LESEN 60
Wok Yet Long Go Klostu Long Jehova
Long rot bilong dispela Baibel stadi kos, yu bin kisim save long planti samting long Jehova. Ol samting yu lainim i mekim na yu laikim em tru olsem na yu dediket long em na kisim baptais. Sapos yu no mekim olsem yet, ating yu tingting long mekim olsem liklik taim bihain. Tasol taim yu kisim baptais pinis, dispela i no pinis bilong en. Yu ken wok yet long i go klostu long Jehova inap oltaim oltaim. Long wanem rot?
1. Wai na yu mas wok yet long strongim pasin pren bilong yu wantaim Jehova?
Yumi mas wok strong yet long strongim pasin pren bilong yumi wantaim Jehova. Bilong wanem? Yumi mekim olsem na bai yumi no “lusim God i gat laip.” (Hibru 3:12) Wanem samting inap helpim yumi long i stap gut yet long mekim wok bilong Jehova? Yumi ken givim bel long autim tok na painim ol narapela rot bilong mekim moa yet wok bilong God. (Ritim Filipai 3:16.) Wok bilong Jehova em i nambawan gutpela wok yumi ken mekim long i stap bilong yumi!—Buk Song 84:10.
2. Wanem narapela samting yu mas wok yet long mekim?
Tru, stadi bilong yu long Baibel i kam pinis nau, tasol ol samting yu mas mekim olsem wanpela Kristen i no gat pinis bilong en. Baibel i tok yumi mas “kisim nupela pasin.” (Efesus 4:23, 24) Taim yu wok long stadi yet long Baibel na go long ol miting, yu bai kisim save long ol nupela samting long Jehova na ol pasin bilong em. Painim ol rot long bihainim gut pasin bilong em long i stap bilong yu. Wok yet long mekim ol senis we bai mekim Jehova i amamas.
3. Olsem wanem Jehova bai helpim yu long go klostu moa long em?
Baibel i tok: “God bai inapim trening bilong yupela. Em bai strongim yupela na helpim yupela long stap strong yet na mekim yupela i sanap strong.” (1 Pita 5:10) Ol traim bai painim yumi olgeta. Tasol Jehova i givim ol samting yumi nidim bilong sakim ol traim. (Buk Song 139:23, 24) Em i tok promis long givim yu laik na strong bilong i stap gut long mekim wok bilong em.—Ritim Filipai 2:13.
KISIM SAMPELA SAVE MOA
Skelim olsem wanem yu ken wok yet long go klostu long Jehova na olsem wanem em bai blesim yu.
4. Wok yet long toktok wantaim nambawan gutpela Pren bilong yu na putim yau long em
Beten na stadi long Baibel i bin helpim yu long kamap pren bilong Jehova. Long wanem rot ol dispela samting inap helpim yu long go klostu moa yet long em?
Ritim Buk Song 62:8, na stori long dispela askim:
-
Bilong strongim pasin pren bilong yu wantaim Jehova, yu ken mekim wanem na bai ol beten bilong yu i ken kamap gutpela moa?
Ritim Buk Song 1:2 na futnot, na stori long dispela askim:
-
Bilong strongim pasin pren bilong yu wantaim Jehova, yu ken mekim wanem na bai Baibel ritim bilong yu i ken helpim yu gut?
Yu ken mekim wanem na bai pesenel stadi bilong yu i helpim yu gut? Bilong kisim sampela tingting, pilaim VIDIO, na stori long dispela askim.
-
Wanem ol tok long vidio yu laik bihainim?
-
Wanem ol topik yu laik stadi long en?
5. Putim ol mak long sait bilong bilip em yu laik winim
Taim yu putim ol mak bilong winim long mekim wok bilong Jehova, dispela bai helpim yu long wok yet long go klostu long em. Pilaim VIDIO, na stori long dispela askim.
-
Long vidio, Cameron i putim ol mak em i laik winim long mekim wok bilong God, na dispela i helpim em olsem wanem?
Tru, yumi olgeta i no inap i go long narapela kantri bilong autim tok. Tasol yumi ken putim ol mak yumi inap long winim. Ritim Provep 21:5, na stori long wanem ol mak yu laik putim bilong winim . . .
-
insait long kongrigesen
-
long wok autim tok
Olsem wanem stiatok i stap long dispela ves inap helpim yu long winim ol mak yu putim?
Sampela mak yu ken putim
-
Mekim ol beten bilong yu i kamap gutpela moa.
-
Ritim Baibel olgeta.
-
Kisim save long olgeta insait long kongrigesen.
-
Kirapim na mekim wanpela Baibel stadi.
-
Mekim wok painia haptaim o painia oltaim.
-
Sapos yu wanpela brata, putim mak long kamap wanpela kongrigesen sevan.
6. Stap amamas oltaim!
Ritim Buk Song 22:26, na stori long dispela askim:
-
Yu ken mekim wanem bilong i stap amamas long nau na i go inap oltaim oltaim?
OL BIKPELA POIN
Wok yet long strongim pasin pren bilong yu wantaim Jehova na putim ol mak long sait bilong bilip em yu laik winim. Taim yu mekim olsem, yu inap stap amamas oltaim oltaim!
Riviu
-
Wai na yu ken bilip tru olsem Jehova bai helpim yu long stap gut long wok bilong em?
-
Olsem wanem yu ken strongim pasin pren bilong yu wantaim Jehova?
-
Taim yu putim ol mak long sait bilong bilip em yu laik winim, olsem wanem dispela inap helpim yu long go klostu moa long Jehova?
MEKIM WOK PAINIMAUT
Wanem samting i bikpela samting moa long Jehova, yumi mekim samting wanpela taim tasol bilong soim olsem yumi givim bel olgeta long em, o yumi stap gut long em long laip olgeta bilong yumi?
Maski wanpela i mekim wok bilong Jehova, amamas bilong em tu inap pinis. Lukim rot bilong kisim bek dispela amamas.
Olsem wanem yu ken putim ol mak long sait bilong bilip na winim ol?
“Putim Ol Mak Bilong Spirit Bilong Givim Biknem Long God” (Wastaua, Julai 15, 2004)
Wai na em i bikpela samting long kamap strongpela Kristen, na olsem wanem yu ken mekim olsem?
“Wok Yet Long Kamap Strongpela Kristen—‘Bikpela De Bilong Jehova i Klostu’” (Wastaua, Me 15, 2009)
Ating Yu Bai Laikim Tu
OL ASKIM PLANTI MAN I SAVE MEKIM
Baibel Stadi Kos Em Ol Witnes Bilong Jehova i Save Mekim Em Wanem Samting?
Ol Witnes Bilong Jehova i mekim fri Baibel stadi program, yu ken yusim wanpela trenslesen bilong Baibel em yu yet laikim. Yu ken invaitim famili olgeta bilong yu o ol pren bilong yu long joinim yu long stadi.
