I te sukesukega kātoa tenei ki te Tusi Tapu, ne tauloto ne koe a mea e uke e uiga ki a Ieova. A mea ne tauloto ne koe, ne fai ei ke gasolo aka tou alofa ki a ia kae kāti ka fai ei ke tuku atu foki tou ola ki a ia kae papatiso. Kafai e seki fai penā, kāti ko mafaufau koe ki ei mō aso mai mua. Kae ko te papatisoga, e se ko te gataga o tou gasolo ki mua. E mafai o tumau koe i te fakapilipili atu ki a Ieova ki te se-gata-mai. E pefea la?

1. Kaia e ‵tau ei o tumau koe i te fakamalosi aka o tou va fakataugasoa mo Ieova?

E ‵tau mo tatou o fakamalosi aka faeloa te ‵tou va fakataugasoa mo Ieova. Kaia? “Ko te mea ke mo a ma tapea‵pea tatou kea‵tea” mai i a ia. (Epelu 2:1) Ne a mea ka fesoasoani mai ke tumau i te tavini atu mo te fakamaoni ki a Ieova? E mafai o ‵kau atu faeloa tatou ki te galuega talai kae ‵sala ki nisi auala ke mafai o tavini katoatoa atu ki te Atua. (Faitau te Filipi 3:16.) A te tavini atu ki a Ieova ko te ‵toe olaga ‵lei eiloa!—Salamo 84:10.

2. Se a te suā mea e ‵tau o fai faeloa ne koe?

E tiga eiloa ko palele atu te sukesukega tenei ki te Tusi Tapu, kae ka tumau eiloa a tou olaga e pelā me se Kelisiano. E fai mai te Tusi Tapu me e ‵tau mo tatou “o ‵pei ki uiga ‵fou.” (Efeso 4:23, 24) I te taimi e tumau ei koe i te sukesuke ki te Muna a te Atua kae kau ki fakatasiga a te fakapotopotoga, ka momea aka te iloa ‵lei ne koe a Ieova mo ana uiga. ‵Sala ki auala ke momea aka tou fakaakoako atu ki ana uiga i tou olaga. Tumau i te faiga o ‵fuliga e manakogina ke fakafiafia atu ki a Ieova.

3. Ka fesoasoani atu pefea a Ieova ke gasolo atu koe ki mua?

E fai mai te Tusi Tapu: “A te Atua . . . ka fakakatoatoa ne ia otou akoakoga. Ka faka‵mautakitaki ne ia koutou, ka fakamalosi ne ia koutou, ka tuku ne ia koutou i luga i se fakavae telā e ‵mautakitaki.” (1 Petelu 5:10) E fe‵paki a tatou katoa mo tofotofoga. Kae tuku mai ne Ieova a mea e manakogina ke ‵teke atu ki ei. (Salamo 139:23, 24) Ne tauto mai a ia ke tuku atu a te manakoga mo te malosi ke tavini atu koe ki a ia mo te fakamaoni.—Faitau te Filipi 2:13.

 KELI MALOSI IFO

4. Tumau i te fesokotaki atu faeloa ki tou toe Taugasoa pele

Ne fesoasoani atu eiloa a te ‵talo mo te sukesuke ki te Tusi Tapu ke fai koe mo taugasoa o Ieova. E mafai pefea o fesoasoani atu a mea konā ke momea aka tou pili atu ki a ia?

Faitau te Salamo 62:8, ko sau‵tala ei ki te fesili tenei:

• Ke fakamalosi aka tou va fakataugasoa mo Ieova, e mafai pefea o momea aka te ‵lei o au ‵talo?

Faitau te Salamo 1:2 mo te fakamatalaga mai lalo, ko sau‵tala ei ki te fesili tenei:

• Ke fakamalosi aka tou va fakataugasoa mo Ieova, e mafai pefea o momea aka te ‵lei o tau faitauga ki te Tusi Tapu?

E mafai pefea o fai ne koe ke gasolo aka o aoga malosi au sukesukega totino? Ke maua a nisi manatu, pei te VITIO, ko sau‵tala ei ki fesili konei.

• Ne a manatu mai te vitio e mafai o fakagalue ne koe?

• Ne a mataupu e fia sukesuke koe ki ei?

 MANATU AOGA

Tumau i te fakamalosi aka o tou va fakataugasoa mo Ieova kae fakatoka a mea e mafai o fai ne koe i te feitu faka-te-agaga. Ko mafai ei o fiafia koe ki te olaga ki te se-gata-mai!

Fesili

• Kaia e mafai ei o maua te loto talitonu me ka fesoasoani atu a Ieova ke tavini atu koe ki a ia mo te fakamaoni?

• E mafai pefea o fakamalosi aka ne koe tou va fakataugasoa mo Ieova?

• E fesoasoani atu pefea a mea e mafai o fai i te feitu faka-te-agaga ke gasolo koe ki mua?