Isisiau ijo nuipu noi nuikamunitos Yawe kotoma ainapeta kanu nuka aisisia Ebaibuli. Akiro nuisisiau ijo ainakisi jo aminun Yawe noi ido aticepak idau ijo ainakin akoniijar neejai ngesi ka aibatisaun. Arai bo nat iwomoomoi ijo aiswamaun ngun kapak naesupaana. Konye mam akonipol enangakini toma aibatisaun bon. Ipedori ijo ainyikokin aikunyakin neejai Yawe ikar kere. Kopone ani?

1. Kanuinyo ibusakinitor ijo ainyikokinit aitogogong eidicanekon ka Yawe?

Ekoto oni aswam kagogong ainyikokinit aitogogong eidicanewok ka Yawe. Kanuinyo? Tetere mam ‘ikaleleor’ kaneejai ngesi. (Iburanian 2:1) Inyo ingarakini oni ainyikokin aijaanakin Yawe kamunoonut? Ipedori oni adunyakinit alimonokin akiro nukajokak ka amoot iponesio ice lupedoret aijaanakin Edeke kaileleba. (Kosiom Ipilipin 3:16.) Aijaanakin Yawe ngesi ibore yenejok kakere!​—Isabulin 84:10.

2. Inyo bobo ipedori oni ainyikokinit aswam?

Karaida enangakini kwana aisisia na, konye akoniijar kwape Ikristayot inyikokini. Ebala Ebaibuli ebe ibusakinit oni ainap “etunganane lokitetet.” (Ipeson 4:23, 24) Nainyikokinia ijo aisisiaenen Akirot Naka Edeke keda alosenen airiamununeta nuka atukot, isisiauni ijo nuipu nuikamunitos Yawe ka ikeponesio. Kinyikok aputoorit ngesi kotoma aijarakon. Kinyikok aiswamaunun aijulanakineta nuisiyalamikinete Yawe.

3. Epone ani ingarakinia Yawe ijo ainyikokin apolo?

Ebala Ebaibuli ebe: ‘Edeke . . . kitetemikini yes, kiticasi yes, ka aitogogong da.’ (1 Petero 5:10) Itereinikin oni kere ka aitemesio. Konye einakinit Yawe oni nuipuda kanu aipikor aitemesio ngun. (Isabulin 139:23, 24) Isumunit ngesi ainakin oni mere akote bon konye agogong da naka aijaanakin ngesi kamunoonut.​—Kosiom Ipilipin 2:13.

 KISISIAU NUIPU

4. Inyikok ainerenena ka opaperokon loajakan kakere ka apupokinit nges

Ailip keda aisisia Ebaibuli engarakisi ijo araun epapero loka Yawe. Epone ani ingarakiniata ngun ijo ainyikokinit aikunyakin neejai Yawe?

Kosiom Isabulin 62:8, kosodete aimor aingiset nata:

• Epone ani ipedoria ijo aitojokaar ailipasineikon tetere itogogongi epaperonekon ka Yawe?

Kosiom Isabulin 1:2 kosodete aimor aingiset nata:

• Epone ani ipedoria ijo aitojokaar asiomanikon naka Ebaibuli tetere itogogongi epaperonekon ka Yawe?

Anyoika bo nuipedori ijo aswam kanu aimedaun kotoma aisisiakon naka Ebaibuli? Kanu ajenun nuipedori ijo aswam, koboliak EBIDIO, kosodete aimor aingiseta nuetupakinete.

• Anu bo aomisio nukotoma obidio nuikoto ijo aitwasam?

• Anu bo akiro nuikoto ijo aisisia?

 NUIDAU AISISIAUN

Inyikok aitogogong epaperonekon ka Yawe ido itolom alosikineta nuka aijaanakin. Kopone kangol ibuni ijo alelakin aijar ikar kere!

Ainyogoor

• Kanuinyo ipedoria ijo cut acamun ebe ingarakini Yawe ijo aijaanakin nges kamunoonut?

• Epone ani ipedoria ijo aitogogong epaperonekon keda Yawe?

• Epone ani epedoria ajaut kalosikineta nuka aijaanakin aingarakin ijo apolo kotoma omoyo?