Bibliata estudiar galaycushgayquipita canancamaga achcatanachi yachacuyculashcanqui. Ichanga bautizaduna caycanqui. O manaraj bautizacushga carga maynachi yarpaycanqui imay junajpaj. Bautizacurirpis Jehovapita yachacunapäga imaycaraj caycan. ¿Imata rurartaj Taytalanchi Jehovataga masraj cuyayculanqui? Ricärishun.

1. ¿Imanirtaj Jehovata cuyashgayquega ushacäcunmanchu?

Waran waranmi calpachacunanchi Jehovapita mana raquicäcunapaj. Mana calpachacurga ni “mana wiyacorga llutanmanpis chayashwanmi” (Hebreos 2:1). ¿Imacunataj yanapämäshun Jehovata sirviycarla caycänapaj? Diospita ganas ganasla yachachicuycashwan y congregaciunninchicho imaycata rurar cushi cushila yanapacuycashwan (leiriy Filipenses 3:16). ¡Jehovata sirvishgayquipitaga imaypis arrepenticunquichu! (Salmo 84:10).

2. ¿Ima mastaj caycan ruranayquipaj?

Cay libruta estudiar ushashgana captiquipis, cristianuno cawacuyniquega chayraj galaycuycan. Bibliaga ninmi “mushoj runanöna” cawacunapaj (Efesios 4:23, 24). Diospa Palabranpita yachacuycarla caycaptiquega y reuniunmanpis mana faltaylapa aywaptiquega masrämi Jehovapita yachacunqui. Payga cuyapäcoj Diosmi, paynola canayquipaj calpachacunquiman. Waran waran yarpachacunquiman ‘¿rurashgäcunawan Jehovata cushichishächuraj o laquichishächuraj?’ nir.

3. ¿Imanoraj Jehová yanapäshunqui paylata sirvir caycänayquipaj?

Biblia cayno nin: “Tayta Diosninchi [...] alliman churashunquipaj, sumaj balurta goshunquipaj, allillata cachishunquipaj” (1 Pedro 5:10). Chauraga ima pruebacunapapis pasaptinchega Jehová yanapämäshunmi aguantanapaj (Salmo 139:23, 24). Jina yanapämäshunmi alicunalata rurayta munaptinchega (leiriy Filipenses 2:13).

 SHUMAJ YACHACURCUNAPAJ

4. Diostaga mana gongaylapa mañacunayqui

Mañacushgayquipis y Bibliata estudiashgayquipis mayna yanapäshushcanqui Jehovapa amigun canayquipaj. ¿Jinalachuraj cananpis ruraycanquiman? ¿Imanoraj chayta ruranquiman?

Leipäcuy Salmo 62:8 y caypita parlapacäriy:

• Imano mañacushgayquichomi ricacämunga Jehovata cuyashgayqui. ¿Diosta mañacushgayquicho imanoraj parlapanquiman?

Leipäcuy Salmo 1:2 y caypita parlapacäriy:

• Alimi canga Bibliayquita cutin cutin leipaptiquega. ¿Imanoraj chayta ruranquiman?

Diospita más yachacuyta munarga y ‘¿imapitaraj yachacöman?’ nerga, cay VIDEUTA ricapäcuy. Nircur caycunapita parlapacäriy:

• ¿Imacunachotaj cay video yanapäshunqui?

• ¿Imacunapitataj yachacuyta munanquiman?

 ICHIC YACHACUY

Waran waran calpachacuy Jehová Diosta cuyashgayqui mana ushacänanpaj y payta sirviycarla caycänayquipaj. Chayta rurarga, ¡cushishgalami imaypis cawanqui!

Yarpänapaj

• Jehovalata sirvinayquipäga, ¿imanirtaj seguro caycanquiman pay yanapäshunayquipaj?

• ¿Imatataj ruranquiman Jehovata cuyashgayqui mana ushacänanpaj?

• ¿Imanirtaj ali canman Diospa marcancho masraj yanapacuptiqui?