Sa pag-aaral mo sa aklat na ito, marami kang nalaman tungkol kay Jehova. At dahil sa mga natutuhan mo, minahal mo siya at baka inialay mo na ang sarili mo sa kaniya at nagpabautismo. Kung hindi pa, baka nagpaplano ka nang gawin iyan sa hinaharap. Pero pagkatapos ng bautismo mo, patuloy ka pa ring magsisikap na mapalapít kay Jehova. At ang totoo, puwede mo itong gawin habambuhay. Paano?

1. Bakit dapat mong patuloy na patibayin ang pakikipagkaibigan mo kay Jehova?

Kailangan nating gawin ang buong makakaya natin para mapatibay ang pakikipagkaibigan natin kay Jehova. Bakit? “Para hindi tayo maanod palayo kailanman” sa kaniya. (Hebreo 2:1) Ano ang makakatulong sa atin para patuloy tayong makapaglingkod nang tapat kay Jehova? Maging busy sa gawaing pangangaral at maghanap ng paraan para mas makapaglingkod pa sa Diyos natin. (Basahin ang Filipos 3:16.) Ang paglilingkod kay Jehova ang pinakamagandang magagawa natin sa buhay!​—Awit 84:10.

2. Ano pa ang dapat na patuloy mong gawin?

Kahit papatapos na ang pag-aaral mo sa aklat na ito, magpapatuloy pa rin ang buhay mo bilang isang Kristiyano. Sinasabi ng Bibliya na kailangan nating “isuot ang bagong personalidad.” (Efeso 4:​23, 24) Habang patuloy kang nag-aaral ng Salita ng Diyos at dumadalo sa mga pulong, may matututuhan ka pa ring bago tungkol kay Jehova at sa mga katangian niya. Kaya sikaping laging matularan ang mga katangian niya. At patuloy na gumawa ng mga kinakailangang pagbabago para mapasaya si Jehova.

3. Paano ka matutulungan ni Jehova?

Sinasabi ng Bibliya: “Ang Diyos ang . . . mismong tatapos sa inyong pagsasanay. Patatatagin niya kayo, palalakasin niya kayo, gagawin niya kayong matibay.” (1 Pedro 5:10) Lahat tayo ay puwedeng matuksong gumawa ng mali. Pero ibibigay ni Jehova ang kailangan natin para malabanan natin ang tukso. (Awit 139:​23, 24) Nangangako siya na bibigyan niya tayo ng pagnanais at lakas para tapat tayong makapaglingkod sa kaniya.​—Basahin ang Filipos 2:13.

 PAG-ARALAN

4. Laging makipag-usap at makinig sa best Friend mo

Naging kaibigan ka ni Jehova dahil sa pananalangin at pag-aaral mo ng Bibliya. Paano ito makakatulong para mas mapalapít ka pa sa kaniya?

Basahin ang Awit 62:8. Pagkatapos, talakayin ang tanong na ito:

• Para mapatibay mo ang pakikipagkaibigan kay Jehova, ano ang puwede mong pasulungin sa paraan mo ng pananalangin at sa mga sinasabi mo sa kaniya?

Basahin ang Awit 1:2 at talababa. Pagkatapos, talakayin ang tanong na ito:

• Para mapatibay mo ang pakikipagkaibigan kay Jehova, paano ka mas makikinabang sa pagbabasa mo ng Bibliya?

Ano ang magagawa mo para mas makinabang ka sa personal na pag-aaral ng Bibliya? Para magkaideya ka, panoorin ang VIDEO. Pagkatapos, talakayin ang mga tanong na ito:

• Ano ang gusto mong gayahin sa napanood mo?

• Anong mga paksa ang gusto mong pag-aralan?

 SUMARYO

Patuloy na patibayin ang pakikipagkaibigan mo kay Jehova at magkaroon ng espirituwal na mga tunguhin. Kung gagawin mo ito, magkakaroon ka ng masayang buhay magpakailanman!

Ano ang Natutuhan Mo?

• Bakit sigurado ka na tutulungan ka ni Jehova para mapaglingkuran mo siya nang tapat?

• Paano mo pa mapapatibay ang pakikipagkaibigan mo kay Jehova?

• Paano makakatulong ang espirituwal na mga tunguhin para mas mapalapít ka kay Jehova?