LĒSONI 60
Hokohoko Atu Hoʻo Fakalakalaká
ʻI he ako Tohi Tapu ko ení, kuó ke ako ʻa e meʻa lahi fekauʻaki mo Sihova. Ko e ngaahi meʻa kuó ke akó kuó ne ʻai ai koe ke ke ʻofa lahi kiate ia ʻo ueʻi nai ai koe ke fakatapui kiate ia pea hoko ʻo papitaiso. Kapau ʻoku ʻikai, mahalo ʻokú ke fakakaukau ke fai eni ʻi he kahaʻu vavé ni maí. Ka ʻi he hili ʻa e papitaisó ʻoku ʻikai ngata ai hoʻo fakalakalaká. ʻOku lava ke ke hanganaki ʻunuʻunu ofi ange kia Sihova ʻo taʻengata. Anga-fēfē?
1. Ko e hā ʻoku totonu ai ke ke hokohoko atu hoʻo fakaivimālohiʻi ho vahaʻangatae mo Sihová?
Kuo pau ke tau ngāue mālohi ke hokohoko atu hono fakaivimālohiʻi hotau tuʻunga kaumeʻa mo Sihová. Ko e hā hono ʻuhingá? “Koeʻuhi ke ʻoua ʻaupito naʻa tau ʻauhia atu” meiate ia. (Hepelū 2:1) Ko e hā te ne tokoniʻi kitautolu ke hanganaki tauhi faitōnunga kia Sihová? ʻOku lava ke tau nofoʻaki femoʻuekina ʻi he ngāue fakamalangá pea kumi ki he ngaahi founga kehe ke tauhi ki hotau ʻOtuá ʻo toe lahi ange. (Lau ʻa e Filipai 3:16.) Ko e tauhi kia Sihová ʻa e ʻalunga moʻui lelei tahá!—Saame 84:10.
2. Ko e hā mo ha toe meʻa ʻoku totonu ke ke hokohoko atu hono faí?
Neongo ʻoku ʻosi hoʻo ako Tohi Tapu fetalanoaʻakí, ko ho ʻalunga moʻui ko ha Kalisitiané ʻe hokohoko atu pē. ʻOku pehē ʻe he Tohi Tapú ʻoku fiemaʻu ke tau “kofuʻaki ʻa e angaʻitangata foʻou.” (ʻEfesō 4:23, 24) ʻI hoʻo hokohoko atu ke ako ʻa e Folofola ʻa e ʻOtuá pea maʻu ʻa e ngaahi fakataha ʻa e fakatahaʻangá, te ke ako ʻa e ngaahi meʻa foʻou fekauʻaki mo Sihova mo hono ngaahi ʻulungāngá. Kumi ki he ngaahi founga ke ke faʻifaʻitaki ai ki hono ngaahi ʻulungāngá ʻo toe lahi ange ʻi hoʻo moʻuí. Hokohoko atu hono fai ʻa e ngaahi liliu ʻoku fiemaʻú ke ʻai ʻa Sihova ke fiefia.
3. ʻE anga-fēfē hono tokoniʻi koe ʻe Sihova ke ke fakalakalaká?
ʻOku pehē ʻe he Tohi Tapú: “Ko e ʻOtua . . . te ne fakaʻosi ʻe ia homou akoʻí. Te ne ʻai kimoutolu ke mou tuʻu maʻu, te ne ʻai kimoutolu ke mou mālohi, te ne fokotuʻu kimoutolu ʻi ha makatuʻunga mālohi.” (1 Pita 5:10) Ko kitautolu kotoa ʻoku tau fehangahangai mo e ngaahi fakatauele. Ka ʻoku ʻomai ʻe Sihova kiate kitautolu ʻa e meʻa ʻoku tau fiemaʻú ke ikuʻi ʻa e fakatauelé. (Saame 139:23, 24) ʻOkú ne talaʻofa mai te ne ʻoatu kiate koe ʻa e holi mo e mālohi ke tauhi faitōnunga kiate ia.—Lau ʻa e Filipai 2:13.
KELI LOLOTO ANGE
Fakakaukau ki he founga ʻoku lava ke ke hokohoko atu ai ke fakalakalaká pea mo e founga ʻe tāpuakiʻi ai koe ʻe Sihová.
4. Hanganaki fetuʻutaki mo ho Kaumeʻa lelei tahá
Ko e lotú mo e ako Tohi Tapú kuó ne tokoniʻi koe ke hoko ko e kaumeʻa ʻo Sihova. ʻOku lava fēfē ʻa e ongo meʻa ko iá ʻo tokoniʻi koe ke ʻunuʻunu ʻo toe ofi ange kiate iá?
Lau ʻa e Saame 62:8, pea lāulea leva ki he fehuʻi ko ení:
-
Ke fakaivimālohiʻi ho vahaʻangatae mo Sihová, ʻe anga-fēfē haʻo fakaleleiʻi hoʻo ngaahi lotú?
