Bibliamanda cai librohuan estudiashaga, Jehovamanda ashcatami yachashcangui. Chasnallata, Diosta yapa llaquishcamanda, camba causaita paima cusha bautisarishcanguimachari. Caita mana rashca ashaga, ñachari bautisarinata munaungui. Bautisarishca huasha, Jehovahuan mas amigo tucungahua ursarina mangui. Caita rashami, huiñairaicu Jehovahua amigo tucungui. Chita imasa rana ashcata ricushun.

1. Imahuata Jehovahuan mas amigo tucungahua ursarina angui

Jehovahuan mas ali amigo tucungahua, shungumanda tucuita rana anchi. Diosma mana yapa caillayashaga, paimanda caruyashun. Chiraicu, Jehovata mana saquingahua ursarina anchi (Hebreos 2:1). Jehovata tucui shunguhuan sirvisha catingahua, imata yanapaitucushun. Tucui uras predicana anchi, chasnallata Jehovata masta sirvingahua ñucanchi ushashcata rashun (Filipenses 3:16​ta leipai). Jehovata sirvinami, imata ranamandas mas balishca an (Salmo 84:10).

2. Bautisarishca huasha imata rashata catina angui

Cai librohuan Bibliata estudianata ña tucuchingaraushahuas, canga cunanllami Diosta sirvingahua callarishcangui. Bibliaga, Jesusta caran caticcunata nin: “Mushucta churarishcacuinta mushuc causaita apichi” (Efesios 4:23, 24). Bibliata estudiasha catisha, congregacionbi tandarinama rishaga, Jehova imasa ashcamanda masta yachangaraungui. Jehova shina angahua, pai shina yuyangahua, tucuita imatas rana angui. Jehovata cushiyachingahua, camba causaita masta aliyachisha, ima cambiogunatas rasha catina mangui.

3. Jehovaga paihuan mas ali amigo tucungahua imasata yanapaitucungui

Bibliaga caitami nin: “Dios cangunata cutimi alichinga. Cangunata sinzhiyachingami, mana cuyuric istanditacuinta. Pai cangunata sinzhiyachicpi, paihua ñambibi yapa alita puringuichi” (1 Pedro 5:10). Ucha yuyaiguna shamucpiga, Jehovami uchamanda caruyangahua yanapaitucungui (Salmo 139:23, 24). Chasnallata, Jehovaga paita casuna munaita, pai munashca shina sirvingahua, ursata cuitucungui (Filipenses 2:13​ta leipai).

 CAIMANDA MASTA YACHAI

4. Camba amigo Jehovahuan caran uras cuintanacui

Diosta mañana, Bibliata estudiana, Jehovahuan ali amigo tucungahua yanapaitucushcangui. Caita rasha caticpiga, Jehovama mas caillayangahua yanapanga. Imasa.

Salmo 62:8​ta leichi, huasha cai tapuimanda cuintanacuichi:

• Jehovahuan mas ali amigo tucungahua, imashinata paihuan alita yuyasha mañana angui.

Salmo 1:2​ta leichi, huasha cai tapuimanda cuintanacuichi:

• Jehovahuan mas ali amigo tucungahua, imasata Bibliata alita riparasha leina angui.

Bibliata can sapalla estudiaushcaibi, mas alita intindingahua imata yanapaitucungui. Caita yachangahua, VIDEOTA ricuichi. Huasha, cai tapuigunamanda cuintanacuichi:

• Bibliamanda masta intindingahua, ima cunashcagunatata pactachina ushangui.

• Ima temagunamandata estudianata munanguima.

 IMATA YACHASHCANGUI

Jehovahuan mas ali amigo tucusha, paita masta sirvisha cati. Caita rashaga, huiñaimi cushilla causangui.

Yachashcata cuintai

• Jehovata mana saquisha sirvingahua, paiga canda imashinata yanapaitucungui.

• Jehovahuan mas ali amigo tucungahua, imatata rana angui.

• Jehovata cushilla sirvingahua, imatata pactachina munangui.