Kaykama estudiasqaykipiqa ñachá imaymanataña Jehová Diosmanta yachashanki. Kunanqa maytachá paytaqa munakunki, ñapaschá munakusqaykirayku bautizakurqanki imaña. Manaraq bautizakurqankichu chayqa chaytachá ruwayta munashanki. Ichaqa, ¿chaywanchu llapa imapas tukupun? Manan. Diosmantaqa yachashanallaykin. Arí, wiñay-wiñaypaqmi paymantaqa yachashallasun. ¿Imaynatan chayta ruwawaq? Chaymanta kaypi yachasun.

1. ¿Imaraykun kallpachakushanallayki Jehová Diosta munakunaykipaq?

Tukuy atisqanchistan kallpachakunanchis Jehová Diosta astawan reqsinanchispaq. ¿Imaraykun chayta ruwananchis? “Ama jayk’aqpas allin ñanmanta pantananchispaq”, chhaynapi ama Diosninchismanta t’aqakunanchispaq (Hebreos 2:1). Ichaqa, ¿iman yanapawasun ama jayk’aqpas paymanta t’aqakunanchispaq? Diosninchismanta willaypin ocupasqa kashananchis, tukuy atisqanchistataqmi kallpachakunanchis llaqtanpi astawan yanapakunanchispaqpas (leey Filipenses 3:16). ¡Manan imapas kamaqninchis Jehová Diospa munaynin ruway jinaqa kanmanchu! (Salmos 84:10).

2. ¿Ima ruwaytan mana saqenaykichu?

Kay libro estudiayta tukushankiña chaypas, Diosta servisqaykiqa chayraqmi qallarishan. Chaymi Bibliaqa sapanka iñiqkunata niwanchis: “Mosoqyachishallaychis imaynachus piensasqaykichista”, nispa (Efesios 4:23, 24). Sichus Bibliata estudiashallanki, manataq juñunakuykunamanpas faltakunkichu chayqa, astawanmi yachanki imaynachus Jehová Diosninchis chayta. Tukuy ima ruwasqaykipi kallpachakuy payman rijch’akunaykipaq. Imapiña cambianayki kaqtinpas cambiay, chhaynapin Jehová Diospa sonqonta kusichinki.

3. ¿Imaraykun nisunman “Jehová Diosqa yanapawasunpunin” nispa?

Biblian nin: “Diosmi pay kikin entrenayta tukusunkichis. Paymi qaqata sayachisunkichis, paymi kallpasapaman tukuchisunkichis, payllataqmi allintapas tajyachisunkichis”, nispa (1 Pedro 5:10). Llapanchismi mayninpiqa tentacionkunapi tarikunchis, ichaqa manan sapallanchischu kashanchis, Jehová Diosmi noqanchiswan kashan (Salmos 139:23, 24). Paymi tanqawasun ima ruwayta munananchispaqpas, payllataqmi atiyta qowasun chayta ruwananchispaqpas (leey Filipenses 2:13).

 ASTAWAN YACHASUNCHIS

4. Jehová Dioswanqa rimashallay

Jehová Dioswan amigontin kanaykipaqqa paymanta mañakuy Bibliata leey iman yanaparqasunki. ¿Yanapasunkimanchu chayta ruway Jehová Diosman astawan jujllachakunaykipaq?

Leeychis Salmos 62:8 textota, jinaspa jamuq tapuyman jina parlariychis:

• Tukuy sonqowan, confianzawan Diosmanta mañakunki chayqa astawanmi payman jujllachakunki. Chhaynataq chayqa, ¿imaynatan chayta ruwawaq?

Leeychis Salmos 1:2 textota, jinaspa jamuq tapuyman jina parlariychis:

• Bibliata leenki, allinta estudianki chayqa astawanmi Jehová Diosman jujllachakunki. Ichaqa, ¿imaynatan chayta ruwawaq?

¿Imatan ruwawaq Biblia estudiasqayki vidaykipi yanapanasuykipaq? Chaymanta astawan yachanaykipaq VIDEOTA qhawaychis, jinaspa jamuq tapuykunaman jina parlariychis:

• ¿Videopi mayqen consejokuna qosqantan qan ruwawaq?

• ¿Imakunamantan yachayta munawaq?

 IMATAN YACHAMURQANCHIS

Kallpachakushallay Jehová Dioswan amigontin kanaykipaq, llaqtanpipas astawan yanapakunaykipaq. ¡Chayta ruwanki chayqa wiñaypaqmi kusisqa kausanki!

Yuyarisun

• ¿Imaynapin yachanki Jehová Dios payta servinaykipaq yanapanasuykita?

• ¿Imatan ruwawaq Jehová Dioswan allin amigontin kanaykipaq?

• ¿Imaraykun allinpuni kanman Diosta astawan servinaykipaq kallpachakuy?