XIDONDZRO 60
Tama U Tiyisa Wuxaka Byaku Na Yehovha
A ndzreni ka xidondzro lexi xa Bibele, u dondzre swinyingi ha Yehovha. Hinkwaswu leswi u swi dondzriki swi ye swi kulisa lizrandzru dzraku ha Yehovha. Swi nga yentxeka kutani u nyiketele wutomi byaku ka Yehovha u va u babatisiwa. Loko u nga si na swi yentxa leswo, n’waninkama u pimisa ku swi yentxa ku nga li khale. Kambe a babatiso a hi ku hela ka hinkwaswu. U fanela ku tama u tiyisa wuxaka byaku na Yehovha hi lani ku nga helikiki. Ha yini?
1. Ha yini u fanela ku tama u tiyisa wuxaka byaku na Yehovha?
Swi djula hi tikazrata akuva hi tama hi tiyisa wuxaka byezru na Yehovha. Ha yini? Leswaku ‘hi nga ti txhuka hi hundzrelwi’, kumbe hi tsravukana na yene. (Ba-Heberu 2:1) I yini lexi nga hi pfunaka ku tama hi tizrela Yehovha na hi dumbekile? Hi fanela ku tama hi hisekela ntizro wa ku zrezra ni ku djuletela tindlela ta ku tizrela Yehovha hi lani ku yengetelekiki. (Dondzra Ba-le-Filipi 3:16.) A ku tizrela Yehovha i ntxhumu wa lisima ku tlula hinkwaswu leswi hi nga swi yentxaka a wuton’wini byezru!—Amapsalma 84:10.
2. Hi swini swimbeni leswi u fanelaka ku tama u swi yentxa?
Nambileswi xidondzro xaku xa Bibele xi nga kusuhi ni ku hela, a wutomi byaku swanga mutizreli wa Yehovha byo sungula. Bibele dzri hlaya leswaku hi fanela ku ‘yambala mhunu lwemumpshwa’, kumbexana hi fanela ku yetisela matsrhamela ya Yehovha hi lani hi nga kotaka ha kone. (Ba-le-Efesa 4:23, 24) Xileswo, swa fanela ku tama u dondzra Bibele ni ku hlalela mintlhanganu. Loko hi tama hi dondzra leswi yengetelekiki ha Yehovha ni matsrhamela yake, nakone hi yentxa ku txintxa loku djulekaka a wuton’wini byezru, hi ta nyonxisa Papayi wezru, Yehovha.
3. Xana Yehovha a ta ku pfunisa kuyini akuva u tama u yentxa nhluvuku?
Bibele dzri li: ‘Xikwembu Nkulukumba . . . a ta n’wi hetisekisa, loko n’wi xaniseki a nkamanyana, a n’wi tiyisa, a n’wi nyika ntamu, a n’wi beka masungulweni.’ (1 Petros 5:10) Hinkwezru hi lwa ni mindzringo, kambe Yehovha a hi nyika ntamu lowu djulekaka akuva hi tama hi dumbeka kwake. (Amapsalma 139:23, 24) A dumbisa ku ku nyika ntamu ni ku ku yentxa u navela ku tama u mu tizrela hi ku dumbeka.—Dondzra Ba-le-Filipi 2:13.
KELISISA
Vona leswi u nga swi yentxaka akuva u ya mahlweni u tiyisa wuxaka byaku na Yehovha u tlhela u kuma matovoko a wuton’wini.
4. U nga tsrhiki ku bula ni munghanu waku lwenkulu
Ku khongota ni ku dondzra Bibele swi ku pfune ku va munghanu wa Yehovha. Kambe mintxhumu leyo yi nga ku pfunisa kuyini ku kulisa wunghanu byaku na yene?
Dondzrani Amapsalma 62:8, mi gama mi bulisana hi xivutiso lexi:
-
U nga yampswisa swikhongoto swaku hi ndlela yini akuva u tiyisa wuxaka byaku na Yehovha?
