Ко акава библиско курси бут сиклиљан башо Јехова. Тло мангипе спрема лесте барило добором бут, со веројатно денѓан лафи кај ка служине леске цело живото хем крстинѓан тут. Ако панда на керѓан адава, шај размислинеа те кере адава башо кратко време. Ама, ма бистре кај тло крстибе нане о крајо таро тло духовно напредок. Тло амалипе е Јеховаја шај те кере ле позорало ки цели вечност. Сар шај те кере адава?

1. Соске ваљани понадари те кере позорало тло амалипе е Јеховаја?

Ваљани те да са амендар понадари те кера позорало амаро амалипе е Јеховаја. Соске? Те шај никогаш те на цида амен лестар (Евреите 2:1). Со шај те поможинел аменге понадари да верно те служина е Јеховаске? На пример, адава со ка продолжина ревно те проповедина хем адава со ка рода јавера начинија те шај повише те служина амаре Девлеске. (Читин Филипјаните 3:16.) Највише со шај те керел амен бахтале ко живото, тано о служибе е Јеховаске (Псалм 84:10).

2. Со ваљани панда те продолжине те кере?

Иако тло библиско курси завршинела акана, тло живото сар христијани ка продолжинел. Сој тано вклучимо ко тло живото сар христијани? И Библија вакерела кај ваљани „[те урава] и неви личност“ (Ефешаните 4:23, 24). Џикоте продолжинеа те проучине е Девлескоро Лафи хем те џа ко состанокија, ту ка сикљове неве буќа башо Јехова хем лескере особине. Трудин тут те џа са повише пало пример е Јеховаскоро ко тло живото. Продолжин те кере о потребна промене те шај те кере бахтало е Јехова.

3. Сар о Јехова ка поможинел туке духовно те напредујне?

И Библија вакерела: „О Девел... ка обучинел тумен, ка керел тумен зорале, ка поможинел туменге те ачховен верна, хем ка керел те терѓовен цврсто“ (1. Петрово 5:10). Сарине доживинаја искушенија, ама о Јехова ка дел амен са сој потребно те шај те ачхова цврста (Псалм 139:23, 24). Ов ветинела аменге кај ка дел амен и желба хем и сила верно те служина леске. (Читин Филипјаните 2:13.)

 ДОЗНАЈН ПОВИШЕ

4. Продолжин те кере лафи хем те шуне тле најшукар амале

И молитва хем о проучибе и Библија поможинѓе туке те ове е Јеховаскоро амал. Сар шај акала буќа те поможинен туке те ове панда попаше леа?

Читин Псалм 62:8, а пало адава керен лафи башо акава пучибе:

• Сар шај те подобрине тле молитве хем аѓаар те кере позорало тло амалипе е Јеховаја?

Читин Псалм 1:2, а пало адава керен лафи башо акава пучибе:

• Со ка поможинел туке те овел тут побари корист таро тло читибе и Библија хем аѓаар те кере позорало тло амалипе е Јеховаја?

Со шај те поможинел туке те овел тут побари корист таро тло лично проучибе и Библија? Те шај те дикхе несаве предлогија дикх о ВИДЕОКЛИПИ, а пало адава керен лафи башо акала пучиба:

• Саве предлогија таро видеоклипи мангеа те применине?

• Башо кола теме мангеа те проучине?

 СО СИКЛИЛЕМ

Продолжин те кере позорало тло амалипе е Јеховаја хем те чхиве туке духовна целија. Тегани, ка ове бахтало засекогаш!

Сар ка одговорине?

• Соске шај те ове сигурно кај о Јехова ка поможинел туке те служине леске верно?

• Сар шај те кере позорало тло амалипе е Јеховаја?

• Сар шај о духовна целија те поможинен туке духовно те напредујне?