Durante e kurso di Beibel akí, bo a siña hopi kos tokante Yehova. Loke bo a siña a laga bo amor p’e krese asina tantu ku probablemente bo a dediká bo mes na dje i batisá. Si esei no ta e kaso ainda, kisas bo ta pensando pa hasi esei pronto. Pero despues ku bo batisá, bo tin ku sigui hasi esfuerso pa hala mas serka Yehova. Sí, bo por sigui hala serka dje pa semper. Kon bo por hasi esei?

1. Dikon bo mester sigui fortalesé bo amistat ku Yehova?

Nos mester hasi nos máksimo esfuerso pa sigui fortalesé nos amistat ku Yehova. Dikon? “Pa nunka nos no drif bai” for di dje. (Hebreonan 2:1) Kiko por yuda nos sigui sirbi Yehova fielmente? Algu ku por yuda nos ta di keda okupá ku e trabou di prediká i buska otro manera òf oportunidat pa hasi mas den nos sirbishi na Yehova. (Lesa Filipensenan 3:16.) Sirbi Yehova ta e mihó kos ku nos por hasi den bida!—Salmo 84:10.

2. Kiko mas bo mester sigui hasi?

Aunke bo kurso di Beibel ta yegando su final, bo bida komo un sirbidó di Yehova a kaba di kuminsá. Beibel ta bisa ku nos mester “bisti e personalidat nobo.” (Efesionan 4:23, 24) Segun ku bo ta sigui studia Palabra di Dios i bai reunion, lo bo siña kos nobo tokante Yehova i su kualidatnan. Wak kon bo por imitá su kualidatnan mas tantu den bo bida. Anto sigui hasi e kambionan nesesario pa hasi Yehova kontentu.

3. Kon Yehova lo yuda bo sigui fortalesé bo amistat kuné?

Beibel ta bisa: “Dios . . . mes lo terminá [bo] formashon; lo e hasi [bo] firme, lo e hasi [bo] fuerte.” (1 Pedro 5:10) Nos tur ta haña nos ku tentashon pa hasi loke ta robes. Pero Yehova ta duna nos loke nos tin mester pa keda fuerte i resistí tentashon. (Salmo 139:23, 24) E ta primintí ku lo e duna bo tantu e deseo komo e poder pa sigui sirbié fielmente.—Lesa Filipensenan 2:13.

 KIKO MAS NOS POR SIÑA?

4. Sigui komuniká ku bo mihó Amigu

Loke a yuda bo bira amigu di Yehova ta orashon i estudio di Beibel. Kon e dos kosnan akí por yuda bo hala asta mas serka Yehova?

Lesa Salmo 62:8. Despues, analisá e siguiente pregunta:

• Kon bo por mehorá bo orashonnan i asina hasi bo amistat ku Yehova mas fuerte?

Lesa Salmo 1:2. Despues, analisá e siguiente pregunta:

• Kon bo por benefisiá mas di bo lesamentu di Beibel i asina hasi bo amistat ku Yehova mas fuerte?

Kiko bo por hasi pa benefisiá mas di bo estudio personal di Beibel? Pa wak algun sugerensia, pasa e VIDIO. Despues, analisá e siguiente preguntanan:

• Kua di e sugerensianan den e vidio lo bo ke sigui?

• Tokante ki tópiko lo bo ke studia?

 RESÚMEN

Sigui fortalesé bo amistat ku Yehova i pone meta spiritual. Si bo hasi eseinan, bo por disfrutá di bida pa semper!

Repaso

• Dikon bo por tin sigur ku Yehova lo yuda bo sirbié fielmente?

• Kon bo por fortalesé bo amistat ku Yehova?

• Ora bo pone meta spiritual, kon esei por yuda bo fortalesé bo amistat ku Yehova?