Kë libruwan Bibliata estudiarmi Teytantsik Jehoväpita imëkata yachakurqunki. Tsëmi yanapashurqunki Jehoväta mas kuyanëkipaq, y capazchi pëta sirwinëkipaq bautizakurqunkina o bautizakunëkipaq pensëkanki. Bautizakurirpis Teytantsik Jehoväpitam mas yachakur sïguinëki, tsëmi yanapashunki pëwan imëpis amïgu kanëkipaq. Tsëta imanö ruranëkipaq kaqtam këchö yachakunki.

1 KAQ: ¿Imanirtan Jehoväpa mas kuyë amïgun këta procurankiman?

Teytantsik Jehoväpa mas kuyë amïgun këtaqa llapantsikmi procuranantsik. Tsëmi yanapamäshun, “ni imëpis llutampa apashqa mana kanapaq” y Jehoväta imëyaqpis sirwinapaq (Hebrëus 2:1). Tsëmi nunakunata Diospita yachatsita dejanantsiktsu, y imëkachö yanapakurmi Jehoväta maslla sirwinantsik (leyi Filipensis 3:16). ¡Teytantsik Jehoväta sirwinqantsikwanqa manam ni imapis igualantsu! (Salmus 84:10).

2 KAQ: ¿Imata rurartan sïguinëki?

Kë libruta estudiar ushashqa karpis, tsëraqmi Jehoväta sirwir qallëkanki. Y llapantsiktam Teyta Diospa Palabran kënö nimantsik: “Teyta Dios munanqannö[mi] jukläyana portakuyänëki” (Efesius 4:23, 24). Diosnintsikpa Palabran Bibliata mas estudiar y reunionkunaman ëwarmi Teytantsik Jehoväpita mas yachakunki. Jehovä mandakunqannö kawanëkipaq imachöpis cambianëki faltaptinqa, tsë cambiukunata rurë. Tsëmi yanapashunki imatapis Jehovänö pensanëkipaq y ruranëkipaq.

3 KAQ: ¿Imanötan Jehoväqa yanapashunki mas sirwinëkipaq?

Bibliachömi nin: “Kikin Teyta Dios[mi], alistayäshurniki ushanqa. Pëmi alli tsarakoqta tikratsiyäshunki, pëmi fuertita tikratsiyäshunki, pëmi alli patsakätsiyäshunki” (1 Pëdru 5:10). Llapantsikmi imëka tentacionkunapa pasantsik. Tsënö kaptimpis, Teytantsik Jehovämi yanapamäshun mana alli rurëkunaman mana chänapaq (Salmus 139:23, 24). Jehovämi yanapashunki pëta sirwinëkipaq gänasniki y kallpëki kanampaq (leyi Filipensis 2:13).

 MASLLA YACHAKUSHUN

4 KAQ: Jehoväman imëpis mañakuy

Jehoväwan amïgu kanëkipaqqa, pëman mañakunqëki y Palabran Bibliata leyinqëkim yanapashurqunki. Y tsëkunata mas ruraptikiqa, Jehoväpa mas amïgunmi tikranki.

Leyiyë Salmus 62:8 ima ninqanta y këpaq parlayë:

• Jehoväman mañakunqëkim pëwan mas amïgu kanëkipaq yanapashunki. Tsëqa, ¿imatataq rurankiman Jehoväman mañakunqëki mas shumaq kanampaq?

Leyiyë Salmus 1:2 ima ninqanta y këpaq parlayë:

• Bibliata leyinqëkim yanapashunki Jehoväwan mas amïgu kanëkipaq. Tsëqa, ¿imatataq rurankiman Bibliata mas alli leyinëkipaq?

Bibliata japallëki leyinqëki höra alli yachakunëkipaqqa, ¿imataraq rurankiman? VIDEUTA rikäyë y këkunapaq parlayë:

• ¿Videuchö imata rurayanqantataq qampis rurëta munanki?

• ¿Imakunata yachakuytan gustashunkiman?

 KËTAM YACHAKURQUNKI

Jehoväwan mas amïgu kanëkipaq y pëta mas sirwinëkipaq kallpachakuy. Tsëta rurarqa, ¡mana wanurmi imëyaqpis kushishqa kawakunki!

¿Yarpankiku?

• ¿Imanirtan següru këkankiman imëpis sirwinëkipaq Jehovä yanapashunëkipaq kaqta?

• ¿Imatataq ruranëki Teytantsik Jehoväwan mas amïgu kanëkipaq?

• Imachöpis yanapakuyta munanqantsikman pensanqantsikqa, ¿imanirtan yanapamantsik Jehoväta mas sirwinapaq?