariʼadhaa.
-
Yaadawwan viidiyicha irratti ibsaman keessaa isa kam hojii irra oolchuu dandeessa?
-
Waaʼee maalii qoʼachuu barbaadda?
5. Galma hafuuraa baafadhu
Tajaajila Yihowaadhaaf dhiheessitu irratti galma baafachuun guddina gochuu kee itti fufuuf si gargaara. VIIDIYICHA taphachiisaa, achiis gaaffii armaan gadii irratti mariʼadhaa.
-
Viidiyicha irratti akkuma ibsame, Kaameron galma hafuuraa baafachuun ishii kan ishii fayyade akkamitti?
Biyya biraa deemee lallabuu kan dandaʼu nama hunda miti. Haa taʼu malee, hundi keenya galmawwan irra geenyu baafachuu dandeenya. Fakkeenya 21:5 dubbisaa, achiis haalawwan armaan gadii keessatti galma akkamii baafachuu akka dandeessu mariʼadhaa:
-
Gumii keessatti.
-
Tajaajila irratti.
Yaanni caqasa kana irratti argamu galma kee irra gaʼuuf si gargaaruu kan dandaʼu akkamitti?
Galmawwan baafachuu dandeessu tokko tokko
-
Qabiyyee kadhannaa kee fooyyessuu.
-
Kitaaba Qulqulluu guutummaatti dubbisuu.
-
Obboloota gumii keessa jiran hundaa wajjin wal baruu.
-
Qoʼannaa Kitaaba Qulqulluu jalqabsiisuu fi geggeessuu.
-
Qajeelchaa gargaaraa ykn qajeelchaa yeroo hundaa taatee tajaajiluu.
-
Obboleessa yoo taate tajaajilaa gumii taʼuuf carraaquu.
6. Bara baraaf gammachuudhaan jiraadhu!
Faarfannaa 22:26 dubbisaa, achiis gaaffii kana irratti mariʼadhaa:
-
Ammas taʼe bara baraaf gammachuudhaan jiraachuuf maal gochuu dandeessa?
MAAL BARATTE?
Michummaa Yihowaa wajjin qabdu cimsachuu fi galmawwan hafuuraa baafachuu kee itti fufi. Akkas yoo goote, bara baraaf gammachuudhaan jiraachuu dandeessa!
Irra Deebii
-
Yihowaan amanamummaadhaan isa tajaajiluuf akka si gargaaru mirkanaaʼaa taʼuu kan dandeessu maaliifi?
-
Michummaa Yihowaa wajjin qabdu cimsachuu kan dandeessu akkamitti?
-
Galma hafuuraa qabaachuun kee guddina gochuuf kan si gargaaru akkamitti?
QORANNOO DABALATAA GODHI
Yihowaan gocha ajaaʼibsiisaa isaaf buluu keenya argisiisu siʼuma tokko raawwachuu keenyaaf moo jireenya keenya guutuu isaaf amanamoo taanee jiraachuu keenyaaf iddoo guddaa kenna?
Tajaajilaan Yihowaa amanamaa taʼe illee gammachuu isaa dhabuu dandaʼa. Deebisanii gammachuu argachuun kan dandaʼamu akkamitti akka taʼe ilaali.
Galma hafuuraa baafachuu fi galma sana irra gaʼuu kan dandeessu akkamitti?
“Uumaa Kee Jajachuuf Galmawwan Hafuuraa Baafadhu” (Masaraa Eegumsaa, Adoolessa 15, 2004)
Kiristiyaana bilchaataa taʼuun barbaachisaa kan taʼe maaliifi? Bilchaataa taʼuu kan dandeessu hoo akkamitti?
Kanneen Armaan Gadiis ni Jaallatta Taʼa
GAAFFIIWWAN YEROO BAAYʼEE GAAFATAMAN
Qoʼannaan Kitaaba Qulqulluu Dhugaa Baatonni Yihowaa Geggeessan Maali Dha?
Qoʼannaa tolaan Dhugaa Baatonni Yihowaa geggeessan irratti, hiikkaa Kitaaba Qulqulluu kam iyyuu fayyadamuu dandeessa. Maatii ykn michoota kee affeeruu dandeessa.
