Iásï engajtsï kʼamarakia ini libruni, uánikua ambejtsï jorhenguarhiskia Tata Diosï Jeobaeri ambe. Ka ini ambe jimbo, niáraskajtsï kánikua xénchani Tata Diosïni engajtsï jamberi aiakukuarhekia imani ka itsï atakuarhini. Engajtsï nótki ísï úni jaka, jamberijtsï no ióni jimbo ísï uaakia. Peru ambe engajtsï jatsika para míteni, jindeesti eska ísï tátsekua engajtsï itsï atakuarhiakia jatsiskajtsï para seguirini jarhani andarhierani Tata Diosïni ka uaakajtsï ísï úni para méntkisï. Ju je exeni néna.

1. ¿Andijtsïsï jatsi para seguirini uinhaperantani chaari pájperakua Tata Diosï Jeoba jingoni?

Jatsiskachi para kánikua jánguarhintani parachi seguirini jarhani sánderu ambakiti pájperakua ma jatsini Tata Diosï Jeoba jingoni. ¿Andi? “Para eskachi no jucha sánhani arhiaka mirikurhini” ka tátsekuachi niárani jurajkuni Jeobani (Ebreu 2:1). ¿Ambejtsïni jarhuataa parachi no méni jurajkuni Tata Diosï Jeobani? Jánguarhintani méntkisï aianhpini ka ístu úni máteru ambe parachi sánderu sési marhuakuni (arhinta je Filipusʌ 3:16). ¡No ma ambe jarhasti enga sánderu sésiika eska úrani juchaari tsípikuani parachi Jeobani marhuakuni! (Salmo 84:10).

2. ¿Ambejtsï jatsiski para seguirini úni?

Nájkirukajtsï kʼamarani jakaia ini libruni, chaari irekua komueska kristianu ma apenasi uénaxati. Bibliajtsïni arhisïndi eska mándani kristianu jatsiska para ísï jámani “eska na terukuntajka mintsita jimbanhi jingoni” (Efesu 4:23, 24). Engajtsï seguiriska jorhenguarhini Tata Diosïri Karakatani ka nirani tánguarhikuecharhu, sánderujtsï ambe jorhenguarhiaka Tata Diosï Jeobaeri ambe ka na enga jásïika ima. Jánguarhinta je sánderu ísï jámani eska ima na jámajka ka enga uétarhiaka mójtakuni ambe ma parajtsï sési pʼikuastani Tata Diosï Jeobani, ísï ú je.

3. ¿Nénaksïni jarhuataa Jeoba parajtsï sánderu andarhierani imani?

Biblia uandasïndi: “[Tata] Diosï [...] ué eskajtsï no ma ambe jimbo kuerataaka ísï jindeeni eska [Tata] Diosï na uékajka, ka eskajtsï uinhapiaka para nójtsï débili korhokani sino sési jimbo uinhapintsï” (1 Pedru 5:10). Iáminduechachi ménisï jatsiasïnga tsʼéjkukuechani, perujtsïni Jeoba íntskuati ambe engachi uétarhinchajka parachi úni orhepani uérani (Salmo 139:23, 24). Ístu, imaksïni aiachisïndi eskaksïni íntskuaka uinhapikua parajtsï úni méntkisï sési marhuakuni (arhinta je Filipusʌ 2:13).

 JORHENGUARHI JE SÁNDERU AMBE

4. Seguiri je uandontskuarhekuni ka kurhajchani chaari sánderu ambakiti amiguni

Kómarhini ka jorhenguarhini Bibliani, jarhuatastiksïnia parajtsï Tata Diosï Jeobaeri amigueni. ¿Uaaksïni útasï i ambe jarhuatani parajtsï sánderu andarhierani imani? ¿Néna?

Arhinta je Salmo 62:8 ka uandontskuarhi je íri ambe:

• Jorhenguarhini sánderu sési kómarhini Tata Diosïni, jarhuataatiksïni parajtsï sánderu sési pájperani imani jingoni. ¿Nénajtsï uaa ísï úni?

Arhinta je Salmo 1:2 ka uandontskuarhi je íri ambe:

• Jorhenguarhini sánderu sési arhintani Bibliani, jarhuataatiksïni parajtsï sánderu sési pájperani Tata Diosï Jeoba jingoni. ¿Nénajtsï uaa ísï úni?

¿Ambejtsï uaa paraksïni sánderu sési marhuacheni chaari Bibliaeri jorhenguarhikua? Parajtsï úni exeni máru ambe, exe je BIDEUNI. Tátsekua uandontskuarhi je íri ambe:

• ¿Ambejtsï tsitipirini úni enga i bideu jimbo uandajka?

• ¿Náki temechantsï tsitipirini jorhenguarhiani?

 AMBE ENGACHI JORHENGUARHIKA

Seguiri je uinhaperantani chaari pájperakua Tata Diosï Jeoba jingoni ka jatsikukuarhiani metechani parajtsï sánderu sési marhuakuni imani. ¡Ísïjtsï uaaka tsípikua jingoni irekani para méntkisï!

Ambejtsï jorhenguarhiski

• ¿Andijtsïsï uaa seguru jarhani eskaksïni Jeoba jarhuataaka parajtsï méntkisï marhuakuni?

• ¿Ambejtsï uaa úni paraka chaari pájperakua Tata Diosï Jeoba jingoni sánderu uinhapiaka?

• ¿Andisï xáni jukaparhakue jatsikukuarhiani metechani parajtsï sánderu sési marhuakuni Tata Diosï Jeobani?