Dondzrani Amapsalma 1:2, mi gama mi bulisana hi xivutiso lexi:
-
U nga yi yampswisa hi ndlela yini dondzro yaku ya Bibele akuva u tiyisa wunghanu byaku na Yehovha?
U nga yentxa yini akuva dondzro yaku ya Bibele yi ku pfuna? Akuva u kuma mavonela man’wana, vonani VHIDIYU, mi gama mi bulisana hi swivutiso leswi landzrelaka.
-
Ka mavonela lawa u nga ma vona ka vhidiyu, he wani lawa u navelaka ku ma tizrisa?
-
He tini timhaka leti u navelaka ku dondzra ha tone?
5. Tibekeli makungu ya moya
Loko u tibekela makungu a ntizrweni wa Yehovha, swi ta ku pfuna ku tama u tiyisa wuxaka byaku na yene. Vonani VHIDIYU, mi gama mi bulisana hi xivutiso lexi landzrelaka.
-
Ka vhidiyu ledzri, xana Cameron a pfunekise kuyini hi ku tibekela makungu ya moya?
A hi hinkwavu lava va nga kotaka ku zruzrela ka tiko dzrin’wana akuva va ya pfunisa ka ntizro wa ku zrezra. Kambe hinkwezru hi nga tibekela makungu ya moya lawa hi nga ma tlhaselaka. Dondzrani Amaproverbia 21:5, mi gama mi bula hi makungu lawa u navela ku tibekela . . .
-
a bandleni.
-
a ntizrweni wa nsimu.
Xana a nsinya lowu wa nawu wu nga ku pfunisa kuyini akuva u kota ku hetisisa makungu yaku?
Makungu lawa u nga ha tibekelaka wone
-
Yampswisa ndlela leyi u khongotaka ha yone.
-
Dondzra Bibele hinkwadzru.
-
Lwela ku tiva hinkwavu lava nga bandleni dzraku.
-
Sungula u va u fambisa xidondzro xa Bibele.
-
Tizra swanga phayona dzra ku pfunisa kumbe dzra nkama hinkwawu.
-
Loko u li makwezru wa xinuna, tikazrateli ku va nandzra wa wutizreli.
6. Hanya hi ku nyonxa hi la ku nga helikiki!
Dondzrani Amapsalma 22:26, mi gama mi bulisana hi xivutiso lexi:
-
U nga yentxa yini akuva u nyonxa swoswi ni hi lani ku nga gamikiki?
NKATSRAKANYU
Tama u tiyisa wunghanu byaku na Yehovha u tlhela u tibekela makungu ya moya. Leswo swi ta ku yentxa u nyonxa hi lani ku nga helikiki!
Mpfuxeto
-
I yini lexi ku kholwisa leswaku Yehovha a ta ku pfuna akuva u tama u mu tizrela hi ku dumbeka?
-
U nga byi tiyisa hi ndlela yini wunghanu byaku na Yehovha?
-
Xana makungu ya moya ma nga ku pfunisa kuyini ku tama u tiyisa wunghanu byaku na Yehovha?
HANDZRISISA
I yini leswi nga ni lisima ngopfu ka Yehovha: I ku mu yentxela ntxhumu wun’we wa ku hlamalisa, lowu kombisaka ku tinyiketela kwake kumbe i ku dumbeka wutomi byezru hinkwabyu?
Nambi nandzra wa ku dumbeka wa Yehovha a nga ha heleliwa hi ku nyonxa. Vona ndlela leyi ha yone u nga tlhelaka u kuma ku nyonxa.
U nga tibekela makungu ya moya hi ndlela yini, nakone u nga yentxa yini akuva u kota ku ma hetisisa?
Ha yini swi ni lisima kuva hi va vakriste lava wupfiki nakone hi nga swi kotisa kuyini leswo?
