ایس بائبل کورس دے دوران تُسی یہوواہ خدا بارے بوہت کجھ سکھیا اے۔ ایہدی وجہ توں شاید تواڈے دل چ اوہدے لئی بوہت محبت پیدا ہو گئی ہووے تے تُسی اپنی زندگی اوہدے ناں کر کے بپتسمہ لے لیا ہووے۔ پر جے تُسی حالے تک اِنج نئیں کیتا تے شاید تُسی چھیتی اِنج کرن بارے سوچ رہے او۔ پر بپتسمہ لین دے بعد وی توانوں اوہدے نال اپنا رشتہ مضبوط کردے رہنا چاہی دا اے کیونکہ یہوواہ دے نیڑے جان دا سلسلہ کدی نئیں رُکدا۔ پر تُسی یہوواہ نال اپنا رشتہ مضبوط رکھن لئی کیہہ کر سکدے او؟‏

1.‏ توانوں یہوواہ نال اپنا رشتہ مضبوط کیوں کردے رہنا چاہی دا اے؟‏

سانوں پوری کوشش کرنی چاہی دی اے کہ یہوواہ نال ساڈا رشتہ ہمیشاں مضبوط رہوے تاکہ اَسی کدی وی اوہدے توں دُور نہ ہوئیے۔‏ (‏عبرانیوں 2:‏1‏)‏ اَسی کیہہ کر سکنے آں تاکہ اَسی وفاداری نال یہوواہ دی خدمت کردے رہیے؟ اَسی پوری لگن نال مُنادی دے کم چ حصہ لے سکنے آں تے ہور چنگی طرحاں اوہدی خدمت کرن دے فرق فرق موقعے لبھ سکنے آں۔ (‏فِلپّیوں 3:‏16 نُوں پڑھو۔)‏ یہوواہ دی خدمت کرن توں بہتر ہور کجھ نئیں ہو سکدا۔—‏زبور 84:‏10‏۔‏

2.‏ توانوں ہور کیہہ کردے رہنا چاہی دا اے؟‏

ایہہ بائبل کورس تے ہُن ختم ہون والا اے پر اِک مسیحی دے طور تے تواڈی زندگی چلدی رہوے گی۔ بائبل چ دَسیا گیا اے کہ سانوں نوِیں شخصیت پان دی لوڑ اے۔‏ (‏اِفسیوں 4:‏23، 24‏)‏ خدا دا کلام پڑھدے رہوو تے باقاعدگی نال عبادتاں چ شامل ہوندے رہوو۔ اِنج تُسی یہوواہ خدا تے اوہدیاں خوبیاں بارے نوِیاں نوِیاں گلاں سکھدے رہوو گے۔ یہوواہ دی مثال تے چلدے رہوو تے اپنی زندگی چ اوہ تبدیلیاں کردے رہوو جیہڑیاں یہوواہ نُوں خوش کرن لئی ضروری نیں۔‏

3.‏ یہوواہ خدا تواڈی مدد کیویں کرے گا تاکہ تُسی اوہدے نال اپنا رشتہ مضبوط رکھ سکو؟‏

بائبل چ لکھیا اے:‏ خدا تواڈی چنگی طرحاں تربیت کرے گا۔ اوہ توانوں مضبوط بنائے گا۔ اوہ توانوں طاقت بخشے گا۔ اوہ توانوں قائم کرے گا۔‏ (‏1-‏پطرس 5:‏10‏)‏ سانوں ساریاں نُوں ازمیشاں دا سامنا کرنا پیندا اے۔ پر یہوواہ اوہناں دا مقابلہ کرن لئی فرق فرق طریقیاں نال ساڈی مدد کردا اے۔ (‏زبور 139:‏23، 24‏)‏ اوہدا وعدہ اے کہ اوہ توانوں خواہش تے طاقت دونویں عطا کرے گا تاکہ تُسی وفاداری نال اوہدی خدمت کر سکو۔—‏فِلپّیوں 2:‏13 نُوں پڑھو۔‏

 ہور سوچ‌وچار لئی

4.‏ اپنے سب توں چنگے دوست نال گل کردے رہوو تے اوہدی گل سُن دے رہوو

دُعا کرن تے بائبل دا مطالعیا کرن نال تُسی یہوواہ دے دوست بنے او۔ ایہناں دونواں کماں دے ذریعے تُسی یہوواہ دے ہور وی نیڑے کیویں جا سکدے او؟‏

زبور 62:‏8 نُوں پڑھو تے فیر ایس سوال تے گل بات کرو:‏

• تُسی یہوواہ نال اپنے رشتے نُوں مضبوط کرن لئی اپنیاں دُعاواں چ بہتری کیویں لیا سکدے او؟‏

زبور 1:‏2 نُوں پڑھو تے فیر ایس سوال تے گل بات کرو:‏

• تُسی یہوواہ نال اپنے رشتے نُوں مضبوط کرن لئی بائبل دا مطالعیا ہور چنگی طرحاں کیویں کر سکدے او؟‏

تُسی بائبل دے مطالعے توں بوہتا فائدہ حاصل کرن لئی کیہہ کر سکدے او؟ کجھ ودھیا مشوریاں لئی ویڈیو چلاؤ تے فیر ایہناں سوالاں تے گل بات کرو:‏

• تُسی ایس ویڈیو چ دِتے گئے کیہڑے مشوریاں تے عمل کر سکدے او؟‏

• تُسی کیہڑے موضوعاں بارے پڑھنا چاہوو گے؟‏

 خلاصہ

یہوواہ نال اپنے رشتے نُوں مضبوط کردے رہوو تے اوہدی ہور زیادہ خدمت کرن لئی منصوبے بناؤ۔ اِنج تُسی ہُن تے ہمیشاں تک خوشیاں بھری زندگی گزار سکو گے۔‏

دہرائی

• تُسی ایہہ یقین کیوں رکھ سکدے او کہ یہوواہ تواڈی مدد کرے گا تاکہ تُسی وفاداری نال اوہدی خدمت کر سکو؟‏

• تُسی یہوواہ نال اپنا رشتہ ہور مضبوط کیویں کر سکدے او؟‏

• یہوواہ دی خدمت لئی منصوبے بنان نال تُسی اوہدے ہور نیڑے کیویں ہو جاؤ گے؟‏