Lau ʻa e Saame 1:2 mo e fakamatala ʻi laló, pea lāulea leva ki he fehuʻi ko ení:
-
Ke fakaivimālohiʻi ho vahaʻangatae mo Sihová, ʻe anga-fēfē haʻo fakaleleiʻi hoʻo lau Tohi Tapú?
ʻE lava fēfē ke ke maʻu ʻaonga lahi ange mei hoʻo ako fakafoʻituituí? Ke maʻu ha ngaahi fakakaukau, huluʻi ʻa e VITIOÓ, pea lāulea leva ki he ongo fehuʻi hokó.
-
Ko fē ʻa e ngaahi fokotuʻu ʻi he vitioó ʻoku lava ke ke ngāueʻakí?
-
Ko fē ʻa e ngaahi kaveinga te ke saiʻia ke akó?
5. Fokotuʻu ha ngaahi taumuʻa fakalaumālie
Ko hono fokotuʻu ha ngaahi taumuʻa ʻi he ngāue ʻa Sihová te ne tokoniʻi koe ke hokohoko atu hoʻo fakalakalaká. Huluʻi ʻa e VITIOÓ, pea lāulea leva ki he fehuʻi hokó.
-
ʻI he vitiō ko ení, naʻe anga-fēfē maʻu ʻaonga ʻa Kemiloni mei hono fokotuʻu ʻa e ngaahi taumuʻa fakalaumālié?
Heʻikai lava ʻa e taha kotoa ʻo ʻalu ʻo malanga ʻi ha fonua muli. Kae kehe, te tau lava kotoa ʻo fokotuʻu ʻa e ngaahi taumuʻa ʻe lava ke aʻusia. Lau ʻa e Palōveepi 21:5, pea fakakaukau leva pe ko e hā ʻa e ngaahi taumuʻa te ke loto ke fokotuʻú . . .
-
ʻi he fakatahaʻangá.
-
ʻi he ngāue fakamalangá.
ʻE anga-fēfē hono tokoniʻi koe ʻe he tefitoʻi moʻoni ʻi he vēsí ke ke aʻusia hoʻo ngaahi taumuʻá?
Ngaahi taumuʻa ke fokotuʻú
-
Fakaleleiʻi hoʻo ngaahi lotú.
-
Lau ʻa e Tohi Tapú kakato.
-
Feinga ke ʻilo ʻa e taha kotoa ʻi hoʻo fakatahaʻangá.
-
Kamata pea fakahoko ha ako Tohi Tapu.
-
Ngāue ko ha tāimuʻa tokoni pe tāimuʻa tuʻumaʻu.
-
Kapau ko ha tokoua koe, kakapa atu ke hoko ko ha sevāniti fakafaifekau.
6. Fiefia ʻi he moʻuí ʻo taʻengata!
Lau ʻa e Saame 22:26, pea lāulea leva ki he fehuʻi ko ení:
-
Ko e hā ʻe lava ke ke faí ke fiefia ʻi he moʻuí he taimí ni pea taʻengata?
FAKANOUNOU
Hokohoko atu hono fakaivimālohiʻi ho vahaʻangatae mo Sihová pea fokotuʻu ha ngaahi taumuʻa fakalaumālie. ʻE lava leva ke ke fiefia ʻi he moʻuí he taimí ni pea taʻengata!
Fakamanatu
-
Ko e hā ʻoku lava ai ke ke tuipau ʻe tokoniʻi koe ʻe Sihova ke ke tauhi faitōnunga kiate iá?
-
ʻE lava fēfē ke ke fakaivimālohiʻi ho vahaʻangatae mo Sihová?
-
ʻE anga-fēfē hono tokoniʻi koe ʻe he ngaahi taumuʻa fakalaumālié ke ke fakalakalaká?
AKO LAHI ANGE
Ko e hā ʻoku mahuʻinga ange kia Sihová, ko ha foʻi ngāue makehe ʻe taha, pe ko ha ʻalunga moʻui faitōnunga kiate ia?
Naʻa mo ha sevāniti faitōnunga ʻa Sihova ʻe mole nai ʻene fiefiá. Sio ki he founga ke toe maʻu ai ʻa e fiefiá.
ʻE lava fēfē ke ke fokotuʻu ha ngaahi taumuʻa fakalaumālie pea aʻusia ia?
Ko e hā ʻoku mātuʻaki mahuʻinga ai ke hoko ko ha Kalisitiane matuʻotuʻa, pea ʻoku lava fēfē ke ke aʻusia ia?
“Tutui Atu ki he Matuʻotuʻá—‘Oku Ofi ae Aho Lahi o Jihova’” (Ko e Taua Leʻo, Mē 15, 2009)
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
