LEKSION 60
Itultuloy Moy Onaligwas
Dakel lay naaralan mo tungkol ed si Jehova manlapu nen ginmapo kan nanaral na Biblia. Lapud saratan ya naaralan mo, naar-arom si Jehova. Kanian ompan indedikam lay sarilim ed sikato tan nampabautismo. No andi ni, ompan asingger la. Pero anggano abautismoan ka la, agditan anampot so iyaligwas mo. Sarag moy onapit ed si Jehova anggad angga. Panon ey?
1. Akin et itultuloy mon pabiskegen so pikakaarom ed si Aman Jehova?
Kailangan tayoy mansagpot ya tuloytuloy ya pabiskegen so pikakaaro tayo ed si Aman Jehova. Akin ey? “Pian ag-itayon balot niyanor a paarawi.” (Hebreo 2:1) Antoy makatulong pian tuloytuloy tayon makapanlingkor ed si Jehova? Dapat, regular tayon manpulong tan mananap na arum ya paraan pian mas napanlingkoran tayo so Dios tayo. (Basaen so Filipos 3:16.) Anggapo lay sankaabigan ya nagawaan tayo nen say panlingkor ed si Jehova!—Salmo 84:10.
2. Anto ni ray itultuloy mon gawaen?
Anggano manampot lay panaral mo ed sayan publikasyon, agdia manampot so pagmaliw mon Kristiano. Ibabaga na Biblia ya kailangan tayon “isulong so balon personalidad.” (Efeso 4:23, 24) No tuloytuloy mon aralen so Salita na Dios, tan regular kan miaral, dakel ni balon naamtaan mo tungkol ed si Jehova tan ed saray kualidad to. Mananap kay arum nin paraan ya mas naalig moy personalidad to. Tan no wala ray kailangan mon umanen, pankimeyan mo iratan pian napaliket moy Jehova.
3. Panon kan tulongan nen Jehova ya onaligwas?
Ibabaga na Biblia: “Say Dios . . . et sumpalen toy pangipapasal tod sikayo. Gawaen to kayon mapekder, gawaen to kayon mabiskeg, iletneg to kayon malet.” (1 Pedro 5:10) Amin tayo et nasubok. Pero iter nen Jehova so nakaukolan tayo pian nasarag tayo iratan. (Salmo 139:23, 24) Impromisa to ya ikdan to itayo na panlabay tan pakayari pian matoor tayon makapanlingkor ed sikato.—Basaen so Filipos 2:13.
DAKEL NI NAARALAN MO
Amtaen no panon kan tuloytuloy ya onaligwas tan no panon kan bendisyonan nen Jehova.
4. Itultuloy moy mitongtong tan ondengel ed best Friend mo
Akatulong ed sika so pikakasi tan panag-aral na Biblia pian nakaarom si Jehova. Kanian balibali no itultuloy mo iratan pian lalo kan onapit ed sikato.
Basaen so Salmo 62:8, insan ebatan iya:
-
Pian lalon onelet so pikakaarom ed si Jehova, anto ni paaligwasen mo ed pikakasim?
Basaen so Salmo 1:2 tan paimanod leksab, insan ebatan iya:
-
Pian lalon onelet so pikakaarom ed si Jehova, anto ni paaligwasen mo ed panagbasam na Biblia?
Anto ni gawaen mo pian mas nagunggonaan ka ed personal ya panag-aral mo na Biblia? Pian makala ka na ideya, i-play so VIDEO, insan ebatan iraya.
-
Dinan ed saray suhestion ed video so labay mon aligen?
-
Anto ran topic so labay mon aralen?
5. Manggawa ka na espiritual iran goal mo
No wala ray goal mo diad panaglingkor mod si Jehova, tuloytuloy so iyaligwas mo. I-play so VIDEO, insan ebatan iya.
-
Diad video, panon ya akatulong ed si Cameron iray espiritual ya goal to?
Aliwan amin et sarag day onalis ed arum ya bansa pian manpulong. Pero, sarag tayon amin so manggawa na goal, amay nasarag tayo. Basaen so Proverbio 21:5, insan isip mon maong no anto ray goal mo . . .
-
diad kongregasyon.
-
diad ministeryo.
Panon ya makatulong so prinsipyo ed sayan teksto pian nagawaan mo ray goal mo?
Nia ray balibalin goal
-
Paaligwas moy panagpikasim.
-
Basam so interon Biblia.
-
Kabaten iray agagi diad kongregasyon yo.
-
Mananap kay iyaralan mo na Biblia.
-
Man-auxilliary payunir o man-regular payunir ka.
-
No sakey kan brother, pankimeyan moy magmaliw ya ministeryal a lingkor.
6. Panliketan moy bilay ya anggapoy anggaan!
Basaen so Salmo 22:26, insan ebatan iya:
-
Antoy gawaen mo pian maliket so bilay mo natan ya anggad angga?
SUMARYO
Itultuloy mon paeleten so pikakaarom ed si Jehova tan manggawa ka na espiritual iran goal. Diad ontan et panliketan mo so bilay ya anggapoy anggaan!
Rebyu
-
Akin et segurado ka ya tulongan ka nen Jehova pian matoor kan makapanlingkor ed sikato?
-
Panon mon napaelet so pikakaarom ed si Jehova?
-
Panon ya makatulong iray espiritual ya goal mo pian onaligwas ka?
DISKOBRIEN
Antoy mas papablien nen Jehova, amay maminpinsan ya walay gawaen tayon agnalinglingwanan parad sikato odino amay tuloytuloy tayon manmatoor ed sikato legay bilay?
Anggan saray matoor ya lingkor nen Jehova et naeermenan met no maminsan. Amtaen no panon tayon napapawil so liket.
Anto ray espiritual ya goal mo tan panon mo iratan ya nagawaan?
“Usaren Iray Espiritual a Kalat Pian Igloria so Manamalsam” (Say Panag-bantayan, Hulyo 15, 2004)
Akin et importante ya magmaliw kan maespiritual ya Kristiano, tan antoy gawaen mo pian magmaliw kan ontan?
Ompan Nagustoan Mo Met
MABETBET YA ITETEPET
Anto tay Panag-aral na Biblia ya Iyoopresi na Saray Tasi nen Jehova?
Diad sayan libren interactive ya paraan na panag-aral ya iyoopresi na Saray Tasi nen Jehova, sarag mon usaren so anggan anton patalos na Biblia. Imbitaan so interon pamilyam odino anggan siopan kaarom ya labay day milad sika.
