No guda zwithu zwinzhi nga ha Yehova musi ni tshi khou guda Bivhili ni tshi shumisa heyi bugu. Zwithu zwe na zwi guda zwo ita uri ni fune Yehova nga maanḓa lwe khamusi na ḓiṋekedzela khae na lovhedzwa. Arali ni sa athu ita nga u ralo, khamusi ni khou humbula u zwi ita hu si kale. Fhedzi u lovhedzwa a zwi ambi uri ni fanela u litsha u bvela phanḓa ni tshi khwaṱhisa vhushaka haṋu na Yehova. Ni nga bvela phanḓa ni tshi khwaṱhisa vhushaka haṋu na Yehova lwa tshoṱhe. Ni nga zwi itisa hani?

1. Ndi ngani ni tshi fanela u bvela phanḓa ni tshi khwaṱhisa vhushaka haṋu na Yehova?

Ri tea u shuma vhukuma uri ri kone u bvela phanḓa ri tshi khwaṱhisa vhushaka hashu na Yehova. Ndi ngani? U itela uri “ri si bve nḓilani.” (Vhahevheru 2:1) Ndi mini zwine zwa nga ri thusa uri ri bvele phanḓa ri tshi shumela Yehova nga u fhulufhedzea? Ri nga dzula ro farakanea mushumoni wa u ḓivhadza mafhungo maḓifha na u wana dziṅwe nḓila dza u shumela Mudzimu washu nga vhuḓalo. (Vhalani Vhafilipi 3:​16.) U shumela Yehova ndi yone nḓila ya khwinesa ine ra nga shumisa ngayo vhutshilo hashu!​—Phisalema 84:10.

2. Ndi zwifhio zwiṅwe zwine na tea u bvela phanḓa ni tshi zwi ita?

Naho ni tshi khou fhedza u guda Bivhili ni tshi shumisa ino bugu, ni ḓo bvela phanḓa ni tshi tshila sa Mukriste. Bivhili i amba uri ri tea u “[ambara] vhumuthu vhuswa.” (Vhaefesa 4:​23, 24) Musi ni tshi bvela phanḓa ni tshi guda Ipfi ḽa Mudzimu na u vha hone miṱanganoni ya tshivhidzo, ni ḓo guda zwithu zwiswa nga ha Yehova na zwine a vha zwone. Wanani nḓila dzine na nga edzisa ngadzo zwine Yehova a vha zwone. Bvelani phanḓa ni tshi ita tshanduko dzine dza ṱoḓea u itela u takadza Yehova.

3. Yehova u ḓo ni thusa hani uri ni ite mvelaphanḓa?

Bivhili i ri: “Mudzimu . . . u ḓo ni gudisa nga ho fhelelaho, u ḓo ni khwaṱhisa, a ita uri ni dzule ni tshi fhulufhedzea, a ita uri ni ime no khwaṱha.” (1 Petro 5:​10) Roṱhe ri ḓo lingwa uri ri ite zwithu zwo khakheaho. Fhedzi Yehova u ri ṋea zwine ra zwi ṱoḓa uri ri kone u kunda yeneyo milingo. (Phisalema 139:​23, 24) U fhulufhedzisa uri u ḓo ri ṋea lutamo na maanḓa uri ri kone u mu shumela nga u fhulufhedzea.​—Vhalani Vhafilipi 2:​13.

 GUDANI ZWO ENGEDZEAHO

4. Bvelani phanḓa ni tshi amba na Khonani yaṋu ya tsini na u mu thetshelesa

U rabela na u guda Bivhili zwo ni thusa uri ni vhe khonani ya Yehova. Zwenezwi zwithu zwi nga ni thusa hani uri ni vhe tsini-tsini nae?

Vhalani Phisalema 62:​8, ni kone u fhindula mbudziso i tevhelaho:

• U itela u khwaṱhisa vhushaka haṋu na Yehova, ni nga khwinisa hani nḓila ine na rabela ngayo na zwine na mu vhudza zwone?

Vhalani Phisalema 1:2 na ṱhaluso i re magumoni a siaṱari, ni kone u fhindula mbudziso i tevhelaho:

• Ni nga khwinisa hani nḓila ine na vhala ngayo Bivhili u itela u khwaṱhisa vhukonani haṋu na Yehova?

Ni nga ita mini uri ni vhuyelwe vhukuma musi ni tshi vhala Bivhili? U itela u vhona zwiṅwe zwine na nga zwi ita, ṱalelani VIDIO, ni kone u fhindula mbudziso dzi tevhelaho.

• Kha zwithu zwo ambiwaho kha vidio, ndi zwifhio zwine na nga ṱoḓa u zwi shumisa?

• Ndi afhio mafhungo ane na nga ṱoḓa u guda nga hao?

 NO GUDA MINI?

Bvelani phanḓa ni tshi khwaṱhisa vhushaka haṋu na Yehova nahone ni ḓivhetshele zwipikwa musi ni tshi khou mu shumela. Arali na ita nga u ralo, ni ḓo ḓiphina nga vhutshilo zwino na nga hu sa fheli!

Ni Kha Ḓi Zwi Humbula?

• Ndi ngani ni tshi nga vha na vhungoho ha uri Yehova u ḓo ni thusa uri ni mu shumele nga u fhulufhedzea?

• Ni nga khwaṱhisa hani vhukonani haṋu na Yehova?

• Musi ni tshi dzudzanya u ita zwo engedzeaho tshumeloni ya Yehova, zwi ni thusa hani uri ni sendele tsini nae?