Nahay raha maro mikasiky ani-Jehovah iha liany nianaranao Baiboly zay. Vokany, lasa tea ani-Jehovah marè iha, le mety fa nanokam-bata noho natao batisa, na fa mieritseritsy ty hanao ani-zay tsy ho ela. Fe ndre fa vita batisa iha, le tokony hanohy handroso avao. Afaky miezaky hifandramby marerè amy Jehovah zisiky farany iha. Akory ty hanaovanao ani-zay?

1. Manino iha ro tokony hiezaky hihamariny ani-Jehovah avao?

Tsy maintsy miezaky mafy tsika mba hihamariny ani-Jehovah avao. Nanino? Amy zay “tsy hiala amy [Ndranahary velo iny] mihintsy” tsika. (Hebreo 2:1) Ino ty hanampy antsika tsy hivaliky fa hanompo ani-Jehovah zisiky farany? Tokony hazoto hitory tsika sady hila fomba hafa hanompoa a-Ndranahary marerè. (Vakio Filipianina 3:16.) Ty fanompoa ani-Jehovah ro fomba fiaina tena mahasambatsy!​—Salamo 84:10.

2. Ino koa ty raha mbo tokony hotohizanao avao?

Ndre fa tampitsy ty fianaranao amy boky toy, le mbo mila asehonao avao hoe Kristiana iha. Mivola ty Baiboly hoe “hisiky ty toetsy vaovao” tsika. (Efesianina 4:23, 24) Laha manohy mianatsy ty Safà-Ndranahary noho mamonjy fivoria avao iha, le hahay raha vaovao mikasiky ani-Jehovah noho ty toetsiny. Milà fomba mba hanahafanao marerè ani-toetsini-Jehovah rey. Ovao koa ze hitanao hoe mila ovà mba hampifalifalea azy.

3. Ino ty hataoni-Jehovah mba hanampea anao handroso avao?

Mivola ty Baiboly hoe: ‘Hamita ty fampiofanany anareo Ndranahary. Hanampy anareo hiory soa ie, sady hampatanjaky anareo, le hataony mafy fototsy nareo.’ (1 Petera 5:10) Samby miatriky fakam-panahy tsika iaby. Fe ameani-Jehovah ty raha ilàntsika tsika mba hahafahantsika manohitsy ani-raha rey. (Salamo 139:23, 24) Mampitamà ie fa hataony ze hahavy anao haniry hanompo azy. Hanome hery anao koa ie mba hahavitanao ani-zay.​—Vakio Filipianina 2:13.

 DINIHO LALIKY

4. Miresaha tsy tampaky amy Namanao marìny iny

Nanampy anao hanjary namani-Jehovah ty fianara Baiboly noho ty vavaky. Mbo reo avao koa ro hahavy anao hihamariny azy marè. Amy fomba akory?

Vakio Salamo 62:8, bakeo iaraho midiniky fanontanea toy:

• Akory ty azonao anasoava ty vavaky ataonao mba hahavy anao ho namani-Jehovah marè?

Vakio Salamo 1:2, bakeo iaraho midiniky fanontanea toy:

• Akory ty azonao anasoava ty famakianao Baiboly mba hahavy anao ho namani-Jehovah marè?

Ino ty azonao atao mba hahasoa anao ty fianara am-bata ataonao? Hanenty soso-kevitsy vitsivitsy tsika. Alefaso VIDEO toy, bakeo iaraho midiniky fanontanea reo.

• Aia amy soso-kevitsy tamy video tao rey ro teanao horihy?

• Ino ty foto-kevitsy teanao hianara?

 FAMINTINA

Miezaha avao hinama marìny ani-Jehovah noho hana raha kendrè amy fanompoa azy. Laha manao ani-zay iha, le ho azonao tavy ty fiainanao amy henanizao noho amy hoavy!

Famerena

• Manino iha ro afaky matoky hoe hanampy anao hanompo azy avao Jehovah?

• Ino ty azonao atao laha teanao ty ho namani-Jehovah marìny avao?

• Manino ro hanampy anao handroso avao ty fanana raha kendrè amy fanompoa ani-Jehovah?