Atraves des studu di Biblia, bu aprindi manga di kusas aserka di Jeova. Kusas ku bu aprindi fasi pa bu amal ciu dimas i talves bu dedika ja bu vida pa rel i bu batisa. Si bu ka fasil inda talves bu sta na pensa fasil nin i ka na tarda. Ma dipus di batismu bu ka na para kontinua pertusi di Jeova. Bu pudi kontinua pertusi mas di Jeova pa sempri. Kuma ku bu pudi fasi kila?

1. Ke ku manda bu dibi di kontinua fortalisi bu amizadi ku Jeova?

No pirsisa di fasi sforsu garandi pa kontinua fortalisi no amizadi ku Jeova. Pabia? “Pa ka no disvia di” Jeova. (Ebreus 2:1) Ke ku pudi judanu kontinua sirbi Jeova ku fidelidadi? No pudi manti okupadu na tarbaju di pregason i jubi utru manera ku no pudi sirbi no Deus mas minjor. (Lei Filipensis 3:16.) Sirbi Jeova i minjor manera di vivi! — Salmu 84:10.

2. Ke mas ku bu dibi di kontinua fasi?

Apesar di kuma es studu di Biblia ku bu tene na kaba gosi, ma bu vida suma kriston na kontinua. Biblia fala no pirsisa di “bisti nobu naturesa”. (Efésius 4:23, 24) Si bu kontinua studa Palabra di Deus i mati runions di kongregason, bu na aprindi nobu kusas aserka di Jeova ku si maneras di sedu. Jubi kuma ku bu pudi kopia di pertu maneras di sedu di Jeova na bu vida. Kontinua fasi kualker mudansas ki pirsis pa kontenta Jeova.

3. Kuma ku Jeova na judau kontinua tene amizadi ku el?

Biblia fala: “Deus . . . ta fasi bos kompletu, i ta firmanta bos, i ta fortifika bos, i ta da bos firmi alisersu.” (1 Pedru 5:10) Anos tudu no ta nfrenta tentason. Ma Jeova ta danu ke ku no pirsisa del pa risisti elis. (Salmu 139:23, 24) I purmiti danu diseẑu ku puder pa sirbil ku fidelidadi. — Lei Filipensis 2:13.

 APRINDI MAS

4. Kontinua papia i sukuta bu minjor amigu

Orason ku studu di Biblia judau sedu amigu di Jeova. Kuma ku es atividadis pudi judau pertusi mas del?

Lei Salmu 62:8 dipus bo kombersa aserka des purgunta:

• Pa fortalisi bu amizadi ku Jeova, kuma ku bu pudi minjoria kualidadi di bu orasons?

Lei Salmu 1:2, dipus bo kombersa aserka des purgunta:

• Pa fortalisi bu amizadi ku Jeova, kuma ku bu pudi minjoria bu leitura di Biblia?

Ke ku bu pudi fasi pa aproveita mas di bu studu pesual? Pa oja algun ideia di kila, mostra VIDEO, dipus bo kombersa aserka des purguntas:

• Kal suẑestons nes video ku bu pudi aplika?

• Kal asuntus ku bu na gosta di studa?

 RUSUMU

Kontinua fortalisi bu amizadi ku Jeova i fiksa objetivus spiritual. Asin bu na pudi tene un vida filis pa sempri!

Rekapitulason

• Ke ku manda bu pudi tene sertesa di kuma Jeova na judau pa bu sirbil ku fidelidadi?

• Kuma ku bu pudi fortalisi bu amizadi ku Jeova?

• Kuma ku objetivus spiritual pudi judau fortalisi bu amizadi ku Jeova?