ኣብ ብዘሎ እዚ ትምህርቲ መጽሓፍ ቅዱስ፡ ብዛዕባ የሆዋ ብዙሕ ተማሂርካ ኢኻ። እቲ እተምሃርካዮ ኸኣ ፍቕርኻ ኸም ዚዓዝዝ ስለ ዝገበረ፡ ርእስኻ ወፊኻን ተጠሚቕካን ክትከውን ትኽእል ኢኻ። ከምኡ እንተ ዘይጌርካ፡ ኣብ ቀረባ ግዜ ኸምኡ ንምግባር ትሓስብ ትህሉ ትኸውን። ኰይኑ ግና፡ ዕቤትካ ኣብ ጥምቀት ኣየብቅዕን እዩ። ንዘለኣለም ንየሆዋ ኽትቀርቦ ትኽእል ኢኻ። ብኸመይ፧

1. ምስ የሆዋ ዘሎካ ዕርክነት ብቐጻሊ ኸተደልድል ዘሎካ ስለምንታይ ኢኻ፧

ምስ የሆዋ ዘሎና ዕርክነት ብቐጻሊ ንምድልዳል ክንጽዕር ኣሎና። ስለምንታይ፧ ካብኡ “ምእንቲ ኸይንውሰድ።” (እብራውያን 2:1) ብቐጻሊ ንየሆዋ ብተኣማንነት ንምግልጋል፡ እንታይ ኪሕግዘና ይኽእል፧ ኣብ ዕዮ ስብከት ትሑዛት ክንከውንን ንየሆዋ ብኻልእ መገድታት ብዝያዳ ኸነገልግሎን ንኽእል ኢና። (ፊልጲ 3:16 ኣንብብ።) ንየሆዋ ምግልጋል፡ ብሉጽ መገዲ ህይወት እዩ!—መዝሙር 84:10።

2. እንታይ ተወሳኺ ነገራት ኢና ብቐጻሊ ኽንገብር ዘሎና፧

እዚ ትምህርቲ መጽሓፍ ቅዱስ ይውዳእ እኳ እንተሎ፡ ክርስትያናዊ ህይወትካ ግና ይቕጽል እዩ። መጽሓፍ ቅዱስ፡ “ሓድሽ ስብእና . . . ልበሱ” ይብለና እዩ። (ኤፌሶን 4:23, 24) ብቐጻሊ ቃል ኣምላኽ ከተጽንዕን ኣብ ኣኼባታት ጉባኤ ኽትእከብን ከለኻ፡ ብዛዕባ የሆዋን ብዛዕባ ባህርያቱን ሓድሽ ነገራት ክትፈልጥ ኢኻ። እምበኣር፡ ኣብ ህይወትካ ንዕኡ ብዝያዳ እትመስለሉ መገድታት ኣናዲ። ንየሆዋ ንምሕጓስ፡ ብቐጻሊ ኣድላዪ ለውጥታት ግበር።

3. ዕቤት ንምግባር፡ የሆዋ ብኸመይ ይሕግዘካ፧

መጽሓፍ ቅዱስ፡ “ኣምላኽ . . . ንስልጠናኹም ኪፍጽሞ እዩ። ኬጽንዓኩምን ኬበርትዓኩምን ኪስርተኩምን እዩ” ይብል። (1 ጴጥሮስ 5:10) ኵላትና ፈተናታት የጋጥመና እዩ። የሆዋ ግና ንፈተና ኽንጻረር ዜድልየና ዘበለ ይህበና እዩ። (መዝሙር 139:23, 24) ንዓኻ እውን ብተኣማንነት ንምግልጋል ዜኽእል ድሌትን ዓቕምን ከም ዚህበካ ቓል ኣትዩ ኣሎ።—ፊልጲ 2:13 ኣንብብ።

 ኣዕሚቝካ ዅዓት

4. ነቲ ብሉጽ ዓርክኻ ወትሩ ተዛረቦን ስምዓዮን

ጸሎትን መጽናዕቲ መጽሓፍ ቅዱስን፡ ዓርኪ የሆዋ ኽትከውን ኣኽኢሉካ እዩ። እሞ ደኣ እዚ ንጥፈታት እዚ ብዝያዳ ኽትቀርቦ ዜኽእለካ ብኸመይ እዩ፧

መዝሙር 62:8 ኣንብብ፡ ድሕሪኡ በዚ ሕቶ ተመያየጡ፦

• ምስ የሆዋ ዘሎካ ዕርክነት ንምድልዳል፡ ጸሎትካ ብኸመይ ከተመሓይሽ ትኽእል፧

መዝሙር 1:2ን እግረ ጽሑፍን ኣንብብ፡ ድሕሪኡ በዚ ሕቶ ተመያየጡ፦

• ምስ የሆዋ ዘሎካ ዕርክነት ንምድልዳል፡ ንባብ መጽሓፍ ቅዱስካ ብኸመይ ከተመሓይሽ ትኽእል፧

ካብ ብሕታዊ መጽናዕትኻ ኸመይ ጌርካ ብዝያዳ ኽትጥቀም ትኽእል፧ ገለ ሓሳባት ንምርኣይ፡ ቪድዮ ኣጻውት፡ ድሕሪኡ በዚ ሕቶታት ተመያየጡ፦

• ኣብታ ቪድዮ ዚርከብ እንታይ ሓሳባት ኢኻ ኽትትግብር እትኽእል፧

• እንታይ ርእሰ ነገራት ኢኻ ኸተጽንዕ እትደሊ፧

 ጽማቝ

ምስ የሆዋ ዘሎካ ዕርክነት ብቐጻሊ ኣደልድል፡ ብቐጻሊ እውን መንፈሳዊ ሸቶታት ኣውጽእ። ሽዑ፡ ንዘለኣለም ብህይወት ክትነብር ኢኻ!

ክለሳ

• የሆዋ ብተኣማንነት ከተገልግሎ ኸም ዚሕግዘካ ኽትተኣማመን እትኽእል ስለምንታይ ኢኻ፧

• ምስ የሆዋ ዘሎካ ዕርክነት ብኸመይ ከተደልድል ትኽእል፧

• መንፈሳዊ ሸቶታት፡ ዕቤት ንምግባር ብኸመይ ይሕግዘካ፧