LES 60

Tan meki muiti fu go na fesi

PREI

Yu leri furu fu Yehovah na a Bijbelstudie fu yu. Disi meki taki yu kon lobi en so te taki kande yu gi yusrefi abra na en kaba èn yu dopu. Efu yu no dopu ete, dan kande yu e prakseri fu du dati heri esi. Ma awinsi yu dopu, toku yu musu tan meki muiti fu tron wan moro bun mati fu Yehovah.Yu nanga Yehovah kan de mati fu têgo. San kan yepi yu?

1. Fu san ede yu musu tan meki muiti fu tron wan moro bun mati fu Yehovah?

Wi musu meki tranga muiti fu tron wan moro bun mati fu Yehovah. Fu san ede? „So taki noiti wi no e drifi gowe” fu en (Hebrewsma 2:1). San kan yepi wi fu tan dini Yehovah? Wi musu tan du a preikiwroko fayafaya èn wi musu suku fasi fu du moro gi Yehovah. (Leisi Filipisma 3:16.) A moro bun sani di wi kan du nanga wi libi na fu dini Yehovah!—Psalm 84:10.

2. Sortu tra sani yu musu tan du?

Aladi disi na a lasti les fu a Bijbelstudie fu yu, toku a libi fu yu leki Kresten e go doro. Bijbel e taki dati wi „musu kisi nyun fasi” (Efeisesma 4:23, 24). Te yu e tan studeri Bijbel èn yu e tan go na den konmakandra, dan yu o leri moro fu Yehovah nanga den fasi fu en. Tan meki muiti fu kon abi den srefi fasi fu Yehovah èn tan tyari kenki kon efu dati de fanowdu. Te yu e du dati, dan Yehovah o breiti nanga yu.

3. Fa Yehovah o yepi yu fu go na fesi?

Bijbel e taki: ’Gado o gi unu leri dorodoro. A o meki unu tanapu kánkan èn a o meki unu kon tranga’ (1 Petrus 5:10). Wi alamala e kisi a firi fu du sani di no bun. Ma Yehovah e gi wi a krakti fu feti nanga den firi dati (Psalm 139:23, 24). A pramisi taki a o gi yu a firi nanga a krakti fu tan dini en.—Leisi Filipisma 2:13.

SORTU TRA SANI YU KAN LERI?

Wi o luku fa yu kan tan go na fesi èn fa Yehovah o blesi yu.

4. Tan taki nanga yu beste mati

Begi nanga Bijbelstudie yepi yu fu tron wan mati fu Yehovah. Fa den sani disi kan yepi yu fu tron wan moro bun mati fu en?

Leisi Psalm 62:8 èn taki fu na aksi disi:

Efu yu wani tron wan moro bun mati fu Yehovah, dan yu musu leri fu begi moro bun. Fa yu kan du dati?

Leisi Psalm 119:97 èn taki fu na aksi disi:

Efu yu wani tron wan moro bun mati fu Yehovah, dan san yu musu du te yu e leisi Bijbel?

Fa yu musu studeri Bijbel efu yu wani tron wan moro bun mati fu Yehovah? Prei a FELEM fu si fa yu kan du dati. Baka dati taki fu den aksi disi:

FELEM: Studeri moro bun (5:22)

Sortuwan fu den sani di kari na ini a felem yu wani du?
Sortu tori yu wani ondrosuku moro fini?

5. Luku san yu kan du moro gi Yehovah

Efu yu e tan meki muiti fu du moro gi Yehovah, dan dati o yepi yu fu go na fesi. Prei a FELEM èn taki fu na aksi disi:

FELEM: Disi na a moro bun libi (3:31)

Sortu wini Cameron kisi di a bosroiti fu du moro gi Yehovah?

A no ala sma kan froisi go na wan tra kondre fu yepi nanga a preikiwroko. Ma wi alamala kan poti marki di wi kan doro. Leisi Odo 21:5 èn luku san yu kan du moro . . .

na ini a gemeente.
na ini a preikiwroko.

Fa a Bijbeltekst disi kan yepi yu fu doro den marki fu yu?

Sani di yu kan du

Te yu e begi, dan fruteri Yehovah san de na tapu yu ati.
Leisi a heri Bijbel.
Kon sabi ala sma na ini a gemeente.
Suku wan Bijbelstudie.
Pruberi fu tron wan yepi-pionier noso wan gewoon pionier.
Efu yu na wan brada, dan suku fu tron wan dinari ini a diniwroko.

6. Yu kan de koloku fu têgo!

Leisi Psalm 22:26 èn taki fu na aksi disi:

San yu musu du fu man de koloku nownow èn fu têgo?

SAN YU LERI?

Tan meki muiti fu tron wan moro bun mati fu Yehovah èn fu du moro gi en. Te yu du dati, dan yu o de koloku fu têgo!

Fa yu ben o piki den aksi disi?

Fu san ede yu kan de seiker taki Yehovah o yepi yu fu tan dini en?
Fa yu kan tron wan moro bun mati fu Yehovah?
Te yu e pruberi fu du moro gi Yehovah, dan fa dati kan yepi yu fu go na fesi?

A dei di yu klari a buku:

Yu kan du a sani disi

Pruberi fu leisi den buku Kon krosibei na Yehovah nanga ’Kon, èn tron wan bakaman fu mi’ na ini wán yari. Den buku disi o yepi yu fu tan go na fesi èn fu tron moro bun mati fu yu Papa Yehovah nanga en Manpikin.