LESONA 60
Ia Faaauau Ona Agaʻigaʻi i Luma
A o faagasolo lenei talanoaga faale-Tusi Paia, na e aʻoaʻoina le tele o mea e faatatau iā Ieova. O mea na e aʻoaʻoina ua uunaʻia ai oe e atiaʻe le alofa mo ia, ma atonu ua uma ona e tuuina atu ma papatisoina. Ae afai e te leʻi faia faapea, atonu o loo e mafaufau e faia i se taimi lata mai. E tusa pe ua uma ona e papatiso, ae e tatau ona faaauau pea ona e agaʻigaʻi i luma. E mafai ona e faalatalata atu iā Ieova e faavavau. E faapefea?
1. Aiseā e tatau ai ona faamalosia pea le lua faauōga ma Ieova?
E tatau ona tatou galulue mamafa e faamalosia pea la tatou faauōga ma Ieova. Aiseā? “Ina ia aua lava neʻi o tatou tafetafea ese” mai iā te ia. (Eperu 2:1) O le ā e fesoasoani iā i tatou ina ia auauna faamaoni ai pea iā Ieova? Ia pisi pea i le galuega talaʻi, ma saʻili isi auala e faia ai se sao atoatoa i le auaunaga i le Atua. (Faitau le Filipi 3:16.) O le auauna iā Ieova o le auala sili lea e ola ai!—Salamo 84:10.
2. O ā isi mea e tatau ona e faia pea?
E ui o le a faaiʻuina lenei talanoaga faale-Tusi Paia, ae e tatau ona faaauau pea ona e ola o se Kerisiano. Ua faapea mai le Tusi Paia e tatau ona tatou “oofu i le tagata fou.” (Efeso 4:23, 24) A o faaauau ona e suʻesuʻeina le Afioga a le Atua ma auai i sauniga, o le a e aʻoaʻoina ai nisi mea fou e faatatau iā Ieova ma ona uiga. Ia saʻili auala e te faaalia atili atu ai ona uiga, ma faaauau ona faia suiga manaʻomia ina ia faafiafiaina ai o ia.
3. E faapefea ona fesoasoani Ieova iā te oe ina ia e agaʻigaʻi i luma faaleagaga?
Ua faapea mai le Tusi Paia: “O le Atua . . . e na te faamāeʻaina le aʻoaʻoina o outou. E na te faamausalīina ma faamalosia outou.” (1 Peteru 5:10) E tatou te fesagaʻia uma tofotofoga. Ae e saunia e Ieova mea e tatou te manaʻomia e teena ai na tofotofoga. (Salamo 139:23, 24) Ua ia folafola mai e na te foaʻi mai iā i tatou le faanaunauga ma le malosi e auauna atu ai iā te ia ma le faamaoni.—Faitau le Filipi 2:13.
SAʻILIʻILI ATILI
Iloilo pe faapefea ona e agaʻigaʻi pea i luma, ma po o le ā le auala o le a faamanuia ai oe e Ieova.
4. Ia fesootaʻi pea ma lau Uō sili
E fesoasoani le tatalo ma le suʻesuʻe o le Tusi Paia ina ia avea ai oe ma uō a Ieova. E faapefea ona e vavalalata atu iā te ia pe a faia faapea?
Faitau le Salamo 62:8, ona talanoa lea i le fesili lenei:
-
Ina ia faamalosia le lua faauōga ma Ieova, e faapefea ona faaleleia atili le auala e te tatalo ai?
Faitau le Salamo 1:2 ma le faamatalaga pito i lalo, ona talanoa lea i le fesili lenei:
-
Ina ia faamalosia le lua faauōga ma Ieova, e faapefea ona faaleleia atili lau faitauga Tusi Paia?
E faapefea ona e maua atoatoa aogā mai i au lava suʻesuʻega? Ina ia iloa nisi o auala e faia ai faapea, faaali le VITIŌ, ona talanoa lea i fesili o loo mulimuli mai.
-
O ā ni fautuaga mai le vitiō e te manaʻo e faatatau?
-
O ā ni mataupu e te manaʻo e suʻesuʻe?
5. Ia faatutū ni sini faaleagaga
O le iai o ni sini i le auaunaga iā Ieova o le a fesoasoani iā te oe e agaʻigaʻi ai pea i luma. Faaali le VITIŌ, ona talanoa lea i le fesili o loo mulimuli mai.
-
I le vitiō, na faapefea ona maua e Cameron aogā mai i le faatutū o sini faaleagaga?
E lē o i tatou uma e mafai ona malaga atu i se isi atunuu e talaʻi ai. Peitaʻi, e mafai e i tatou uma ona faatutū ni sini e mafai ona ausia. Faitau le Faataoto 21:5, ona iloilo lea o sini e te manaʻo e faatutū . . .
-
i le faapotopotoga.
-
i le galuega talaʻi.
E faapefea ona fesoasoani le mataupu silisili o loo i lenei mau ina ia ausia ai ou sini?
Sini e te ono faatutū
-
Faaleleia le auala e te tatalo ai.
-
Faitau le Tusi Paia atoa.
-
Faamasani i tagata uma o lau faapotopotoga.
-
Amata se suʻesuʻega faale-Tusi Paia.
-
Auauna o se paeonia lagolago po o se paeonia sauatoa.
-
Afai o oe o se uso, aapa atu e avea ma auauna o le faiva.
6. Se olaga fiafia e faavavau!
Faitau le Salamo 22:26, ona talanoa lea i le fesili lenei:
-
O le ā e mafai ona e faia ina ia e maua ai le fiafia i le taimi lenei seʻia oo i le faavavau?
AOTELEGA
Ia faaauau ona faamalosia la oulua faauōga ma Ieova, ma faatutū ni sini faaleagaga. O le faia faapea, o le a e maua ai se olaga fiafia e faavavau!
Fesili Autalu
-
Aiseā e te mautinoa ai o le a fesoasoani Ieova iā te oe, ina ia e auauna atu iā te ia ma le faamaoni?
-
E faapefea ona e faamalosia la oulua faauōga ma Ieova?
-
E faapefea ona fesoasoani sini faaleagaga ina ia e agaʻigaʻi ai i luma?
MANATU FAAOPOOPO
O lē fea e sili ona taua iā Ieova, o se gaoioiga mataʻina se tasi o le tuutoina atu iā te ia, po o le faamaoni iā te ia i le olaga atoa?
E oo lava i se auauna faamaoni a Ieova, e ono mou atu le olioli. Mātau pe faapefea ona toe maua le olioli.
Toe Maua le Olioli e Ala i le Suʻesuʻe ma Manatunatu Loloto (5:33)
E faapefea ona e faatutū ma ausia ni sini faaleagaga?
“Faaaogā Sini Faaleagaga e Viia ai Lē na Faia Oe” (Le Olomatamata, Iulai 15, 2004)
Aiseā e tāua ai le avea ma Kerisiano e matua faaleagaga, ma e faapefea ona e ausia lenā tulaga?
E te Ono Fiafia Foʻi
FESILI E MASANI ONA LĀGĀ
O le ā le Talanoaga Faale-Tusi Paia o Loo Ofoina e Molimau a Ieova?
Ua ofo atu e Molimau a Ieova se suʻesuʻega faale-Tusi Paia e lē totogia, e mafai ona e faaaogāina ai so o se faaliliuga o le Tusi Paia. E mafai foʻi ona valaaulia lou aiga atoa po o au uō e auai ai.
