Su kanandụu pěngangěndungang Alkitapẹ̌ ini, i kau seng nakaěndung mal᷊awọ soal i Yehuwa. Manga hal᷊ẹ̌ seng niěndungangu nakakoạ si kau sěbạe makěndagẹ̌ si Yehuwa kụ i kau něgělị watangengu si Sie dingangu nibaptisẹ̌. Mạeng bědang tawe někoạ ene, aramanung i kau mětẹ̌tiněna gunang měkoạ ene su tempo mahi. Katewe, kemajuan nikoạu ene tawe naědo su tempong i kau nibaptisẹ̌. I kau botonge turusẹ̌ mẹ̌těngkarani si Yehuwa sarang karěngụe. Kerea carane?

1. Kawe nụe i kitẹ harusẹ̌ turusẹ̌ měnoghasẹ̌ pẹ̌dal᷊ahapị dingangi Yehuwa?

I kitẹ harusẹ̌ mẹ̌tawakal᷊i turusẹ̌ měnoghasẹ̌ pẹ̌dal᷊ahapị dingangi Yehuwa. Kawe nụe? ”Tadeạu i kitẹ tawe maonodẹ̌” bọu i Sie. (Ibrani 2:1) Apa makatul᷊ung si kitẹ turusẹ̌ masatia mẹ̌tahamawu si Yehuwa? I kitẹ botonge tatapẹ̌ sibukẹ̌ su hal᷊ẹ̌ měnginjilẹ̌ kụ mědeạ cara gunang měkoạ limembong mal᷊awọ hal᷊ẹ̌u Mawu. (Basa Filipi 3:​16.) Mẹ̌tahamawu si Yehuwa ene kai hal᷊ẹ̌ kapaelange su pěbawiahẹ̌!​—Mazmur 84:10.

2. Apa lai harusẹ̌ turusẹ̌ koatengu?

Maning pěngangěndungang Alkitapẹ̌ seng masue, makoạ muriti Kristus ene tawẹ apa kětạkenge. Alkitapẹ̌ naul᷊ị i kitẹ harusẹ̌ ”měpakẹ pěbawiahẹ̌ buhu”. (Efesus 4:​23, 24) Su tempong i kau turusẹ̌ měngěndung Hengetangu Mawu dingangu duměnta su pěngangibadang, i kau sarung makaěndung manga hal᷊ẹ̌ buhu soal i Yehuwa dingangu manga sipat’E. Pědeạe cara gunang mẹ̌těno manga sipat’E su pěbawiahu. Turusẹ̌e pěkoạ pẹ̌bawal᷊ui gunang makal᷊uasẹ̌ si Yehuwa.

3. Kerea Yehuwa sarung mẹ̌tul᷊ung si kau měkoạ kemajuan?

Alkitapẹ̌ naul᷊ị, ”Mawu . . . sarung mapakasue pelatihan i kamene. I Sie sarung mapakatei si kamene. I Sie sarung mapakatoghasẹ̌ si kamene. I Sie sarung mapakasěghadẹ̌ si kamene.” (1 Petrus 5:​10) I kitẹ kěbị tụtatěngo sasal᷊ukạ. Katewe, Yehuwa sarung mẹ̌tul᷊ung si kitẹ lumawang manga sasal᷊ukạ ene. (Mazmur 139:​23, 24) I Sie nẹ̌diandi sarung měgělị si kau kapulu dingangu katatoghasẹ̌ gunang masatia mẹ̌tahamawu si Sie.​—Basa Filipi 2:​13.

 BANGKA PAKARAL᷊UNG

4. Turusẹ̌e pẹ̌bisara dingangu daringihẹ̌ su Hapịu kapaelange

Mẹ̌doa dingangu měngěndung Alkitapẹ̌ makatul᷊ung si kau makoạ hapị i Yehuwa. Kerea manga hal᷊ẹ̌ ene makatul᷊ung si kau limembong marani dingang’E?

Basa Mazmur 62:​8, bọu ene bisarai kakiwal᷊o ini:

• Gunang měnoghasẹ̌ pẹ̌dal᷊ahapịu dingangi Yehuwa, apa harusẹ̌ koatengu tadeạu caranu mẹ̌doa dingangu lohong daroanu makoạ limembong mapaelẹ̌?

Basa Mazmur 1:2 dingangu catatan kaki, bọu ene bisarai kakiwal᷊o ini:

• Gunang měnoghasẹ̌ pẹ̌dal᷊ahapịu dingangi Yehuwa, apa wotonge koatengu tadeạu makaěbạ lawọ gunane bọu pẹ̌bawasang Alkitapẹ̌?

Apa wotonge koatengu tadeạu makaěbạ lawọ gunane bọu pěngangěndungang Alkitapẹ̌ hala? Gunang měmanda piram baụ těgu, putarẹ̌ VIDEONE bọu ene bisarai manga kakiwal᷊one.

• Těgu sude bọu video ene mapulu koatengu?

• Topik apa mapulu ěndungangu?

 RINGKASAN

Turusẹ̌e pěnoghasẹ̌ pẹ̌dal᷊ahapịu dingangi Yehuwa lai pěkoạ cita-cita rohani. Kụ, i kau sarung měbiahẹ̌ mal᷊uasẹ̌ sarang karěngụe!

Apa seng nikaěndungangu?

• Kawe nụe i kau botonge mangimang Yehuwa sarung mẹ̌tul᷊ung si kau tatapẹ̌ masatia mẹ̌tahamawu si Sie?

• Kerea i kau botonge měnoghasẹ̌ pẹ̌dal᷊ahapịu dingangi Yehuwa?

• Kerea cita-cita rohani makatul᷊ung si kau měkoạ kemajuan?