Kursu ino ye Bhaibheri yakamufundisa zvakawanda nge zva Djehovha. Zviro zvamakafunda zvakaita kuti mumude zvekutoti makaguma pakudzipira kaari mobhabhatidzwa. Kana musati mabhabhatidzwa, pamweni muri kutorangarira kuzviita mu nguwa doko iri kuteera. Mungarumbwa mecikhwedera dhuze na Djehovha nokusikaperi. Mungazviita kudini?

1. Ngei mecidikana kurumbwa mecibambisa ushamwari wenyu na Djehovha?

Tinodikana kuseenza no simba kuti tirumbwe tecibambisa ushamwari wedu na Djehovha. Ngei tecidikana kuita kudaro? “Kuti tisazopauke padoko no padoko” tecibva kaari. (Ahebheru 2:1) Cinyi cingatibetsera kuti tirumbwe teciseenzera Djehovha takagondeka? Tinodikana kugara takabatikana mu basa rekuparidzira uye kupsvaka mishobo dzimweni dzatingatunhudzira nadzo zvataigara teciita pakuseenzera Mwari. (Erengai Afiripi 3:16.) Apana ciro cakanaka kudarika kurarama teciseenzera Djehovha!—Pisarema 84:10.

2. Zviro zvipi zvimweni zvamungarumbwa meciita?

Kunyazi hazvo kursu yenyu ye Bhaibheri yaakupera, upenyu wenyu hinga MukKristu uri kuenderera mberi. Bhaibheri rinobhuya kuti tinodikana “kupfeka unhu upsva.” (Aefeso 4:23, 24) Pamucarumbwa mecifunda Soko ra Mwari nekupinda misangano, mucafunda zviro zvipsva nge zva Djehovha. Psvakai mishobo yamungatunhudzira nayo kumuteedzera mu upenyu wenyu. Rumbwai mecigadzirisa paya pamunoona kuti panodikana kugadziriswa kuti mupfadze Djehovha.

3. Djehovha acamubetsera kudini kuti murumbwe mecibambisa ushamwari wenyu naye?

Bhaibheri rinoti: “Mwari . . . acapedzesa kumufundisai. Iyena acamushingisai, acamubambisai, uye acaita kuti mugare makabamba.” (1 Pedru 5:10) Tese tinosongana no miedzo. Asi Djehovha anotipasa zvinodikanwa kuti tikwanise kuikunda. (Pisarema 139:23, 24) Iyena anogondesa kuti acamupasa cido no simba kuti murumbwe mecimuseenzera.—Erengai Afiripi 2:13.

 FUNDAI ZVAKAWANDA

4. Rumbwai mecireketa no shamwari yenyu ye pa mwoyo, Djehovha

Munamato uye kufunda Bhaibheri zvakamubetsera kugara shamwari ya Djehovha. Asi zviro izvi zvingamubetsera kudini kuti mutunhudzire kukhwedera padhuze naye?

Erengai Pisarema 62:8, pedzepo cedzai nge zve mubvunzo unoteera:

• Kuti mubambise ushamwari wenyu na Djehovha, mungagadzirisa kudini manamatiro amunoita?

Erengai Pisarema 1:2 uye masoko e pasi, pedzepo cedzai nge zve mubvunzo unoteera:

• Kuti mubambise ushamwari wenyu na Djehovha mungatunhudzira kudini maerengero amunoita Bhaibheri?

Mungaita kudini kuti munyase kubetserhwa ngekufunda kamunoita Bhaibheri muri mwega? Kuti muone mazano amweni, ridzai VHIDHIYO, pedzepo cedzai nge zve mibvunzo dzinoteera.

• Pamazano arekethwa mu vhidhiyo, ngaapi amunorangarira kuti angaseenzeswa?

• Munoda kufunda nge zve nyaya dzipi?

 MUCIGWAGWA

Rumbwai mecibambisa ushamwari wenyu na Djehovha uye garai no zvinangwa zvekunamata. Kana mukadaro mucapfadzwa ne upenyu nokusikaperi!

Mibvunzo yekuhwirinzira

• Ngei muno rugondo rekuti Djehovha anokwanisa kumubetsera kuti murumbwe mecimuseenzera makagondeka?

• Mungabambisa kudini ushamwari wenyu na Djehovha?

• Ngei kugara no zvinangwa zvekunamata kungabambisa ushamwari wenyu na Djehovha