Durante e curso di Bijbel aki, bo a siña hopi cos tocante Jehova. Loke bo a siña a laga bo amor p’e crece asina tanto cu probablemente bo a dedica bo mes na dje y batisa. Si esey no ta e caso ainda, kisas bo ta pensando pa haci esey pronto. Pero despues cu bo batisa, bo tin cu sigui haci esfuerso pa hala mas cerca Jehova. Si, bo por sigui hala cerca dje pa semper. Con bo por haci esey?

1. Dicon bo mester sigui fortalece bo amistad cu Jehova?

Nos mester haci nos maximo esfuerso pa sigui fortalece nos amistad cu Jehova. Dicon? “Pa nunca nos no drif bay” for di dje. (Hebreonan 2:1) Kico por yuda nos sigui sirbi Jehova fielmente? Esey ta door di keda ocupa cu e trabou di predica y busca otro manera of oportunidad pa haci mas den nos sirbishi na Jehova. (Lesa Filipensenan 3:16.) Sirbi Jehova ta e mihor cos cu nos por haci den bida!​—Salmo 84:10.

2. Kico mas bo mester sigui haci?

Aunke bo curso di Bijbel ta yegando su final, bo bida como un sirbidor di Jehova a caba di cuminsa. Bijbel ta bisa cu nos mester “bisti e personalidad nobo.” (Efesionan 4:23, 24) Segun cu bo ta sigui studia Bijbel y bay reunion, lo bo siña cos nobo tocante Jehova y su cualidadnan. Wak con bo por imita su cualidadnan mas tanto den bo bida. Anto sigui haci e cambionan necesario pa haci Jehova contento.

3. Con Jehova lo yuda bo sigui fortalece bo amistad cu ne?

Bijbel ta bisa: “Dios ... mes lo termina [bo] formacion; lo e haci [bo] firme, lo e haci [bo] fuerte.” (1 Pedro 5:10) Nos tur ta haya nos cu tentacion pa haci loke ta robes. Pero Jehova ta duna nos loke nos tin mester pa keda fuerte y resisti tentacion. (Salmo 139:23, 24) E ta priminti cu e lo duna bo tanto e deseo como e poder pa sigui sirbie fielmente.​—Lesa Filipensenan 2:13.

 KICO MAS NOS POR SIÑA?

4. Sigui comunica cu bo mihor Amigo

Loke a yuda bo bira amigo di Jehova ta oracion y estudio di Bijbel. Con e dos cosnan aki por yuda bo hala hasta mas cerca Jehova?

Lesa Salmo 62:8. Despues, analisa e siguiente pregunta:

• Con bo por mehora bo oracionnan y asina haci bo amistad cu Jehova mas fuerte?

Lesa Salmo 1:2. Despues, analisa e siguiente pregunta:

• Con bo por mehora bo lesamento di Bijbel pa bo amistad cu Jehova bira mas fuerte?

Kico bo por haci pa beneficia mas di bo estudio personal di Bijbel? Pa wak algun sugerencia, pasa e VIDEO. Despues, analisa e siguiente preguntanan:

• Cua di e sugerencianan den e video lo bo kier sigui?

• Tocante ki topico lo bo kier studia?

 RESUMEN

Sigui fortalece bo amistad cu Jehova y pone meta spiritual. Si bo haci esey, bo por disfruta di bida pa semper!

Repaso

• Dicon bo por tin sigur cu Jehova lo yuda bo sirbie fielmente?

• Con bo por fortalece bo amistad cu Jehova?

• Ora bo pone meta spiritual, con esey por yuda bo fortalece bo amistad cu Jehova?